ސްޕެނިޝް ސުޕަކަޕް ފައިނަލް ބެލުމަށް ސައޫދީ އަރަބިއާގެ ކިންގް އަބްދުﷲ ސްޓޭޑިއަމުގައި ތިބޭނެ 65000 މީހުންނާއި ޓީވީން މެޗު ބެލުމަށް އެއްވާނެ އެންމެންގެ ކުރިމައްޗަށް މިރޭ ނުކުންނާނީ ސްޕޭނުގެ އެންމެ ގަދަ ދެ ޓީމެވެ. އެހެން ނަޒަރަކުން ބުނާނަމަ ދުނިޔޭގެ އެންމެ ސަޕޯޓް ބޮޑު ދެ ޓީމެވެ. ރެއާލް މެޑްރިޑަކީ މުބާރާތުގެ އެންމެ ފަހުން ޗެމްޕިއަނެވެ. ބާސެލޯނާ އަކީ މުބާރާތުގެ އެންމެ ކާމިޔާބު ޓީމެެވެ. މިރޭގެ ފައިނަލަށް އެމީހުން ނުކުންނަނީ 15 ވަނަ ފަހަރަށް މި ތަށި އުފުލާލުމަށެވެ.
މި މެޗަކީ މިވަގުތު ދުނިޔޭގައި ތިބި އެންމެ ވިދުންގަދަ ފަސް ކުޅުންތެރިންގެ ތެރެއިން ހަތަރު ކުޅުންތެރިން އެއްތަނަކުން ފެންނާނެ މެޗެވެ. ރެއާލްގެ ބްރެޒިލް ފޯވަޑް ވިނީޝިއަސް ޖޫނިއާ އާއި އިނގިރޭސި މިޑްފީލްޑަރު ޖޫޑް ބެލިންހަމާއި ފްރާންސްގެ ކެޕްޓަން ކީލިއަން އެމްބާޕޭ އާއި ބާސެލޯނާގެ ލަމީން ޔަމީންގެ މާކެޓް އަގު އެއްކޮށްލުމުން 720 މިލިއަން ޔޫރޯ އަރާ ކަމީ ހަގީގަތެކެވެ. މިހެންވެ މިރެ އަކީ ތަރިންގެ ފައިނަލެއްވެސްމެ އެވެ.
ސްޕެނިޝް ސުޕަކަޕް ފުޓްބޯޅަ މުބާރާތަކީ 1982 ވަނަ އަހަރު ވުޖޫދު ކުރި މުބާރާތެކެވެ. އެހެން ގޮތަކަށް ބުނާނަމަ ވާދައިގެ ތައްޓެއް ދެވޭ ފައިނަލް މެޗެކެވެ. ކޮންމެ އަހަރެއްގެ ވެސް ސީޒަން ހުޅުވަން ކުޅޭ މި ފައިނަލުގައި ވާދަކުރަނީ ސްޕެނިޝް ލީގުގެ ޗެމްޕިއަނުންނާއި ސްޕެނިޝް ކަޕުގެ ޗެމްޕިއަނުންނެވެ. އެކަމަކު 1995 ވަނަ އަހަރާ ހަމައަށް މި ދެ މުބާރާތުގެ ތަށި އެއް ޓީމަކުން ހޯދައިފިނަމަ ސުޕަކަޕްގެ ޗެމްޕިއަންކަން ދެމުން ގެންދިޔައީ އެއްވެސް މެޗެއް ކުޅުމެއްނެތި އެވެ. މިގޮތް ކަމުނުގޮސްގެން ބަދަލުކޮށް، ލީގާއި ކަޕް ޗެމްޕިއަންކަން އެއް ޓީމަކުން ހޯދައިފިނަމަ ލީގުގެ ދެ ވަނަ އަށް ދާ ޓީމާ އެކު ސުޕަކަޕްގެ ފައިނަލް މެޗު ކުޅޭ ގޮތަށް ނިންމީ 1996 ވަނަ އަހަރުގެ ސީޒަނާ ހަމައިންނެވެ.
