މިއަހަރު ރާއްޖޭގައި އޭޝިއަން ޓެނިސް ފެޑެރޭޝަންގެ ދެ މުބާރާތެއް ބޭއްވުމަކީ އަމާޒެއް ކަމަށް ޓެނިސް އެސޯސިއޭޝަންގެ ނައިބު ރައީސް އިގްނާޒް މަންސޫރު ވިދާޅުވެއްޖެއެވެ.
ޕީއެސްއެމް "ކުޅިވަރު ވިންދު" ޕްރޮގްރާމްގައި ވާހަކަދައްކަމުން އިގްނާޒް ވިދާޅުވީ އޭޓީއެފް ފެންވަރުގެ ބައިނަލްއަގުވާމީ މުބާރާތެއް ރާއްޖޭގައި ބޭއްވުމަކީ ކަޑައްތުކުރެވުނު ވަރަށް ބޮޑު ފިޔަވަޅެއް ކަމަށެވެ. އިގްނާޒް ވިދާޅުވީ އެންމެ ބޮޑު ޓާގެޓަކީ އައިޓީއެފް މުބާރާތެއް ރާއްޖޭގަ ބޭއްވުން ކަމަށެވެ.
އިގްނާޒް ވިދާޅުވީ އޭޓީއެފް ބާއްވަނީ ހަތަރު ކޯޓު އޮވެގެން ކަމަށާއި އަދި އައިޓީއެފް ބޭއްވޭނީ މަދުވެގެން ފަސްކޯޓު އޮވެގެން ކަމަށެވެ. އުންމީދަކީ ކައިރި މުސްތަގުބަލެއްގައި އެކަން ހާސިލުކުރުން ކަމަށް އިގްނާޒް ވިދާޅުވިއެވެ.
"ހުޅުމާލޭގައި ޓެނިސް ކޮންޕްލެކްސް އެއް މިއަހަރު ނިމިގެންދާނެ، ދެން އެތަން ނިމިގެންދާއިރު އަޅުގަނޑުމެންނަށް ޗާންސް ލިބިގެންދާނެ އޭޓީއެފްއަށް ވުރެ ބޮޑެތި މުބާރާތްތައް ބާއްވަން" އިގްނާޒް ވިދާޅުވިއެވެ.
މި ފަހަރުގެ މުބާރާތް ބޭއްވުނީ ވަރަށް ގިނަބަޔެއްގެ އެހީތެރިކަމާއެކު ކަމަށް އިގްނާޒް ފާހަގަކުރިއެވެ. އަދި މީގެއިތުރުން ކާމިޔާބު މުބާރާތަކަށް މުބާރާތް ހެދުމަށް މުބާރާތުގައި މަސައްކަތްކުރި ވޮލެންޓިއަރުން ގިނަކަންވެސް އިގްނާޒް ފާހަގަކުރިއެވެ.
މުބާރާތް ބާއްވަން ޓެނިސް އެސޯސިއޭޝަނުން މަސައްކަތް ކުރަމުން އަންނަނީ ޖުލައި އަދި އޯގަސްޓު މަހުގައެވެ.