މޯލްޑިވިއަނުން ޗައިނާއަށް ކުރާ ސީދާ ދަތުރުތަކަށް ފުރަތަމަ 2 ހަފްތާގައި ޚާއްސަ ފެއަރއެއް
-
ދަތުރުކުރަން ހަމަޖެހިފައިވާ ތިން މަންޒިލަކީ ޗައިނާގެ ޝެންހާއި، ޗެންގްޑޫ އަދި ބެއިޖިން
-
ފުރަތަމަ ދަތުރު ކުރަން ހަމަޖެހިފައިވަނީ މި ޖަނަވަރީ މަހުގެ 22 ވަނަ ދުވަހު ޗެންގްޑޫއަށް
ޤައުމީ އެއަރލައިން، މޯލްޑިވިއަންއަށް އަލަށް ގެނައި ވައިޑް ބޮޑީ މަތިންދާ ބޯޓުން ޗައިނާއަށް ކުރާ ސީދާ ދަތުރުތަކަށް ފުރަތަމަ 2 ހަފްތާގައި ޚާއްސަ ފެއަރއެއް ތަޢާރަފްކޮށްފިއެވެ.
ޤައުމީ އެއަރލައިން، މޯލްޑިވިއަންގެ ޚިދުމަތަށް ފުރަތަމަ ފަހަރަށް ގެނައި ވައިޑް-ބޮޑީ މަތިންދާ ބޯޓުން
ފުރަތަމަ ދަތުރުތައް ފަށަނީ ޗައިނާގެ ތިން ސިޓީއަކަށެވެ. އެއީ ޗައިނާގެ ޝެންހާއި، ޗެންގްޑޫ އަދި ބެއިޖިންއެވެ. މިތިން ސިޓީއަށް ހަފްތާއަކު ތިން ދަތުރުކުރުމަށް ކަނޑައަޅާފައިވާކަމަށް މޯލްޑިވިއަނުން ވިދާޅުވިއެވެ.
ވައިޑް-ބޮޑީ މަތިންދާ ބޯޓުގެ ފުރަތަމަ ދަތުރު ކުރަން ހަމަޖެހިފައިވަނީ ޗެންގްޑޫއަށެވެ. އެގޮތުން ޗެންޑޫއަށް މިމަހުގެ 22 އަދި 30ވަނަ ދުވަހު ސީދާ ދަތުރުތައް ކުރާނެއެވެ. އަދި މިމަހުގެ 24 އާއި ފެބުރުއަރީ މަހުގެ 1 ވަނަ ދުވަހު ބެއިޖިންގްއަށް އަދި މިމަހުގެ 27 ވަނަ ދުވަހާއި ފެބުރުއަރީ މަހުގެ 4 ވަނަ ދުވަހު ޝަންގްހާއީއަށް ދަތުރު ކުރުމަށް ވަނީ ހަމަޖެހިފައެވެ. މިސިޓީތަކަށް ދަތުރުތައް ފެށުމުގެ ގޮތުން ޚާއްސަ ފެއަރއެއް މޯލްޑިވިއަނުން ވަނީ ތަޢާރަފްކޮށްފައެވެ.
ދަތުރުތަކަށް މޯލްޑިވިއަނުން ކަނޑައަޅާފައިވާ އަގުތައް:
* މާލެ - ޗެންގްޑޫ ދަތުރަށް 688 ޑޮލަރު (ދެކޮޅު ޓިކެޓް)
* މާލެ - ބެއިޖިންގ ދަތުރަށް 788 ޑޮލަރު (ދެކޮޅު ޓިކެޓް)
* މާލެ - ޝަންހާއީ ދަތުރަށް 777 ޑޮލަރު (ދެކޮޅު ޓިކެޓް)
މޯލްޑިވިއަނުން ވިދާޅުވީ މި ހުރިހާ ޕްރޮމޯޝަނަލް އަގުތަކުގައިވެސް 40 ކިލޯގެ ލަގެޖާއި، ކެއުމުގެ ޕެކޭޖެއް ހިމަނާފައިވާކަމަށެވެ. އަދި މިފެއަރ ހަމަޖައްސާފައިވަނީ މިތިން ސިޓީއަށްވެސް ކުރާ ފުރަތަމަ ދެދަތުރަށެވެ. އަދި މިއީ ފަސިންޖަރުންނަށް ފަސޭހަކަމާއެކު، ހިތްފަސޭހަ ދަތުރެއް ކުރެވޭނެކަމުގެ ޔަޤީންކަން އެރުވުމުގެ ގޮތުން ހަމަޖައްސާފައިވާ ޚާއްޞަ ފެއަރއެއް ކަމަށް މޯލްޑިވިއަނުން ހާމަކުރެއެވެ.
މޯލްޑިވިއަންއިން ޗައިނާގެ މާކެޓަށް ޚިދުމަތް ފުޅާކުރުމަކީ، ބައިނަލްއަޤްވާމީ ގުޅުންތައް ހަރުދަނާކޮށް، ދިވެހިރާއްޖޭގެ ފަތުރުވެރިކަން ކުރިއެރުވުމަށް އަމާޒުކޮށްގެން ކުރެވޭ މަސައްކަތެކެވެ. އަދި މި މަސައްކަތަކީ ދިވެހިރާއްޖެއާއި ޗައިނާއާ ދެމެދު ފަތުރުވެރިކަމުގެ ގުޅުން އިތުރަށް ހަރުދަނާކުރުމަށް އެޅޭ އެންމެ މުހިންމު ފިޔަވަޅެއް ކަމުގައި މޯލްޑިވިއަނުން ފާހަގަކުރެއެވެ.
ޗައިނާއަށް ދަތުރުތައް ކުރުމަށް ހަމަޖެހިފައިވާ ވައިޑް ބޮޑީ މަތިންދާބޯޓުގައި ތިން ކެބިން ކްލާސް ހިމެނެއެވެ. އެއީ 18 ބިޒްނަސް ކްލާސްގެ ގޮނޑިއާއި، 36 ޕްރިމިއަމް އިކޮނޮމީ ކްލާސް ގޮނޑީގެ އިތުރުން 210 އިކޮނޮމީ ކްލާސް ގޮނޑިއެވެ. އަދި މި މަތިންދާބޯޓަކީ ޖުމްލަ 264 މީހުންގެ ޖާގައިގެ މަތިންދާ ބޯޓެކެވެ.