ބަލަންޖެހޭ ކަންކަން ބެލުމަށްފަހު ނެރޭނީ 15 ނޮވެމްބަރުގައި ގެޒެޓުކުރި ލިސްޓު: ޑރ.މުއްޠަލިބު

މައްސަލަބޮޑުވެފައިވާ ގެދޮރުވެރިޔާ ސްކީމުގެ ފުލެޓު ލިސްޓުގައި ބަލަންޖެހޭ ކަންކަން ބެލުމަށްފަހު ނެރޭނީ 15 ނޮވެމްބަރު 2023ގައި ނެރުނު ލިސްޓުކަމަށް އިމާރާތްކުމާއި ގެދޮރުވެރިކަމާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވެއްޖެއެވެ. ކުރިއަށް އޮތް ރަމަޟާންމަހުގެ ކުރިން ފްލެޓު ލިސްޓު ނެރޭނެކަމަށް ސަރުކާރުން ވަނީ ހާމަކުރައްވާފައެވެ.

ގެދޮރުވެރިޔާ ސްކީމްގެދަށުން ގޯތި ލިބޭ މީހުންގެ ފައިނަލް ލިސްޓްގެ ގޮތުގައި ނިމުނު ސަރުކާރުން ލިސްޓެއް ނެރެފައިވަނީ ވެރިކަން ނިމެން ދެ ދުވަހަށް ވެފައިވަނިކޮށް 15 ނޮވެމްބަރު 2023 ގައެވެ. ގެދޮރުވެރިޔާ ސްކީމަށް ފޯމު ހުށައެޅި 20000އަށްވުރެ ގިނަ މީހުންގެ ތެރެއިން، ޝަރުތުހަމަވާކަމަށް ނިންމި 15000 އެއްހައި މީހުންނަށް ފްލެޓް ދޭނަކަމަށް އޭރު ސަރުކާރުން ވިދާޅުވިނަމަވެސް ނެރެފައިވަނީ، އޭރު އިމާރާތްކުރަން ފަށާފައިވާ 4000 ފްލެޓް ދޭނެ މީހުންގެ ލިސްޓެއް އެކަންޏެވެ.

ވަޒީރު ޑރ.މުއްޠަލިބު ވިދާޅުވީ ސަރުކާރުން މިވަގުތު ކުރަމުން މިދާ މަސައްކަތަކީ، 4000 ޔުނިޓަށް ހޮވުނުކަމަށް ނެރުނު ލިސްޓުގައި ހިމެނޭމީހުންނަކީ، ޝަރުތު ހަމަވާ މީހުންތޯ ނުވަތަ ނޫންތޯ ބަލައި އެ ފަރާތްތަކަށް އެކަން އެންގުމަށް ކުރިއަށްގެންދާ ރިވިއު ޕްރޮސެސްއެއްގެ މަސައްކަތްކަމަށެވެ. މި މަރުޙަލާގައި ބަލަމުންދަނީ ހަމައެކަނި 4000 ޔުނިޓަށް ހޮވުނުކަމަށް ކުރީސަރުކާރުން ހާމަކުރައްވާފައިވާ މީހުންގެ ފޯމުތައްކަމަށްވެސް ވަޒީރު ވިދާޅުވިއެވެ.

ވަޒީރު ވިދާޅުވީ މިމަސައްކަތުގައި ބަލާނީވެސް މިސްކީމަށް ހުޅުވާލުމަށްފަހު ފޯމު ހުށަހެޅުމަށް ދިން މުއްދަތުގައި، ހުށަހެޅި ލިޔެކިޔުންތަކަށް އެކަނިކަމަށެވެ. ޝަކުވާ ހުށައެޅުމުގެ މަރުޙަލާއަކީ އިތުރަށް ލިޔެކިއުންތައް ހުށަހަޅަން ފުރުސަތު ދެވޭނެ މަރުޙަލާއެއް ނޫންކަމަށާ، އެހެންކަމުން ޝަކުވާގެ މުއްދަތުގައި ހުށައެޅި ލިޔެކިޔުންތަކަށް ނުބެލުމަށް ވަނީ ނިންމާފައިކަމަށް ވަޒީރު ވިދާޅުވިއެވެ.

ރިވިއު ޕްރޮސެސްއަށްފަހު އާއްމުކުރާ ލިސްޓުގައި، 4000 ޔުނިޓްގައި ހިމެނުނު މީހުންގެ ފޯމަށް މާސްކްސް ދިނުމުގައި މައްސަލަ ހުރިނަމަ އެކަން، ނުވަތަ ނޫންކަމަށް އެފަރާތްތަކަށް އެނގޭނެކަމަށް ވަޒީރު ވިދާޅުވިއެވެ. އަދި މައްސަލަ ހުރި ފޯމުތަކުގައި، އެ ހުރި މައްސަލަތަކުގެ ތަފްސީލްތައް ލިސްޓުގައި އެމީހެއްގެ ނަމާ ދިމާގައި އެނގެން އޮންނާނެކަމަށްވެސް ވަޒީރު ވިދާޅުވިއެވެ.

