ދިވެހިރާއްޖޭގެ އަޑަކީ މޫސުމާއި ތިމާވެށީގެ ކަންކަމަށް ދިވެހިންގެ ލޯތައް ހުޅުވައިދިން މުހިންމު ބައިވެރިއެއް: ވަޒީރު ޠާރިޤު

ދިވެހި ރައްޔިތުންނަށް މޫސުމާ ބެހޭ އެންމެ ފަހުގެ މަޢުލޫމާތު އެންމެ ގިނަ ދުވަސްތަކެއް ވާންދެން ފޯރުކޮށްދިނުމުގެ ޚިދުމަތް ފޯރުކޮށްދެއްވާފައިވަނީ ދިވެހިރާއްޖޭގެ އަޑުންކަމުގައި މޫސުމީ ބަދަލުތަކާއި ތިމާވެއްޓާ ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ވަޒީރު މިހެން ވިދާޅުވީ ދިވެހިރާއްޖޭގެ އަޑުގެ 62 ވަނަ އަހަރީ ދުވަހުގެ މުނާސަބަތުގައި އަޑުގެ ޚާއްސަ ކަވަރޭޖްގައި ދެއްވި އިންޓަރވިއުއެއްގައެވެ.

ދިވެހިރާއްޖޭގެ އަޑުގެ 62 ވަނަ އަހަރީ ދުވަސް ފާހަގަކުރުމަށް ކުރިއަށްގެންދިޔަ ކަވަރޭޖްގައި ވާހަކަފުޅުދައްކަވަމުން މޫސުމީ ބަދަލުތަކާއި ތިމާވެއްޓާ ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވީ، ދިވެހިރާއްޖޭގެ އަޑާއި އެވުޒާރާއާއި ދެމެދު އޮތީ ވަރަށް ޒަމާންވީ ގުޅުމެއްކަމަށެވެ. އެގޮތުން ވަޒީރުކަމަށް ވަޑައިގަތުމުގެ ކުރިންވެސް އެންމެ ބޮޑަށް ފަހަގަކުރެވޭ އެއްކަމަކީ، މޫސުމާ ބެހޭ ޤައުމީ އިދާރާއާއި ގުޅިގެން މޫސުމާއި ބެހޭ އެންމެ ފަހުގެ މަޢުލޫމާތު ރާއްޖޭގެ ހުރިހާ ރައްޔިތުންނަށް ފޯރުކޮށްދިނުމަށް މުހިއްމު މަސައްކަތްތަކެއް ކުރައްވާފައިވާކަން ވަޒީރު ފާހަގަކުރެއްވިއެވެ.

"ވަރަށް ދުރުހަނދާނަކަށްވެސް ހުރޭ، ޚަބަރަށްފަހު އަންނަ މޫސުން. މިނިސްޓްރީގެ ދަށުގައި ހުރި، މެޓު އޮފީހާއި ގުޅިގެން ގެނެސްދޭ މޫސުމަކީ، ދިވެހީންގެ މަސައްކަތް ރާވާލާ ދުވަސް ކުރިއަށްގެންދިޔުމުގައި މުހިއްމު މަޢުލޫމާތެއް. މަސްވެރިންނާއި ދަތުރުވެރިންނާއި އަދި އެނޫންވެސް ބޭފުޅުން ވަރަށް ބޮޑަށް ބަލާ އެއްޗެއް މޫސުން އެއި." ވަޒީރު ވިދާޅުވިއެވެ.

މޫސުމީ ބަދަލުތަކާއި ތިމާވެއްޓާ ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވީ، ރާއްޖޭގެ ނާޒުކު ތިމާވެއްޓާ މެދު އަދި ކުރިމަތިވަމުންދާ އެކި ނުރައްކާތަކާމެދުވެސް ރައްޔިތުން ހޭލުންތެރިކުރުވުމުގައި ދިވެހިރާއްޖޭގެ އަޑުގެ ދައުރު ބޮޑުކަމަށެވެ.

މިގޮތުން ގޮނޑުދޮށުން ވެއްޔާއި، އަކިރިއާއި، ގައު ނެގުމާއި ވަށައިގެންވާ މާޙައުލުގެ ނާޒުކުކަމާއި، ކުންޏާމެދުވެސް ޢާއްމުން ހޭލުންތެރިކުރުވުމުގައި ދިވެހިރާއްޖޭގެ އަޑަކީ މުހިއްމު ހިއްސާއެއްކަން ވަޒީރު ފާހަގަކުރެއްވިއެވެ.

އަދި މިއަދުވެސް ހުރިހާ އެންމެންގެ ޒިންމާއެއްކަމުގައި ދެކިގެން ޙައްލުކުރަން މަސައްކަތްކުރަންވީ ކުނީގެ މައްސަލަކަމަށް ވަޒީރު ވިދާޅުވިއެވެ. އަދި ކުންޏަކީ ކޮންމެ މީހެއްގެވެސް ޒިންމާއެއް އޮތްކަމެއްކަން ޤަބޫލުކުރަންޖެހޭކަން ފާހަގަކުރެއްވިއެވެ.

ދިވެހިރާއްޖޭގެ އަޑާއި ވަޒީރުގެ ޙަޔާތްޕުޅާއި ގުޅޭ ހަނދާންތައް ހިއްސާކުރައްވަމުން ވަޒީރުވަނީ އަޑުގެ ރިކުއެސްޓް ޕްރޮގްރާމްތަކުގެ ހަނދާން އައުކުރައްވާފައެވެ. އަދި "އެބައުޅޭ އެބައުޅޭ" އާއި ރޯދަމަހުގެ "ރޯދަކުރުކުރުން" ފަދަ ޕްރޮގްރާމްތަކަކީ ޝައުގުވެރިކަމާއެކު އިންތިޒާރުކުރައްވާ ޕްރޮގްރާމްތައްކަން ވަޒީރު ފާހަގަކުރެއްވިއެވެ.

ދިވެހިރާއްޖޭގެ އަޑުގެ އަހަރީ ދުވަހާއި ގުޅިގެން ސަރުކާރުގެ އެކި ބޭފުޅުންނާއި، އަޑުގެ އިހުގެ މުވައްޒަފުންނާއިއެކު ދަނީ ޚާއްސަ ކަވަރޭޖެއް ކުރިއަށްގެންދަވަމުންނެވެ. ދިވެހިރާއްޖޭގެ އަޑަށް މިއަހަރު ފުރުނީ 62 އަހަރެވެ.