އާސަންދައިގެ ދަށުން ބޭސް ނަގަން ދަތިވެއްޖެނަމަ ރިޕޯޓުކުރަން އެދިއްޖެ
-
ރިޕޯޓުކުރާއިރު، ބޭސްފިހާރައިގެ ނަމާއި ބޭސް ސިޓީއާއި ބޭހުގެ ރަސީދު ހިމަނަންޖެހޭނެ
ޤައުމީ ހެލްތު އިންޝުއަރެންސް ސްކީމް، އާސަންދައިގެ ދަށުން ބޭހެއް ނުލިބިއްޖެނަމަ، ނުވަތަ ފައިސާ ދައްކަންޖެހިއްޖެނަމަ އެ މައްސަލަ ރިޕޯޓުކުރަން އާސަންދަ ކުންފުނިން އެދިއްޖެއެވެ.
އާސަންދައިން މިކަމަށް އެދިފައި މިވަނީ ބޭހުގެ އަގަށް ސަރުކާރުން ގެނައި ބަދަލުތަކަކާ ގުޅިގެން އާސަންދައިގެ ދަށުން ބޭސް ނުލިބޭކަމަށް ބުނެ ބައެއް ފަރާތްތަކުން ކަންބޮޑުވުން ފާޅުކުރަމުންދާ ދަނޑިވަޅެއްގައެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން އާސަންދަ ކުންފުނިން ވިދާޅުވީ ބޭހުގެ އަގަށް ގެނެވުނު ބަދަލުތަކާއެކު އާސަންދަ ސްކީމުން ބޭސް ނެގުމުގައި ބައެއް މީހުންނަށް ދަތިތައް ދިމާވާކަމަށް ބުނެ ޝަކުވާތަކެއް ލިބެމުންދާ ކަމަށެވެ. އެހެންކަމުން އާސަންދަ ސްކީމްގެ ދަށުން ބޭސް ނަގާއިރު، އަމިއްލައަށް ފައިސާ ދައްކަން ޖެހިއްޖެނަމަ ނުވަތަ ބޭހެއް ނުލިބިއްޖެނަމަ ރިޕޯޓުކުރަން އެކުންފުނިން ވަނީ އެދިފައެވެ. އެގޮތުން އާސަންދަ ޝިކާވަތި ޗެޓްލައިން ނަންބަރު 7951400 އަށް ވައިބަރ މެދުވެރިކޮށް ރިޕޯޓުކުރެވޭނެކަމަށް އާސަންދައިން ވިދާޅުވިއެވެ.
އާސަންދައިން ވިދާޅުވީ މައްސަލަ ރިޕޯޓުކުރާއިރު، ބޭސްފިހާރައިގެ ނަމާއި ބޭސް ސިޓީއާއި ބޭހުގެ ރަސީދު ހިމަނަންޖެހޭނެކަމަށެވެ.
— Aasandha Company Ltd (@AasandhaLtd) January 5, 2025
އާސަންދަ ނިޒާމުގައިހުރި މައްސަލަތައް ހައްލުކުރުމުގެ ގޮތުން އެ ސްކީމުން ދޫކުރާ ބައެއް ބޭހުގެ އަގުތައް ކުޑަކޮށްފައި ވަނީ މިދިޔަ އަހަރުގެ ނޮވެންބަރު މަހުގެ ތެރޭގައެވެ. އަގު ކުޑަކޮށްފައިވަނީ އާސަންދައިގެ ދަށުން ދޫކުރާ އެންމެ އަގު ބޮޑު 250 ބޭހުގެއެވެ.