ޝޫޓިން ޓީމުގެ އަމާޒު ސައުތު އޭޝިއަން ގޭމްސްއަށް
-
އޭޝިއަން ގޭމްސްގައި ޤައުމީ 5 ރިކޯޑު އައުކޮށްފަވާއިރު، މުޅިން އަލަށް 4 ރިކޯޑެއް ހަދާފައިވޭ
-
އަމާޒަކީ ސައުތު އޭޝިއަން ގޭމްސްގައި އިތުރު ކާމިޔާބީތަކެއް ހޯދުން
ޖަޕާނުގައި ކުރިއަށްދިޔަ 20 ވަނަ އޭޝިއަން ގޭމްސްއަކީ ޝޫޓިން ޓީމުގެ ކުރިއަށްހުރި މުބާރާތްތަކަށް ތައްޔާރުވުމަށް ލިބުނު މުހިންމު ތަޖުރިބާއެއްކަމަށާ އަމާޒަކީ ސައުތު އޭޝިއަން ގޭމްސްއިން އިތުރު ކާމިޔާބީތަކެއް ހޯދުންކަމަށް ޤައުމީ ޝޫޓިން ޓީމުން ބުނެފިއެވެ.
އޭޝިއާގައި ކުރިއަށްދިޔަ މަލްޓި ސްޕޯޓް އެންމެ ބޮޑު އެއް ހަރަކާތްކަމަށްވާ އޭޝިއަން ގޭމްސްގައި ޤައުމީ 12 ޝޫޓަރަކު ވާދަކޮށް، 9 ޤައުމީ ރިކޯޑެއް ހަދާފައިވާއިރު، ބުދަ ދުވަހުގެ ރޭގެ ވަގުތެއްގައި ޓީމުވަނީ މާލެ އައިސްފައެވެ. މާލެ އައުމަށްފަހު ވެލާނާ އިންޓަނޭޝަނަލް އެއާޕޯޓުގައި ހުރެ، ޓީމުގެ ޒުވާން ކުޅުންތެރިޔާ އާއިޝަތު އީން އަސްލަމް ބުނީ މުބާރާތުން ގިނަ ތަޖުރިބާތަކެއް ލިބުނުކަމަށެވެ. ބައިނަލްއަޤްވާމީ މައިދާނުގައި ވާދަވެރި މެޗުތަކެއްގައި ވާދަކޮށްލުމުން ކުރިއަށް ހުރި މުބާރާތްތަކަށް ތައްޔާރުވާން ފަސޭހަވެއްޖެކަމަށް އީން ފާހަގަކުރިއެވެ.
"ޖަޕާނުގައި ވާދަކުރީ ވަރުގަދަ ޝޫޓަރުންނާ. މިއީ ލިބުނު ވަރަށް ރަނގަޅު ތަޖުރިބާއެއްކަމަށް ގަބޫލުކުރަން. ރަނގަޅުކޮށްލަންޖެހޭ ކަންކަން ފާހަގަކުރެވުނު މުބާރާތުގެ ތެރެއިން" އީން ބުންޏެވެ.
ޖަޕާނުގައި ކުރިއަށްދިޔަ އޭޝިއަން ގޭމްސްގައި އެންމެ ގިނަ ޤައުމީ ރިކޯޑް ހެދި ޓީމުގެ ޝަރަފު ޤައުމީ ޝޫޓިން ޓީމުން ހޯދާފައިވާއިރު، ޓީމުގެ މުހިންމު ކުޅުންތެރިޔާ އުމަރު މުހައްމަދު ނަޝީދުވެސް ބުނެފައިވަނީ ސައުތު އޭޝިއަން ގޭމްސްއަށް އައިޗީ ނަގޯޔާގެ ސަބަބުން ތައްޔާރުވާން ކަންކަން ދަސްވެގެންދިޔަކަމަށެވެ.
"މިއީ ޝޫޓިންގެ ކުރިއަށްހުރި މުބާރާތްތަކަށް ލިބުނު ވަރަށް މުހިންމު ތަޖުރިބާއެއްކަމަށް އަޅުގަނޑު ދެކެން" އުމަރު ބުންޏެވެ.
އޭޝިއަން ގޭމްސްގައި ޤައުމީ ޝޫޓިން ޓީމުން މިހޯދި ކާމިޔާބީއަކީ މިމުބާރާތުން ޤައުމީ ޝޫޓިން ޓީމުން މިހާތަނަށް ހޯދި އެންމެ ފުރިހަމަ ކާމިޔާބީއެވެ. އަދި މިއީ ޝޫޓިން ސްޕޯޓްއިން ރާއްޖޭގެ އެތުލީޓުން ކުރިއަރަމުން އަންނަކަމުގެ އަލިގަދަ ހެއްކަކަށްވާއިރު އެސޯސިއޭޝަނުގެ އަމާޒަކީ ކުރިއަށް އޮތް ސައުތު އޭޝިއަން ގޭމްސްގައި ވާދަކޮށް ޤައުމަށް ރަންވަނަތަކެއް ހޯދައިދިނުންކަމަށް ޓީމުންވަނީ ބުނެފައެވެ.