މ.ލަކީ ހެވަން ގޭގައި ރެނދުއަޅާ އަޑިއަށްދާތީ މީހުން ހުސްކުރަނީ

މ. ލަކީ ހެވަން ގޭގައި ރެނދުއަޅާ އަޑިއަށްދާތީ އެގެއިން މީހުން ހުސްކުރުމުގެ މަސައްކަތް ސިޓީ ކައުންސިލުން ފަށައިފިއެވެ.

މ. ލަކީ ހެވަން ގޭގައި ރެނދު އަޅާ އެ ގެ އަޑިއަށްދަނީ މ. ކެރިންލައިޓް އިމާރާތް ކުރަމުންދިޔަ އިރު ޝީޓް ޕައިލް ނުކޮށް ހުރުމުގެ ސަބަބުންކަމަށް ސިޓީ ކައުންސިލުން ހާމަކުރެއްވިއެވެ.

ސިޓީ ކައުންސިލުން ވިދާޅުވީ މިހާރު އެގެއިން މީހުން އެހެން ތަނަކަށް ބަދަލުކުރުމުގެ މަސައްކަތް ކުރަމުންދާކަމަށެވެ. މިގޭގައި ޖުމްލަ 4 ކޮޓަރީގައި 4 އާއިލާ އަންނަނީ ދިރިއުޅެމުންނެވެ. އަދި މިކޮޓަރިތަކުގައި 18 އަހަރުން ދަށުގެ 3 ކުދިންނާއި 6 މީހުން ދިޔައީ ދިރިއުޅެމުންނެވެ.

ސިޓީ ކައުންސިލުން ވިދާޅުވީ ލަކީ ހެވަން ގޭގައި ކުއްޔަށް ދީފައި ހުންނަ ބައިގައި ބޭރު މީހުންވެސް ދިރިއުޅެމުން އަންނަކަމަށެވެ.