ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ކުރިއަށްގެންދާ ގައުމީ ވޮލީބޯލް ޗެމްޕިއަންޝިޕް 2024 ގެ ފެށުން ދިވެހި ސިފައިންގެ ކުލަބާއި، ކުލަބު އެޗްޑީސީން ރަނގަޅުކޮށްފިއެވެ.
މި ފަހަރުގެ ގައުމީ މުބާރާތުގައި ވާދަކުރަނީ މިދިޔަ ބުރާސްފަތި ދުވަހުގެރޭ ނިމުނު ގައުމީ ވޮލީބޯލް ލީގު 2024 ގެ ގަދަ ހަތަރު ޓީމެވެ. އެއީ ސިފައިންގެ ކުލަބާއި، އެޗްޑީސީގެ އިތުރުން ބްލޫސް ފޯރ ވޮލީބޯލް އާއި، ސްޕޯޓްސް ކުލަބު ސިޓީއެވެ.
ޒުވާނުންގެ މަރުކަޒުގެ އެތެރޭ ކޯޓުގައި ކުރިއަށްދާ މި މުބާރާތުގައި މިއަދު ހަވީރު ކުޅުނު މެޗުން ސިފައިންގެ ކުލަބު މޮޅުވީ ބްލޫސް ފޯރ ވޮލީބޯލް އަތުން ސިދާ ތިން ސެޓުންނެވެ. މި މެޗުގައި ސިފައިންގެ ކުލަބުގެ ފަރާތުން މޮޅު ކުޅުމެއް ފެނިގެންދިޔައިރު، އެ ޓީމުން ސެޓުތައް ގެންގޮސްފައިވަނީ 25-23، 25-15 އަދި 25-21 އިންނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ސިފައިންގެ ކުލަބުގެ ބިދޭސީ ކުޅުންތެރިޔާ މުޙައްމަދު ވަގަރުއެވެ.
މީގެ އިތުރުން މި މުބާރާތުގައި މިރޭ ކުޅުނު މެޗުން އެޗްޑީސީ މޮޅުވީ ސްޕޯޓްސް ކުލަބު ސިޓީ އަތުން ސިދާ ތިން ސެޓުންނެވެ. މި މެޗުގައި އެޗްޑީސީގެ ފަރާތުން މޮޅު ކުޅުމެއް ފެނިގެންދިޔައިރު، އެ ޓީމުން ސެޓުތައް ގެންގޮސްފައިވަނީ 25-21، 25-19 އަދި 25-20 އިންނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ އެޗްޑީސީއަށް ކުޅެމުން އަންނަ ޕާކިސްތާނުގެ މުބައްޝަރް ރަޒާއެވެ.
މި ފަހަރުގެ ގައުމީ މުބާރާތުގައި ވާދަކުރަމުން އަންނަ ހަތަރު ޓީމުގެ މެދުގައި ލީގު ބުރެއް އެންމެ ފުރަތަމަ ކުރިއަށްދާއިރު، ލީގު ބުރުގެ އެއްވަނަ ހޯދާ ޓީމަކަށް ފައިނަލުގެ ސީދާ ޖާގައެއް ލިބިގެންދާނެއެވެ. އަދި ފައިނަލުގެ ފަހު ޖާގަ ލިބޭނީ ދެވަނަ އާއި ތިންވަނައިގައި މެދުގައި ކުޅެވޭ ސެމީ ފައިނަލް މެޗުން މޮޅުވާ ޓީމަކަށެވެ.
ގައުމީ މުބާރާތުގައި ކުޅުނު ފުރަތަމަ މެޗުތަކުން ސިފައިންގެ ކުލަބާއި އެޗްޑީސީ މޮޅުވިއިރު، މި ފަހުން ނިމިގެންދިޔަ ގައުމީ ލީގުގެ ފަހު މެޗުގައި ވާދަކޮށްފައިވަނީ އެ ދެ ޓީމެވެ. އެ މެޗު ތިން ސެޓު އެއް ސެޓުން ކާމިޔާބުކޮށް، ލީގު ޗެމްޕިއަންކަން ހޯދާފައިވަނީ އެޗްޑީސީންނެވެ.