އަންނަ އާދިއްތަ ދުވަހު ފަށާ މި އަހަރުގެ ފުރަތަމަ ގްރޭންޑް ސްލޭމް މުބާރާތް ކަމަށްވާ އޮސްޓްރޭލިއަން އޯޕަން ޓެނިސް މުބާރާތުގައި ވާދަކުރުމަށް ނޯވަކް ޖޮކޮވިޗް، އޭނާގެ ޒަމާންވީ ވާދަވެރިޔާ އަދި އައު ކޯޗު އެންޑީ މަރީއާއެކު ފަރިތަކުރުންތައް ފަށައިފިއެވެ.
މެލްބަންގައި މި ދެ ކުޅުންތެރިން ފަރިތަކުރުންތައް ފަށާފައިވާއިރު، މިއީ ގިނަ ބަޔަކަށް ލިބުނު ހައިރާންކަމެކެވެ. ސަބަބަކީ އިނގިރޭސި ޓެނިސް ތަރި މަރީއަކީ މީގެ ކުރިން ޖޮކޮވިޗްގެ އެންމެ ބޮޑު އެއް ވާދަވެރިޔާ ކަމަށް ވުމުންނެވެ. މަރީ ވަނީ މިދިޔަ އަހަރު ފްރާންސްގެ ވެރިރަށް ޕެރިހުގައި ބޭއްވި އޮލިމްޕިކް ގޭމްސްއަށްފަހު ޓެނިސް ކުޅުން ހުއްޓާލައި، ރިޓަޔާކުރިކަން އިއުލާންކޮށްފައެވެ. އަދި މިދިޔަ އަހަރުގެ ނޮވެމްބަރު މަހުގެ ފަހުކޮޅު ޖޮކޮވިޗް ވަނީ އޭނާގެ ކޯޗުކަމަށް މަރީ ހަމަޖެއްސިކަން އިއުލާންކޮށްފައެވެ.
މަރީގެ ކޯޗުކަމުގެ ދަށުން ޖޮކޮވިޗް ފަރިތަކުރަމުން އަންނަނީ 11 ވަނަ އޮސްޓްރޭލިއަން ޓައިޓަލް އާއި، ތާރީޚީ 25 ވަނަ ގްރޭންޑް ސްލޭމްގެ ތާޖު ދިފާއުކުރުމުގެ އަމާޒުގައެވެ.
37 އަހަރުގެ މި ދެ ޓެނިސް ތަރިން ވަނީ ހަތް ފަހަރެއްގެ މަތިން ގްރޭންޑް ސްލޭމް މުބާރާތްތަކުގައި ވާދަކޮށްފައެވެ. ޖޮކޮވިޗްގެ ޒަމާންވީ ކޯޗު ގޯރަން އިވެނިސްވިޗް މަގާމު ދޫކޮށްލީ ހަ އަހަރަށްފަހު އޮފް-ސީޒަންގައި މިދިޔަ އަހަރުގެ މާޗް މަހުގެ ތެރޭގައެވެ. އަދި އޭނާގެ ކޯޗުކަމުގެ ދަށުން ޖޮކޮވިޗަށް 24 ފަހަރު ގްރޭންޑް ސްލޭމް މުބާރާތް ވަނީ ކާމިޔާބުކޮށްދީފައެވެ. ކްރޮއޭޝިއާގެ ގޯރަން އަކީ 2018 ވަނަ އަހަރުން ފެށިގެން ޖޮކޮވިޗަށް ކޯޗު ކޮށްދެމުން އަދި ކާމިޔާބު ކޯޗެކެވެ.
އަންގާރަ ދުވަހު މަރީއާއެކު ޖޮކޮވިޗް ފަރިތަކުރުންތައް ފަށާފައިވާއިރު، މިއީ ދުނިޔޭގެ ޗެމްޕިއަން މަރީ ރިޓަޔާކުރުމަށްފަހު ކޯޗެއްގެ ދައުރު އަދާކުރާ ފުރަތަމަ ފަހަރެވެ.