ޑިމާންޑް ނެތް ހިސާބުތަކަށް އިންވެސްޓްމަންޓް ހޯދުމަށް ޓެކުހާއި ލޭންޑް ރެންޓުން ލުއިދިނުމަށް މަސައްކަތްކުރަނީ

ފަތުރުވެރިކަން ނެތް ހިސާބުތަކަށް ފަތުރުވެރިކަން ގެންދިއުމަށްޓަކާއި ޓެކުހާއި ބިމު ކުލީގެ އަގުތަކުން އެ ސަރަހައްދުތަކަށް ލުއި ދިނުމަށް ޤާނޫނާއި ގަވާއިދުތަކަށް އިސްލާހުތަކެއް ގެނައުމަށް ހުށައެޅުމުގެ މަސައްކަތް ކުރައްވަމުންދާކަމަށް ފަތުރުވެރިކަމާ ބެހޭ ވަޒީރު އިބްރާޙިމް ފައިސަލް ވިދާޅުވެއްޖެއެވެ.

ވަޒީރު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުންނެވެ.

ވަޒީރު އިބްރާޙިމް ފައިސަލް ވިދާޅުވީ ރާއްޖޭގެ ދުރު ހިސާބުތަކަށް ފަތުރުވެރިކަން ފުޅާކުރުމުގައި އޮތް އެންމެ ބޮޑު ގޮންޖެހުމަކީ، ލިބޭ ފައިދާއާއި ނުބައްދަލު އިންވެސްޓްމަންޓްތަކެއް އެ ސަރަހައްދުތަކަށް ކުރަންޖެހުންކަމަށެވެ. ވަޒީރު ވިދާޅުވީ ފަތުރުވެރިކަމާއި ގުޅޭ ޤާނޫނުތަކާއި ޤަވާއިދުތައް މިހާރު ހެދިފައިވާގޮތުން، އެންމެ ޑިމާންޑް ބޮޑު ސަރަޙައްދުތަކުންވެސް އަދި އެންމެ ޑިމާންޑް ކުޑަ، އަދި ފަތުރުވެރިކަމުގެ ވިޔަފާރި ދަށް ހިސާބުތަކުންވެސް، ކުރާ އިންވެސްޓްމަންޓްތަކާއި އަދި ޓެކުސްގެ ގޮތުގައި ދައްކަންޖެހޭ އަދަދުތައްވެސް އޮތީ އެއްހަމައެއްގައިކަމަށެވެ.

މީގެސަބަބުން ޑިމާންޑް ކުޑަ ސަރަޙައްދުތަކުގައި ފަތުރުވެރިކަމުގެ ފެސިލިޓީތައް ހެދުމަށް އިންވެސްޓަރުން ފަސްޖެހޭކަމަށެވެ. އެއީ އެ ސަރަހައްދުތަކަށް ފަތުރުވެރިން ގެންދިއުމަށް ކުރަންޖެހޭ ހޭދަ ބޮޑުވުމާއެކު، ވިޔަފާރީގައި ފައިދާއަކާ ހަމައަށް ދެވޭ މުއްދަތު އިތުރުވާތީކަމަށް ފައިސަލް ވިދާޅުވިއެވެ. ވަޒީރު ވިދާޅުވީ ރިސޯޓެއް ތަރައްޤީކުރުމަށް 45 މިލިއަނެއްގާ ޑޮލަރު ހޭދަކުރާއިރު، ޑިމާންޑް އޮންނަ ސަރަޙައްދުތަކުގައިވެސް އިންވެސްޓްމަންޓްގެ އަގު ހޯދުމަށް 7-8 އަހަރު ނަގާކަމަށެވެ. ނަމަވެސް ޑިމާންޑް ކުޑަ ސަރަޙައްދުތަކުގައި އެ މުއްދަތު ވަރަށް ބޮޑުތަން އިތުރުކަމަށެވެ.

