ފަސް މިލިޔަން ގަސް އިންދުމުގެ ޕްރޮގުރާމްގެ ދަށުން މިހާތަނަށް 450،000 ގަސް އިންދައިފި
-
4.2 މިލިޔަން ގަސް އިންދުމަށް 70 ތަނަކުން ޕްލެޖް ލިބިފައިވޭ
-
ރާއްޖޭގައި 5 މިލިޔަން ގަސް އިންދުމަކީ ރައީސް މުޢިއްޒުގެ ވަޢުދެއް
ފަސް މިލިޔަން ގަސް އިންދުމުގެ ޕްރޮގުރާމްގެ ދަށުން މިއަހަރުގެ މިހާތަނަށް 450،000 ގަސް އިންދައިފައިވާކަމަށް މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާއިން ވިދާޅުވެއްޖެއެވެ.
ފަސް މިލިޔަން ގަސް އިންދުމުގެ ޕްރޮގުރާމަކީ ރާއްޖެއިން ނެތެމުންދާ ގަސްތައް އަލުން އާލާކުރުމާއި ފެހިކަން އިތުރުކޮށް މާހައުލީ ނިޒާމު ދެމެހެއްޓުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރައްވާފައިވާ ޕްރޮގުރާމެކެވެ. މި ޕްރޮގުރާމް ފެށީ މިއަހަރުގެ ޖޫން މަހުގެ 5 ވަނަ ދުވަހުއެވެ. އެއީ ދުނިޔޭގެ ތިމާވެށީގެ ދުވަހެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާއިން ވިދާޅުވީ، މި ޕްރޮގުރާމްގެ ދަށުން މިހާތަނަށް 450،936 ގަސް އިންދާފައިވާ ކަމަށެވެ. އަދި 4،219،456 ގަސް އިންދަން 70 ތަނަކުން ޕްލެޖް ލިބިފައިވާކަމަށްވެސް އެ ވުޒާރާއިން މަޢުލޫމާތު ދެއްވިއެވެ.
5 މިލިޔަން ގަސް އިންދުމުގެ ޕްރޮގްރާމްގައި އިންދަނީ ރާއްޖެއިން މަދުން ފެންނަ އެކި ބާވަތުގެ ގަސްގަހާގެއްސާއި ހިޔާ ލިބޭ ގަސްގަހާގެއްސެވެ. އަދި އެކި ބާވަތުގެ ކާނާ ލިބޭ ޖުމްލަ 90 ބާވަތެއްގެ ގަސް އިންދުމަށް ކަނޑައަޅުއްވާފައިވެއެވެ.
މާލެއާއެކުއެކީގައި އަތޮޅުތަކުގައިވެސް ވަނީ ގަސް އިންދުމުގެ ޕްރޮގްރާމް ފަށާފައެވެ. އެގޮތުން މި މަޝްރޫޢުގެ ފުރަތަމަ ދުވަހު 398000 ގަސް އިންދާފައިވާކަމަށް ތިމާވެއްޓާބެހޭ ވަޒީރު ޠާރިޤް އިބްރާހީމް ވިދާޅުވެފައިވެއެވެ.
މި ޕްރޮގުރާމް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރެއްވީ މިދިޔަ އަހަރުގެ ޑިސެންބަރު މަހުގެ 1 ވަނަ ދުވަހު ކޮޕް-28 ސަމިޓުގައި ދެއްވި ތަޤުރީރުގައެވެ. އެ ތަޤުރީރުގައި ރައީސް ޑރ. މުޢިއްޒުގެ މި ދައުރުގެ ތެރޭގައި ރާއްޖޭގައި 5 މިލިޔަން ގަސް އިންދުމަށް ވަޢުދުވެވަޑައިގަތެވެ.