ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ކުރިއަށްގެންދާ ގައުމީ ވޮލީބޯލް ޗެމްޕިއަންޝިޕް 2024 ގެ ފައިނަލްގެ ފަހު ޖާގަ ދިވެހި ސިފައިންގެ ކުލަބުން ހޯދައިފިއެވެ.
މި ފަހަރުގެ ގައުމީ މުބާރާތުގައި ވާދަކުރަނީ މި ފަހުން ނިމުނު ގައުމީ ވޮލީބޯލް ލީގު 2024 ގެ ގަދަ ހަތަރު ޓީމެވެ. އެއީ ސިފައިންގެ ކުލަބުގެ އިތުރުން ކުލަބު އެޗްޑީސީ އާއި، ސްޕޯޓްސް ކުލަބު ސިޓީ އަދި ބްލޫސް ފޯރ ވޮލީބޯލްއެވެ.
ސިފައިންގެ ކުލަބުން ފައިނަލުގެ ފަހު ޖާގަ ހޯދީ މިރޭ ކުޅުނު ސެމީ ފައިނަލް މެޗުގައި ފަސޭހަކަމާއެކު ސީދާ ތިން ސެޓުން ސްޕޯޓްސް ކުލަބު ސިޓީ ބަލިކުރުމަށްފަހުއެވެ. މި މެޗުގެ ފުރަތަމަ ދެ ސެޓުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި ދެ ސެޓު ސިފައިންގެ ކުލަބުން ކާމިޔާބުކޮށްފައިވަނީ 25-22 އަދި 25-22 އިންނެވެ. އެކަމަކު ތިންވަނަ ސެޓުގައި ސްޕޯޓްސް ކުލަބު ސިޓީގެ ފަރާތުން އާދައިގެ ކުޅުމެއް ފެނިގެންދިޔައިރު، މި ސެޓު ސިފައިންގެ ކުލަބުން ގެންގޮސްފައިވަނީ 25-15 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ސިފައިންގެ ކުލަބުގެ ހުސައިން ރަޒާންއެވެ.
މި މޮޅާއެކު ފައިނަލުގެ ޖާގައެއް ސިފައިންގެ ކުލަބުން ހޯދިއިރު، ފައިނަލުގައި އެ ޓީމު ނުކުންނާނީ އެޗްޑީސީއާ ދެކޮޅަށެވެ. ފައިނަލަށް އެޗްޑީސީ ދަތުރުކޮށްފައިވަނީ ގައުމީ މުބާރާތުގެ ލީގު ބުރުގެ އެއްވަނަ ޓީމުގެ ހައިސިއްޔަތުންނެވެ. މި ދެ ޓީމު އެންމެ ފަހުން ބައްދަލުކޮށްފައިވަނީ ލީގު ބުރުގެ ފަހު މެޗުގައެވެ. އެ މެޗު ފަހަތުން އަރައި ތިން ސެޓު ދެ ސެޓުން ކާމިޔާބުކޮށްފައިވަނީ ސިފައިންގެ ކުލަބުންނެވެ.
އެކަމަކު މި ފަހުން ނިމިގެންދިޔަ ގައުމީ ލީގުގެ ފަހު މެޗުގައިވެސް މި ދެ ޓީމުގ ވާދަކުރިއިރު، އެ މެޗު ތިން ސެޓު އެއް ސެޓުން ކާމިޔާބުކޮށް، ލީގު ޗެމްޕިއަންކަން ހޯދާފައިވަނީ އެޗްޑީސީންނެވެ.