އޭޓީއެމްއިން މަހެއްގެ މައްޗަށް ނެގޭ މިންވަރު 3500 ޑޮލަރަށް

އޭޓީއެމްއިން މަހެއްގެ މައްޗަށް ޑޮލަރު ނެގޭ މިންވަރު 3500 ޑޮލަރު ކަމަށް ބޭންކް އޮފް މޯލްޑިވްސް، ބީއެމްއެލްއިން ހަމަޖައްސައިފިއެވެ. މި ބަދަލު ގެނެސްފައިވަނީ، ނަގުދު ފައިސާއަށް ބަރޯސާވާ މިންވަރު މަދުކުރުމަށް ކުރާ މަސައްކަތުގެ ދަށުން ކަމަށް ބޭންކް އޮފް މޯލްޑިވްސްއިން ވިދާޅުވިއެވެ.

"ޑިޖިޓަލް-ފަސްޓް" ބޭންކިންގ ޚިދުމަތް ފުޅާކުރުމަށް ކުރަމުންދާ މަސައްކަތުގެ ދަށުން މިހިނގާ އޮކްޓޯބަރ މަހުގެ 1 ވަނަ ދުވަހުން ފެށިގެން އޭޓީއެމްތަކުން މަހެއްގެ މައްޗަށް ޑޮލަރު ނެގޭ މިންވަރަށް ބޭންކް އޮފް މޯލްޑިވްސްއިން ވަނީ ބަދަލު ގެނެސްފައެވެ. މިގޮތުން މިހާރު މަހެއްގެ މައްޗަށް ޑޮލަރު ނެގޭ މިންވަރު 3500 ކަމަށް ހަމަޖައްސާފައިވާއިރު، މީގެ ކުރިން އޮންނަނީ ދުވާލެއްގެ މައްޗަށް ޑޮލަރު ނެގޭ ލިމިޓެކެވެ. ބީއެމްއެލްއިން ވިދާޅުވީ، މި ބަދަލު ގެނައި ނަމަވެސް ކާޑަކުން ދުވާލަކަށް ނެގޭ 1,600 ޑޮލަރުގެ ލިމިޓަށް އެއްވެސް ބަދަލެއް ނާންނާނެ ކަމަށެވެ.

މި ނިންމުމަކީ ނަގުދު ފައިސާއަށް ބަރޯސާވާ މިންވަރު ކުޑަކޮށް، އަވަސް، ރައްކާތެރި އަދި ލުއިފަސޭހަ ޑިޖިޓަލް މާލީ ނިޒާމެއް ކުރިއެރުވުމަށް ބީއެމްއެލްއިން ގެންގުޅޭ ދުރުރާސްތާގެ ސިޔާސަތުގެ ދަށުން ނިންމާފައިވާ ނިންމުމެއް ކަމަށް އެ ބޭންކުން ހާމަކުރެއެވެ. ބީއެމްއެލްއިން ވިދާޅުވީ، އާންމު ގޮތެއްގައި ބޭންކަށް ކަސްޓަމަރުން ޑޮލަރު ޖަމާކުރަނީ ބޭންކު ޓްރާންސްފަރ މެދުވެރިކޮށް ކަމަށެވެ. ނަމަވެސް ނިސްބަތުން ގިނަ އަދަދެއް ކަސްޓަމަރުން ނަގުދު ފައިސާގެ ގޮތުގައި އޭޓީއެމްތަކުން ފައިސާ ނަގާ ކަމަށް ބީއެމްއެލްއިން ވިދާޅުވިއެވެ.

ނަގުދު ފައިސާ ބޭނުންކުރަން ނުޖެހި، ދުވަހުން ދުވަހަށް ބޭނުންވާ ބޭންކިންގ ޚިދުމަތްތައް ފަސޭހަކަމާއެކު ހޯދޭނެ ޑިޖިޓަލް ވަސީލަތްތައް ޤާއިމުކުރުމަށްޓަކައި ބޭންކުން ވަނީ މުހިންމު ބޮޑެތި އިންވެސްޓްމަންޓްތަކެއް ކޮށްފައެވެ. އެގޮތުން ބީއެމްއެލް މޮބައިލް ބޭންކިންގ އަދި އިންޓަރނެޓް ބޭންކިންގ މެދުވެރިކޮށް، ކޮންމެ ވަގުތަކު، ކޮންމެ ތަނެއްގައި ހުރެގެންވެސް ބިލުތަކަށް ފައިސާ ދެއްކުމާއި، ފައިސާ ޓްރާންސްފަރ ކުރުމުގެ އިތުރުން އެކައުންޓުގެ އެންމެހައި މުޢާމަލާތްތައް ފަސޭހަކަމާއެކު ބަލަހައްޓައި މެނޭޖުކުރެވޭނެ ކަމަށް ބީއެމްއެލްއިިން ވިދާޅުވިއެވެ.

މީގެ އިތުރުން، ރާއްޖެއާއި ރާއްޖެއިން ބޭރުގެ ވިޔަފާރިތަކަށް ކާޑު މެދުވެރިކޮށް އަދި ކޮންޓެކްޓްލެސްކޮށް ފައިސާ ދެއްކުމާއި، އެކައުންޓުތަކަށް ވަގުތުން ވަގުތަށް ފައިސާ ފޮނުވުމުގެ ޚިދުމަތްވެސް ކަސްޓަމަރުންނަށް ފަސޭހަކަމާއެކު ލިބޭނެ ކަމަށް ބީއެމްއެލްއިން ވިދާޅުވެއެވެ.

ބޭންކުގެ ޚިދުމަތްތައް ޑިޖިޓަލައިޒު ކުރުމުގެ ސިޔާސަތުގެ ދަށުން ބޭންކުގެ އެކައުންޓު ހުޅުވުމާއި ބޭންކު މެދުވެރިކޮށް އެދެންޖެހޭ ޚިދުމަތްތައް އޮންލައިންކޮށް އެދެވޭނެ ގޮތަށް ވަނީ ބަދަލުކޮށްފައެވެ.