ރާއްޖެއާއި އެސްޓޯނިއާއާ ދެމެދު ޕޮލިޓިކަލް ކޮންސަލްޓޭޝަނާއި ގުޅޭ އެއްބަސްވުމެއް

ޕޮލިޓިކަލް ކޮންސަލްޓޭޝަންސް ބޭއްވުމަށް ދިވެހިރާއްޖެއާއި އެސްޓޯނިއާގެ ސަރުކާރާއި ދެމެދު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގެ ދަށުން މުސްތަގުބަލުގައި ހުޅުވާލެވިފައިވާ އަދި ދެމިގެންދާގޮތަށް މަޝްވަރާތައް ބޭއްވުމަށާއި، ސަރަޙައްދީ އަދި ބައިނަލްއަޤްވާމީ މައްސަލަތަކާ ބެހޭގޮތުން އެ މަޝްވަރާތަކުގައި ވާހަކަދެއްކުމަށް މަގުފަހިވެގެންދާނެއެވެ. މީގެއިތުރުން ދެ ޤައުމުގެ ދާއިމީ މިޝަންތަކާއި ދުނިޔޭގެ އެކި ކަންކޮޅުތަކުގައި ގާއިމުކުރެވިފައިވާ ދެޤައުމުގެ އެމްބަސީތައް ގުޅިގެން ދެ ޤައުމުގެ މަސްލަހަތު ހިމެނޭ ކަންކަމުގައި ގާތުން މަސައްކަތްކުރުމަށްވެސް މި އެއްބަސްވުމުގައި ހިމެނެއެވެ. އަދި، ދެ ޤައުމަށް ހައްސާސް ކަންކަމުގައި މަޝްވަރާ ކުރުމުގައި ޖޮއިންޓް ވަރކިންގ ގްރޫޕްތައް އެކުލަވާލުމަށް މި އެއްބަސްވުމުން މަގުފަހިވާނެކަމަށް ދިވެހި ޚާރިޖިއްޔާއިން މަޢުލޫމާތުދެއްވައެވެ.

މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ޚާރިޖީ ވަޒީރު ޑރ. ޢަބްދުﷲ ޚަލީލެވެ. ޚާރިޖީ ވުޒާރާއިން ވިދާޅުވީ މި އެއްބަސްވުމަކީ ދެ ޤައުމުގެ ދެމެދުގައި ގާއިމުވެފައިވާ ޚާރިޖީގުޅުން އިތުރަށް ހަރުދަނާކުރުމަށް އެޅުނު މުހިއްމު ފިޔަވަޅެއްކަމަށެވެ.

ދިވެހިރާއްޖެއާއި އެސްޓޯނިއާއާ ދެމެދު ޚާރިޖީ ގުޅުން ގާއިމުކުރެވުނީ 22 މާރިޗު 1994 ގައެވެ.