ޔުނައިޓެޑް ސްޓޭޓްސް އޮފް އެމެރިކާގެ ރައީސްގެ މެޑެލް (ޕްރެޒިޑެންޝަލް މެޑެލް އޮފް ފްރީޑަމް) އެ ގައުމުގައި ފުޓްބޯޅަ ކުޅެމުން އަންނަ ދުނިޔޭގެ އެންމެ މޮޅު އެއް ކުޅުންތެރިޔާ ލިއޮނެލް މެސީއަށް ދީފިއެވެ.
ވައިޓް ހައުސްގައި ރޭ ބޭއްވި ރަސްމިއްޔާތުގައި އެމެރިކާގެ އިންޓަރ މަޔާމީއަށް ކުޅޭ މެސީއަށް އެ ގައުމުގެ އެންމެ މަތީ ޝަރަފުގެ މެޑަލް އެރުވި ނަމަވެސް، އާޖެންޓީނާގެ ކެޕްޓަން އެ ރަސްމިއްޔާތަށް ގޮސްފައެއް ނުވެއެވެ.
ވައިޓް ހައުސްއަށް މެސީ ފޮނުވި ސިޓީގައި ވަނީ މެޑެލް ލިބޭކަން އޭނާއަށް އެނގުނުއިރު، މުހިންމު އެހެން ކަމަކަށް ވަގުތު ހުސްކޮށްފައިވާ ކަމަށެވެ. ނަމަވެސް އެމެރިކާގައި އޭނާ ހުންނަ ދުވަސްވަރު އެ މެޑެލް ލިބިގަތުމަށް، އެހެން ވަގުތެއްގައި ވައިޓް ހައުސްއަށް ދެވިދާނެ ކަމަށްވެސް ވަނީ ބުނެފައެވެ. މިއީ އެމެރިކާގެ ލީގުގެ ޗުއްޓީ ދުވަސްވަރު ކަމުން މެސީ ވަގުތު ހޭދަކުރަމުންދަނީ އާޖެންޓީނާ އާއި ސްޕެއިންގައެވެ.
ދުނިޔޭގެ މޮޅު ކުޅުންތެރިޔާގެ މަގާމު ރިކޯޑު އަދަދެއް ކަަމަށްވާ އަށް ފަހަރު ހޯދާފައިވާ މެސީއަށް މި މެޑެލް ލިބުނުއިރު، އޭނާއަކީ މި މެޑެލް ލިބުނު ފުރަތަމަ ފިރިހެން ފުޓްބޯޅަ ކުޅުންތެރިޔާއެވެ. ބާސެލޯނާގެ ކުރީގެ ކެޕްޓަނަށް މެޑެލް ދޭން ނިންމީ ކުޅިވަރާއި އިޖުތިމާއީ ގޮތުން ކޮށްދެމުން އަންނަ ޚިދުމަތަށް ބެލުމަށްފަހުއެވެ.
ވައިޓް ހައުސްއިން ރޭ ބުނީ ފުޓްބޯޅަ ކުޅުމުގެ އިތުރަށް މެސީ އަކީ ސިއްހީ ގޮތުންނާއި ތައުލީމީ ގޮތުން އޭނާގެ އަމިއްލަ ފައުންޑޭޝަން މެދުވެރިކޮށް ގިނަ އިޖުތިމާއީ ޚިދުމަތްތަކެއް ދެމުން އަންނަ ފަރާތެއް ކަމަށެވެ. އެ ގޮތުން އޭނާގެ އުފަން ގައުމު އާޖެންޓީނާ އާއި ސްޕެއިން އަދި ސީރިއާ އާއި ބަންގްލަދޭޝްއަށް އެހީތެރިވަމުންދާއިރު، ދާދި ފަހުން ވަނީ އާޖެންޓީނާގައި ފުއްޕާމޭގެ ބަލިތަކަށް ހާއްސަ ކްލިނިކެއްވެސް ހުޅުވާފައެއެވެ. މީގެ އިތުރުން އޭނާ އަކީ ކުޑަކުދިންގެ ހައްގުތަކަށް ވަކާލާތުކުރާ ފަރާތެއް ކަމަށެވެ.
މި މެޑެއްޔަކީ އެމެރިކާގެ ރައީސް، އެ މަނިކުފާނު ކަނޑައަޅާ ފަރާތަކަށް ދެވޭ މެޑެއްޔެކެވެ. އެ ގޮތުން މި ފަހަރު އެމެރިކާގެ ރައީސް ޖޯ ބައިޑަން, އޭނާގެ ރިއާސީ ދައުރުގެ ފަހު ދުވަސްކޮޅުގެ ތެރޭގައި ވަނީ 19 ފަރާތަކަށް މި މެޑެލް އަރުވާފައެވެ. އޭގެ ތެރޭގައި ކުރީގެ ސެކްރެޓަރީ އޮފް ސްޓޭޓް އަދި ކުރީގެ ރައީސް ބިލް ކްލިންޓަންގެ އަނބިކަނބަލުން ހިލަރީ ކްލިންޓަންވެސް ހިމެނެއެވެ.