ޔަހޫދީންގެ "ސުކޯތު" ޢީދާ ދިމާކޮށް، އިސްތިޢުމާރުކޮއްފައިވާ އިރުމަތީ ޤުދްސްގައި ހުންނަ މާތްވެގެންވާ މަސްޖިދުލް އަޤްޞާގެ ޙަރަމްފުޅަށް 10،000 އަށް ވުރެ ގިނަ ޔަހޫދީ ވަޒަންވެރިން ގަދަކަމުން ވަދެގެންފިއެވެ.
މިދިޔަ ހޮނިހިރު ދުވަހު ފެށުނު ޔަހޫދީންގެ "ސުކޯތު" ޢީދާ ގުޅުވައިގެން، ޔަހޫދީ ސަލާމަތީ ބާރުތަކުގެ ފުރިހަމަ ޙިމާޔަތުގައި 10،000 އަށް ވުރެ ގިނަ ޔަހޫދީ ވަޒަންވެރިން އަލްއަޤްޞާ މިސްކިތުގެ ގޯތިތެރެއަށް ގަދަކަމުން ވަދެގަނެފައިވާ ކަމަށް ޤުދްސް މަސްދަރުތަކުން ހާމަކޮށްފިއެވެ. މީގެ އިތުރުން، ޔަހޫދީ ޤާނޫނުހަދާ މަޖިލީސް (ކްނެސެޓް) ގެ ކުރީގެ މެންބަރު މޯޝޭ ފެއިގްލިން ހިމެނޭ ގޮތަށް، ހައްދުފަހަނައަޅާފައިވާ ސިޔާސީ އިސް ފަރާތްތަކުން ވެސް ވަނީ މިސްކިތުގެ ޙަރަމްފުޅަށް ވަދެ، ޔަހޫދީ ޝިޢާރުތައް ފާޅުކޮށް، ލަވަކިޔައި އުފާފާޅުކޮށްފައެވެ.
ޤުދްސްގެ އިސްލާމީ ވަޤުފުގެ އިދާރާއިން ހާމަކުރި ގޮތުގައި، ތާރީޚީ ގޮތުން ދެމިއޮތް އުޞޫލުތަކަށް ބަލާއިރު، އަލްއަޤްޞާ މިސްކިތުގެ މުޅި ސަރަޙައްދު ބެލެހެއްޓުމާއި އެތަނުގައި އަޅުކަންކުރުމުގެ ފުރިހަމަ ޙައްޤު ލިބިގެންވަނީ ހަމައެކަނި މުސްލިމުންނަށާއި ވަޤުފު އިދާރާއަށެވެ. އެހެންނަމަވެސް، ޔަހޫދީ އިސްތިޢުމާރީ ސަރުކާރުން ވަނީ "ލަޔަންސް ގޭޓް" އަދި ސިލްވާންއާ ގުޅޭ މައި މަގުތައް ބަންދުކޮށް، ފަލަސްޠީނުގެ ރައްޔިތުންގެ ޙަރަކާތްތަކަށް ހުރަސްއަޅައިފައެވެ. އަދި ޔަހޫދީ ވަޒަންވެރިންނަށް ހުޅަނގު ފާރަށާއި އަލްއަޤްޞާގެ ޙަރަމްފުޅަށް ފަސޭހަކަމާއެކު ވަދެގަތުމުގެ ފުރުޞަތު ފަހިކޮށްދީފައެވެ.
މީގެ އިތުރުން، ވޭތުވެދިޔަ 3 މަސްދުވަހުގެ ތެރޭގައި ޤުދުސްގެ ރައްޔިތުން މަސްޖިދުލް އަޤްޞާއަށް ވަނުން މަނާކޮށް ޔަހޫދީ ސަރުކާރުން ވަނީ 80 އަށް ވުރެ ގިނަ އަމުރު ނެރެފައެވެ. އަދި ސެޕްޓެމްބަރު 12 އަދި 13 ގައި ފާހަގަކުރި ޔަހޫދީންގެ އައު އަހަރާއި، ސެޕްޓެމްބަރު 21 އިން 22 އަށް އޮތް "ޔޯމް ކިއްޕޫރު" ގެ އިތުރުން، އޮކްޓޫބަރު 2 ގައި ނިމޭ "ސުކޯތު" އީދާއި، އޮކްޓޫބަރު 3 ގައި ފެށޭ "ސިމްޗަތު ތޯރާ" އީދާ ދިމާކޮށް، ހައްދުފަހަނައަޅާފައިވާ ޔަހޫދީ ވަޒަންވެރިން އަލްއަޤްޞާ މިސްކިތުގެ ޙުރުމަތް ކަނޑައި، އެތަނަށް ގަދަކަމުން ވަދެގަންނަ މިންވަރު ވަނީ އިންތިހާއަށް އިތުރުވެގެން ގޮސްފައެވެ.