ގުޅިފަޅު މަގުހެދުމާއި ޔުޓިލިޓީގެ ޚިދުމަތްތައް ޤާއިމުކުރުމުގެ މަސައްކަތް ޗައިނާގެ ސީއެމްއީސީއަށް

ގުޅީފަޅުގެ މަގުތައް ޒަމާނީ ފެންވަރަށް ތަރައްޤީކޮށް، ޔުޓިލިޓީގެ ޚިދުމަތް ޤާއިމުކުރުމުގެ އެއްބަސްވުމުގައި ޗައިނާގެ ސީއެމްއީސީއާއެކު ސޮއިކޮށްފިއެވެ.

މިކަމަށްޓަކައި ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުހައްމަދު ލަތީފް ބައިވެރިވެވަޑައިގެންނެވިއެވެ.

މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ އިމާރާތްކުރުމާއި ގެދޮރުވެރިކަމާއި ބިނާރާއި ބެހޭ ވަޒީރު ޑރ.ޢަބްދުﷲ މުއްޠަލިބެވެ. ޗައިނާގެ ފަރާތުން ސޮއިކުރެއްވީ ސީއެމްއީސީގެ ރީޖަނަލް ޖެނެރަލް މެނޭޖަރ ކިއަން ހައޮޖުންއެވެ.

މި މަޝްރޫއުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވީ މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި ސީއެމްއީސީ އާއި އެ ވުޒާރާއާ ދެމެދު ގާއިމްކުރެވުނު އެމްއޯޔޫއެއްގެ ދަށުން ކުރެވުނު މަސައްކަތްތަކެއްގެ ނަތީޖާކަމަށެވެ. އަދި މި މަސައްކަތުގެ އެއްބަސްވުމާ ހަމައަށް ދިޔުމުގެ ކުރިން އެ ވުޒާރާއާއި ސީއެމްއީސީއާ ދެމެދު ޓެކްނިކަލް ފެންވަރުގައި ގިނަ މަސައްކަތްތަކެއް ކުރެއްވިކަމަށް ވަޒީރު ވިދާޅުވިއެވެ.

މި އެއްބަސްވުމުގައި ސޮއިކުރުމާއެކު ސާވޭ އަދި ތަފުސީލު ކުރެހުމުގެ މަސައްކަތް ކޮންޓްރެކްޓަރ ފަށާނެ ކަމަށް ވަޒީރު ވިދާޅުވިއެވެ. ވަޒީރު ވަނީ ތިލަމާލެ ބްރިޖު މަޝްރޫއަށް ގުޅީފަޅުން ބޮޑު ބިމެއް ނަގާފައިވާތީ މަސައްކަތަށް ދަތިތަކެއް ހުރި ނަމަވެސް ބައިބަޔަށް ބަހާލައިގެން މަސައްކަތް ކުރިއަށް ގެންދަން އެއްބަސްވެފައިވާކަން ފާހަގަކުރައްވާފައެވެ.

"ޕްރޮޖެކްޓް ސްކޯޕިން ތައްޔާރުކުރުމާއި ޓެކްނިކަލް ސްޕެސިފިކޭޝަން ތައްޔާރުކުރުމާއި ކޮންސެޕްޓް ލެވަލްގެ ޑިޒައިން މަސައްކަތްތަކެއް ވަނީ ކުރެވިފައި. މިހުރިހާ މަސައްކަތްތަކަށްފަހު ކޮންޓްރެކްޓަރ ފައިނޭންސް ހަމަޖައްސާ ގޮތަށް ސީއެމްއީސީން ހުށަހެޅި ޕްރޮޕޯސަލް އިވެލުއޭޓްކޮށް އެއާމެދު ކުރެވުނު މަޝްވަރާތަކަށްފަހު ކޮންޓްރެކްޓާ ހަމައަށް މި ވަނީ އާދެވިފައި" އިމާރާތްކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވިއެވެ.