"މި ޕްރޮސެސްގައި މި ބަލަނީ ފޯމު ހުށައެޅި ހުރިހާ ފޯމަކަށް ނޫން. މިއުޅެނީ ބަލަން، މި 4000 މީހުންގެ ތެރެއިން ފްލެޓް ކަށަވަރުވާ މީހުންނަކީ ކޮބައިތޯ. ފޯމާއި މާކްސް ދިނުމުގައި މައްސަލަ ހުރީ ކޮންބައެއްގެކަން. 4000 ފްލެޓް ލިސްޓުގައި ހިމެނޭ މީހުންނަށް ފްލެޓް ކަށަވަރުވުމާގުޅޭގޮތުން ޖަވާބެއް ލިބޭނެ މި ރިވިއު ޕްރޮސެސްއިން." ވަޒީރު ޑރ.ޢަބްދުﷲ މުއްޠަލިބު ވިދާޅުވިއެވެ.

އެހެންކަމުން މި ޕްރޮސެސް ނިމޭއިރު، އަސްލު ލިސްޓުގައި ހިމެނޭ މީހުންގެ ތެރެއިން ފްލެޓަށް ޝަރުތު ހަމަވަނީ ކޮންބައެއްކަން އަދި ނުވާމީހަކު ބަޔަކު ވާނަމަ އެބަޔަކީ ކޮބައިކަން ސާފުކޮށް އެނގޭނެއެވެ. ވަޒީރު ވިދާޅުވީ މިފަހަރުވެސް ފުރަތަމަ ނެރެނީ ވަގުތީ ލިސްޓެއްކަމަށެވެ. ދާއިމީ ލިސްޓު ނެރެނީ ޝަކުވާ ހުށަހަޅަން ފުރުޞަތެއް ދިނުމަށްފަހު ކަމަށެވެ.

ނަމަވެސް ފުރަތަމަ އޮތް އުސޫލުގައި "މާލޭގައި ދިރިއުޅުނު މުއްދަތު"ކަމަށް މާނަކުރުމުގައި ތަފްސީލްތައް ނުހިމެނޭތީ އެބަޔަށް ވަނީ ބައެއް ބަދަލު ގެނެސްފައެވެ. ކުރިން އޮތްގޮތުންނަމަ، މަޖުބޫރު ޙާލަތަކާ ގުޅިގެންވެސް މާލޭގައި ދިރިއުޅުން ނުވަތަ ނިދައި ކައިބޮއިހެދުން ކިތަންމެ ކުޑަ މުއްދަތަކަށް މެދުކެނޑުނުނަމަވެސް، ޝަރުތު ހަމަނުވެއެވެ. ނަމަވެސް މި އުސޫލަށް ބަދަލުގެނެސް، ބޭސްފަރުވާއަށް ނުވަތަ ތައުލީމާއި ވަޒީފާގެ ބެނުމަކަށް ނުވަތަ މިނޫންވެސް، ވަކި ޚާއްސަ ހާލަތެއްގެ ސަބަބުން މާލޭގައި އުޅެފައިވާ މުއްދަތަށް އެއް އަހަރު ދުވަސް ނުވަތަ އެއަށްވުރެ ކުރު މުއްދަތެއްގެ މެދުކެނޑުމެއް އަޔަސް، އެއީ މެދުކެނޑުމެއް ކަމަށް ނުބެލުމަށް ނިންމާފައިވާކަމަށް ވަޒީރު ވަނީ ވިދާޅުވެފައެވެ.

މިކަމުގައިވެސް ދިރިއުޅުގެ މުއްދަތާ ގުޅޭގޮތުން ކައުންސިލްތައް މެދުވެރިކޮށް ހޯދާފައިވާ އެކިކަހަލަ ލިޔެކިޔުންތައް ބަލައިނުގަތުމަށް، އޮޑިޓަރ ޖެނެރަލާއި އޭސީސީގެ ލަފަޔާއެކު ވަނީ ނިންމާފައެވެ. ސަބަބަކީ ކައުންސިލްތަކީ މީހުން ދިރިއުޅޭ ގޮތާއި މުއްދަތާއި ތަންތަން ހިމެނޭ މަޢުލޫމާތުގެ ރެކޯޑު ބަލަހައްޓާ އިދާރާތަކަށް ނުވާތީއެވެ.

ވަޒީރު ވިދާޅުވީ ޝަރުތުހަމަނުވެގެން ލިސްޓުން އުނިކުރުމުގެ ސަބަބުން ހުސްވާ ހައުސިން ޔުނިޓްތަކަށް އަލުން މީހުން ހޮވާނެ ގޮތެއް ކަނޑައަޅާނީ ފަހުގެ މަރުހަލާއެއްގައިކަމަށެވެ. މިވަގުތު އިސްކަންދެނީ މި 4000 ޔުނިޓް ލިބުނު ލިސްޓުގައި ހިމެނޭ މީހުންނަށް ޖަވާބެއް ދިނުމަށްކަމަށެވެ.