މިހާރުގެ ފޯމެޓަށް ހަތަރު ޓީމު ކުޅޭ މުބާރާތެއްގެ ގޮތަށް ސުޕަކަޕް ބަދަލުކުރީ 2019 ވަނަ އަހަރު އެވެ. އެއީ ސްޕެނިޝް ފެޑަރޭޝަނަށް މާލީ ގޮތުން ގިނަގުނަ ފައިދާތަކެއް ލިބޭ މުބާރާތަކަށް މި މުބާރާތް ބަދަލު ކުރުމަށް ކުރެވުނު މަޝްވަރާތަކަށްފަހު އެވެ. އެއް މެޗުގެ ފައިނަލެއްގެ ގޮތުގައި ކުޅުނު އެންމެ ފަހު ފައިނަލް ކުޅުނީ މޮރޮކޯގެ އިބުނިބަތޫތާ ސްޓޭޑިއަމުގަ އެވެ. ސެވިއްޔާ ބަލިކޮށް އެފަހަރު ތަށި ހޯދީ ބާސެލޯނާއިންނެވެ.
ސައޫދީ އަރަބިއާގެ ހުށަހެޅުންތަކަށް ދީދާލައި ސުޕަ އެ ގައުމުގައި ބާއްވަން ފެށީ މި ހިސާބުންނެވެ. ސައުދީން ދުށް ގޮތުގައި ސްޕޭނުގެ އެންމެ ގަދަ ޓީމުތައް އެ ގައުމަށް ގެނެވިއްޖެނަމަ މިއީ ސައޫދީ އަރަބިއާގެ ފުޓްބޯޅަ ކުރިއަރައިދާން ލިބޭ ރަނުގެ ފުރުސަތަކަށްވާނެ އެވެ. އަދި މިއީ ފުޓްބޯޅައިގެ މަންޒިލެއްގެ ގޮތުގައި ސައޫދީ މާކެޓް ކުރުމަށް ވެސް ލިބޭނެ އެފަދަ ދެވަނައެއްނެތް ފުރުސަތަކަށްވާނެ އެވެ. އޭރު ބާސެލޯނާގައި ހުރި ދުނިޔޭގެ އެއްވަނަ ކުޅުންތެރިޔާ ލަޔޮނަލް މެސީ، ސައޫދީގައި ކުޅޭތަން ދުނިޔެއަށް ދެއްކިއްޖެނަމަ އޭގެ ސަަބަބުން ސައޫދީންގެ ފުޓްބޯޅަ އާއި އެ ގައުމުގެ ފަތުރުވެރިކަން އިސާހިތަކު ފަތުއަޑުކިޔާފައި ހިނގައިގަންނާނެ ކަމެކެވެ.
ފުޓްބޯޅަ އާއި ފަތުރުވެރިކަމުގެ ބޮޑު މަޝްރޫއެއްގެ މި ވިސްނުން އެންމެ ފަހުން ހަގީގަތަކަށްވިއިރު ދުނިޔޭގެ ކޮންމެ ގައުމަކުން ވެސް މިހާރު ތިބީ ސައޫދީ އަރަބިއާ އަށް މަރުހަބާކިޔަން ތައްޔާރަށެވެ. ސްޕޭން މިސާލަކަށް ބަލައި އިޓާލިއަން ސުޕަކަޕް ވެސް ސައުދީގައި ބާއްވަން ފެށީ ވެސް މިހެންވެ އެވެ. ސުޕަކަޕް ކިޔާފައި އެންމެ ތިން މެޗު ކުޅޭ މި މުބާރަތަކީ، ހަގީގަތުގައި މުބާރާތް ނިސްބަތްވާ ގައުމުތަކަށާއި ކުޅޭ ޓީމުތަކަށް މާލީ އެތަކެއް ނަފާއެއް ލިބިދޭ މުބާރާތެކެވެ. ސްޕޭނުގެ ހަތަރު ޓީމާއި ފެޑަރޭޝަނުން ސައޫދީން އެނބުރި ގައުމަށްދާނީ ވެސް ޖުމުލަ 40 މިލިއަން ޔޫރޯ ހިފައިގެންނެވެ.