6 އަަހަރުގެ މެދުކެނޑުމަކަށްފަހު ދިވެހިރާއްޖޭގެ އަޑުގެ ޑުރާމާ މުބާރާތް މިއަހަރު

ޕަބްލިކް ސަރވިސް މީޑިޔާގެ ދަށުން ހިންގާ ދިވެހިރާއްޖޭގެ އަޑުގެ 7 ވަނަ ރޭޑިޔޯ ޑުރާމާ މުބާރާތް އިފްތިތާޙުކޮށްފިއެވެ.

"ކުލަވަރު" ނަމުގައި މީގެކުރިން ދިވެހިރާއްޖޭގެ އަޑުން ބާއްވަމުންދިޔަ މުބާރާތް މިފަހަރު ބާއްވަނީ ޕީއެސްއެމް ރޭޑިޔޯ ޑްރާމާ މުބާރާތް ނަމުގައެވެ. މި މުބާރާތް އެންމެފަހުން ބާއްވާފައިވަނީ 2018 ވަނަ އަހަރުއެވެ.

މިއަހަރުގެ ރަމަޟާންމަހާއި ދިމާކޮށް ގެނެސްދިނުމަށް ހަމަޖެހިފައިވާ ދިވެހިރާއްޖޭގެ އަޑުގެ ރޭޑިޔޯ ޑުރާމާ މުބާރާތް އިފްތިތާޙުކޮށްދެއްވީ އެކަމަށްޓަކައި ބޭއްވި ހާއްސަ ރަސްމިއްޔާތެއްގައި ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމެވެ.

ވަޒީރު އާދަމް ނަޞީރު ވިދާޅުވީ ދިވެހިރާއްޖޭގެ އަޑުގެ ޕްރޮގްރާމްތަކާއި ޑްރާމާތަކަކީ މުޖްތަމަޢުއަށް ފައިދާތަކެއްކުރާ ކޮންޓެންޓްތަކެއްކަމަށެވެ. އަދި މި މުބާރާތަށްވެސް އެފަދަ ޑްރާމާތަކެއް ހުށަހަޅާނެކަމަށް އުއްމީދުކުރައްވާކަމަށް ވަޒީރު ވިދާޅުވިއެވެ.

މި ރަސްމިއްޔާތުގައި ވާހަކަދައްކަވަމުން ޕީއެސްއެމްގެ ޗެއަރޕާސަން އައިމިނަތު ނަމްޒާ ވިދާޅުވީ ޢާންމުންގެ މަޤުބޫލުކަން ލިބިފައިވާ ޕްރޮގުރާމްތައް ދިވެހިރާއްޖޭގެ އަޑުން އަބަދުވެސް ގެނެސްދޭ ކަމަށެވެ. އެގޮތުން މިފަހަރު އަޑުން ގެނެސްދޭ ޑުރާމާ މުބާރާތައްވެސް ޢާންމުންގެ ބޮޑު މަޤުބޫލުކަމެއް ލިބޭނެކަމަށް އުންމީދުކުރައްވާކަމަށް ނަމްޒާ ވިދާޅުވިއެވެ.

"އަޑުގެ ޕްރޮގުރާމްތަކުގެ ވާހަކަދައްކާއިރު، އެއީ ވަހާކައެއް ވިޔަސް، ޑުރާމާއެއްވިޔަސް އަޑުގެ ކޮންމެ އުފެއްދުމަކީ އެހުންތެރިންގެ އިޙުސާސްތަކާ ކުޅެލާ ކަހަލަ އުފެއްދުމެއް. އަދި އާދައިގެ ޑުރާމާއެއްގެ އަޑުތަކުން ގެނެސްދޭ އިޙުސާސްތަކަށްވުރެ ރޭޑިޔޯ ޑުރާމާއަކުން ގެންނަ އިހްސާސްތައް މާ އަސަރު ގަދަ" ނަމްޒާ ވިދާޅުވިއެވެ.