އެހެންކަމުން މިގޮތަށް ހުރި ހިސާބުތަކަށް ފަތުރުވެރިކަން ގެންދިއުމަށް މިވަގުތު ކުރަންޖެހޭ އެންމެ މުހިންމު ކަމެއްގެ ގޮތުގައި ދެކެނީ، މުޅި ރާއްޖެއަށް ރަނގަޅު ކަނެކްޓިވިޓީއެއް ޤާއިމުކުރުމުގެ އިތުރުން، އެފަދަ ސަރަހައްދުތަކުން ފަތުރުވެރިކަމަށް ދޫކުރާ ބިންތަކުން ނަގާ ކުއްޔާއި އަދި ޓެކްސްގެ ގޮތުގައި ދަޢުލަތަށް ދައްކަންޖެހޭ ޚަރަދަށް ލުޔެއް ހޯދައިދިނުންކަމަށް ވަޒީރު ވިދާޅުވިއެވެ. ވަޒީރު ވިދާޅުވީ މި މައްސަލަތަކަށް ޙައްލު ހޯދުމަށް ކުރަންޖެހޭ މަސައްކަތްތައް ކަމާ ގުޅުންހުރި ފަރާތްތަކާއި ގުޅިގެން އެވުޒާރާއިން މިހާރު ކުރައްވަމުންދާކަމަށެވެ.

"ފަތުރުވެރިކަން ނެތް ހިސާބުތަކަށްވެސް އިންވެސްޓްމަންޓްތައް ގެންދިއުމަށް، އެ ހިސާބުގެ ފެސިލިޓީތަކުން ނަގާ ޓެކުހާއި ދައްކާ ރެންޓްތަކަށް ލުއިދިނުމަށް އުސޫލުތައް މިދަނީ ހަދަމުން. އޭގެ ޕޭޕަރުތައް ނިންމާ ވަރަށް އަވަހަށް ކެބިނެޓަށް ހުށައަޅާނަން." ފަތުރުވެރިކަމާ ބެހޭ ވަޒީރު އިބްރާޙިމް ފައިސަލް ވިދާޅުވިއެވެ.

ވަޒީރު ވިދާޅުވީ ޑިމާންޑް ކުޑަ ހިސާބުތަކަށް ފަތުވެރިކަން ގެންދިއުމުގެ ވާހަކަ ކުރީގެ ސަރުކާރުތަކުން ދެއްކިނަމަވެސް މިހާތަނަށްވެސް އެއްވެސް ސަރުކާރަކުން އެކަމަށް ފިޔަވަޅު އަޅާފައި ނެތްކަމަށެވެ. ޚާއްސަކޮށް ރާއްޖޭގެ އެންމެ ދެކުނުން އައްޑޫ ސިޓީ ސަރަޙައްދާ އަދި ރާއްޖޭގެ އެންމެ އުތުރުގެ އަތޮޅުތަކުގައި މިހާތަނަށްވެސް ފަތުރުވެރިކަން ކުރިއަރުވަން ސަރުކާރުތަކުން މާބޮޑު މަސައްކަތެއް ކޮށްފައި ނެތްކަމަށެވެ.

އިންވެސްޓަރުންނަށް ހޯދައިދޭ ލުއިތަކުގެ އިތުރުން، ބައިނަލްއަޤްވާމީ ވައިގެ ދަތުރުފަތުރުތައް އެ ސަރަޙައްދުތަކަށް ފެށުމަށްވެސް މަސައްކަތް ކުރަމުންދާކަމަށް ވަޒީރު ވަނީ ވިދާޅުވެފައެވެ. އަދި
ސަރުކާރުގެ އިންވެސްޓްމަންޓް ފޯރަމްތަކުގައިވެސް އެ ސަރަހައްދުތަކަށް އަމާޒުކޮށް އިންވެސްޓްމަންޓްތައް ހޯދުމަށް މަސައްކަތް ކުރަމުންދާކަމަށް ވިދާޅުވިއެވެ.