އައިޑީކާޑުގެ ޚިދުމަތް ރައްޔިތުންނާ ގާތުން ދިނުމަށް ކާމިޔާބު ގިނަ މަސައްކަތްތަކެއް

މި ނިމުނު 2024 ވަނަ އަހަރަކީ ވީހާވެސް ރައްޔިތުންނާ ގާތުން އައިޑީ ކާޑު ޕްރިންޓްކޮށް، ކާޑު ހައްދައިދިނުމުގެ ޚިދުމަތް ދިނުމަށް ގިނަ މަސައްކަތްތަކެއް ކުރެވުނު އަހަރެއްކަމަށް ޑިޕާޓްމެންޓް އޮފް ނެޝަނަލް ރެޖިސްޓްރޭޝަންސް، ޑީއެންއާރުއިން ވިދާޅުވެއްޖެއެވެ.

ޑީއެންއާރުއިން ސޯޝަލް މީޑިޔާގައި ޙިއްސާކޮށްފައިވާ ޕޯސްޓެއްގައި ވަނީ އެ އިދާރާއިން 2024 ވަނަ އަހަރުގެތެރޭގައި ކޮށްފައިވާ ބައެއް މަސައްކަތްތައް ހިއްސާކޮށްފައެވެ. މި މަސައްކަތްތަކުގެތެރޭގައި ހިމެނޭ އެއް ކަމަކީ މާލެ ސަރަހައްދުގައި އައިޑީކާޑު ޕްރިންޓްކުރުމުގެ ޚިދުމަތް ފޯރުކޮށްދޭނެ 3 އޮފީހެއް ހުޅުވުމެވެ. މި އޮފީސްތައް ހުންނަނީ މާލެއާއި ހުޅުމާލޭގެ ފުރަތަމަ ފިޔަވަހީގެ އިތުރުން ހުޅުމާލޭ ދެވަނަ ފިޔަވަހީގައެވެ. މިއީ ރައްޔިތުންނާއި ގާތުން އައިޑީކާޑު ޕްރިންޓްކުރުމުގެ އިންތިޒާމް ހަމަޖެއްސުމަށް ޑީއެންއާރުއިން ޤާއިމްކުރި އޮފީސްތަކެކެވެ.

ހަމައެއާއެކު 2024 ވަނަ އަހަރުގެތެރޭގައި ޑީއެންއާރުއިން ވަނީ 3 އަތޮޅެއްގައި އައިޑީ ކާޑު ޕްރިންޓުކުރުމުގެ ޚިދުމަތް ފަށާފައެވެ. އެއީ ގއ އަތޮޅާއި ދ އަތޮޅުގެ އިތުރުން ހދ އަތޮޅުގައެވެ.

މީގެއިތުރުން ރާއްޖޭގައި މީހުން ދިރިއުޅޭ ކޮންމެ ރަށަކަށް އިނގިލީގެ ނިޝާން ނެގޭ 10 ޑިވައިސްއެއް މިދިޔަ އަހަރުގެ ތެރޭގައި ފޯރުކޮށްދީފައިވެއެވެ. މިއީ މިދިޔަ އަހަރުގެ ޖުލައި މަހުގެ 19 ވަނަ ދުވަހު އިފްތިތާޙުކުރި ނާރެސް ޕޯޓަލާއެކު ފޯރުކޮށްދޭން ފެށި ޑިވައިސްތަކެކެވެ. ނާރެސް ޕޯޓަލް މެދުވެރިކޮށް ކައުންސިލްތަކަށް އައިޑީކާޑްގެ ސްޓޭޓަސް ބެލުމާއި މާލެއެކޭ އެއްފަދައިން އައިޑީ ކާޑް ދޫކުރުން އަދި އެޕްލިކޭޝަންތައް ބަލައިގަތުމަށް ހިދުމަތް ލިބޭނެއެވެ.

2024 ވަނަ އަހަރުގެ ފަހުކޮޅު ސަރުކާރުން ވަނީ ރާއްޖޭގެ މީހުން ދިރިއުޅޭ ކޮންމެ ރަށެއްގައި ދިވެހި ރައްޔިތެއްކަން އަންގައިދޭ ކާޑު ޕްރިންޓްކުރަން ފެށުމުގެ މަގުޗާޓު ވަނީ އިފްތިތާޙުކޮށްފައެވެ. މި މަގުޗާޓުގެ ދަށުން ކޮންމެ ރަށެއްގައި އައިޑީ ކާޑު ޕްރިންޓުކުރުމުގެ ޚިދުމަތް ރަށްރަށުގައި ފެށުމަށް ހަމަޖެހިފައިވާ އަހަރުގެ މަސްތައް ވަނީ ކަނޑައަޅާފައެވެ.

ފުރަތަމަ ފަހަރަށް އޮންލައިކޮށް އައިޑީ ކާޑު ހެދުމުގެ މަސައްކަތް ރާއްޖޭގައި ފަށާފައިވަނީ 2021 ވަނަ އަހަރުގައެވެ. އަދި މިދިޔަ އަހަރުގެ މާޗްމަހުގެ 7 ވަނަ ދުވަހު ކުރިން ބޭނުން ކުރަމުންއައި އޮންލައިން ޕޯޓަލްގެ ބަދަލުގައި ޑީ.އެން.އާރު އޮންލައިން ޕޯޓަލްއެއް ޤާއިމްކުރެވި ސީދާ ކޮންމެ ރައްޔިތަކު އަމިއްލައަށް ކާޑަށް އެދި ހުށަހެޅޭނެގޮތް ހަމަޖެއްސިއެވެ. މިގޮތަށް އެ ރައްޔިތަކު ހުރި ތަނަކުން ކާޑަށް އެދި ހުށަހެޅުމުގެ ފުރުޞަތު ހުޅުވާލުމުން ކުރިން ކައުންސިލް އިދާރާތަކުން ރައްޔިތުންނަށް ދެމުންގެންދިޔަ ކާޑުގެ ޚިދުމަތް މެދުކެނޑިގެން ދިޔައެވެ.

މިހާރު ސަރުކާރުން ކުރަމުންދާ މަސައްކަތަކީ އެ ރައްޔިތަކު ހުރި ތަނަކުން ކާޑަށް އެދި ހުށަހެޅުމުގެ ފުރުޞަތު ހުޅުވާލުމުން ކުރިން ކައުންސިލް އިދާރާތަކުން ރައްޔިތުންނަށް ދެމުންގެންދިޔަ ކާޑުގެ ޚިދުމަތް ދިނުމުގެ ނިޒާމު އިޢާދަކުރުމެވެ. މިއީ ޑީއެންއާރުގެ މަސައްކަތްތައް ބައްޓަންވެފައިވާ އަމާޒެވެ.