ޕަބްލިކް ސަރވިސް މީޑިޔާ، ޕީއެސްއެމްގެ މެނޭޖިން ޑިރެކްޓަރ އިބްރާހިމް ނަޞްރީން ވިދާޅުވީ ރޭޑިޔޯ ޑުރާމާއަކީ ވަރަށް ދުވަސްވީ ފަންނެއް ކަމަށާއި ރޭޑިޔޯ ޑުރާމާތައް މެދުވެރިކޮށް މުޖުތަމަޢުގައި ހުންނަ ބޮޑެތި މައްސަލަ ހައްލުކުރަން މުހިންމު މެސެޖުތަކެއް ދެވޭކަމަށެވެ. އެހެންކަމުން ރާއްޖޭގައި ހުރި ޒަމާންވީ މައްސަލަތަކާމެދު ރައްޔިތުން ހޭލުންތެރިކުރެވޭނެގޮތަށް މިއަހަރު ހުށައަޅާ ޑުރާމާތައް ބައްޓަންކުރުން މުހިންމުކަމަށް ނަޞްރީން ވިދާޅުވިއެވެ.

"މުހިންމު މެސެޖުތަކެއް އެބަހުރިި ޑުރާމާތައް މެދުވެރިކޮށް ފޯރުކޮށްދީފައި. މުޖުތަމަޢަށް ބޭނުންވާ މެސެޖުތައް ދިނުމަށް ސީދާ ގޮތުންނާއި ނުސީދާ ގޮތުން ބޭނުންކުރެވޭ އެއްޗެއް ޑުރާމާއަކީ" ނަޞްރީން ވިދާޅުވިއެވެ.

ނަސްރީން ވިދާޅުވީ ޕީއެސްއެމްގެ ކޮންޓެންޓްތައް އިތުރަށް ރަނގަޅުކުރުމަށްޓަކައި ކޮންޓެންޓުތަކުގައި ދިވެހިވަންތަ ގޮތް ހިމެނުމަށްވެސް މަސައްކަތްކުރައްވަމުން ގެންދަވާކަމަށެވެ.

ދިވެހިރާއްޖޭގެ އަޑުން ކުރިއަށްގެންދާ ޑްރާމާ މުބާރާތުގައި ދައުލަތުގެ އިދާރާތަކާއި އަމިއްލަ އޮފީސްތަކާއި ޖަމިއްޔާތަކާއި ސްކޫލް، ކޮލެޖް، ޔުނިވަރސިޓީތަކުގެ އިތުރުން ކުންފުނިތަކަށްވެސް ބައިވެރިވެވޭނެއެވެ.

ކުލަވަރު ޑްރާމާ މުބާރާތުގައި ވާދަކުރުމުގެ ފުރުޞަތު ހުޅުވާލާފައިވާއިރު މި މުބާރާތުން 1 ވަނައަށްދާ ޑުރާމާއަކަށް 20،000 ރުފިޔާގެ އިނާމެއް ވަނީ ހުށައަޅާފައެވެ. އަދި ދެވަނައަށްދާ ޑުރާމާއަކަށް 15،000 ރުފިޔާ، 3 ވަނައަށްދާ ޑުރާމާއަކަށް 10،000 ރުފިޔާ ވަނީ ހުށައަޅާފައެވެ. މި އިނާމުތަކުގެ އިތުރުންވެސް ފާހަގަކޮށްލެވޭ އެހެން ކަންކަމަށްވެސް އިނާމު ދިނުމަށް ހަމަޖެހިފައިވެއެވެ.

މި މުބާރާތުގައި ވާދަކުރުމުގެ ހުށެހެޅުމުގެ ސުންގަޑިއަކީ މިމަހުގެ 23 ވާ ބުރާސްފަތި ދުވަހުގެ މެންދުރުފަހު 3:00 އެވެ. މުބާރާތުގައި ބައިވެރިވުމަށް ޕީއެސްއެމް ޓީވީ ބިލްޑިންގެ ކައުންޓަރަށާއި ޕީއެސްއެމްގެ މެއިލްއަށް ސިޓީ ހުށައެޅޭނެއެވެ. އަދި މި މުބާރާތުގެ ގަވާއިދު ޕީއެސްއެމްގެ ވެބްސައިޓުން ޑައުންލޯޑްކުރެވޭނެއެވެ.