މިމަޝްރޫޢުގެ ތެރެއިން ކުރެވޭ މައިގަނޑު މަސައްކަތްތައް

* ކަރަންޓު ޑިސްޓްރިބިއުޝަން ނެޓްވޯކް ގާއިމުކުރުން
* ފެނާއި ނަރުދަމާގެ ނިޒާމު ގާއިމުކުރުން
* ޑީވޯޓަރިން ސިސްޓަމް ގާއިމުކުރުން
* މަގުތައް ޒަމާނީ ފެންވަރަށް ހެދުން
* ޖީޕޮން ޑަކްޓިން ސިސްޓަމް ގާއިމުކުރުން
* ގޭސް ސްޓޯރޭޖާއި ޑިސްޓްރިބިއުޝަން ސިސްޓަމް ގާއިމުކުރުން

މިރަސްމިއްޔާތުގައި ވާހަކަދައްކަވަމުން ސީއެމްއީސީގެ ޑެޕިއުޓީ ޖެނެރަލް މެނޭޖަރަ ޝިއެ-ޚަރ ވިދާޅުވީ އެކުންފުނިން ރާއްޖޭގައި މަޝްރޫޢުތައް ހިންގާތާ 14 އަހަރަށްވުރެ ގިނަ ދުވަސްވެފައިވާ ކަމަށާއި، މިދިޔަ އަހަރުތަކުގައި މުހިންމު މަސައްކަތްތަކެއް ފުރިހަމަކޮށްފައިވާކަމަށެވެ. އޭގެތެރޭގައި ހައުސިން އިންފްރާސްޓްރަކްޗަރގެ މަސައްކަތްތަކާއި، މަގުހެދުމާއި ހަކަތައާ ގުޅޭ މަޝްރޫޢުތައް ހިމެނޭކަން އޭނާ ފާހަގަކުރެއްވިއެވެ.

"މި މަޝްރޫޢކީ މުހިންމު މަޝްރޫޢަކަށް ވާނެ. މި މަޝްރޫޢުގެ އިތުރަށް އައްޑޫ ސިޓީގައި ޓޫރިޒަމް ކޮމްޕްލެކްސްއެއް ގާއިމް ކުރުމުގެ އެއްބަސްވުމެއްގައި ވެސް ވަނީ ސޮއިކޮށްފައި." ސީއެމްއީސީގެ ޑެޕިއުޓީ ޖެނެރަލް މެނޭޖަރަ ޝިއެ-ޚަރ ވިދާޅުވިއެވެ.

ގުޅީފަޅަކީ ބޯހިޔާވަހިކަމަށް ގޯތި ދޫކޮށްފައިވާ ރަށެކެވެ. އެގޮތުން ގުޅިފަޅުން 7 ސައިޒެއްގެ ޖުމުލަ 3520 ގޯތި ދޫކޮށްފައިވެއެވެ. ގުޅިފަޅުގެ ކުރީގެ ލޭންޑް ޔޫސް ޕްލޭނާ ޚިލާފަށް އަލުން އެކުލަވާލި ލޭންޑް ޔޫސް ޕްލޭންގައި ބިމުގެ 21 އިންސައްތަ ކަނޑައަޅާފައިވަނީ ޕާކުތަކަށާއި ގްރީން ސްޕޭސްތަކަށެވެ. އަދި ސްކޫލުތައް ހުންނަނީ މީހުން ދިރިއުޅޭ ސަރަހައްދުތަކުން 10 މިނެޓުން ހިނގާފައި ދެވޭވަރުގެ ދުރުމިނެއްގައެވެ. މީހުން ދިރިއުޅޭ ސަރަހައްދުތަކާއި މިސްކިތްތަކާ ދެމެދު ހުންނަނީ 5 މިނެޓުން ހިނގާފައި ދެވޭވަރުގެ ދުރުމިނެކެވެ. މިލޭންޑް ޔޫސް ޕްލޭންގައި މުޅި ގުޅީފަޅުގައި ވެހިކަލް ޕާކުކުރުމަށް 70،000 ޕާކިން ސަރަހައްދު ކަނޑައަޅާފައިވެއެވެ.