ސްޕެއިނުގެ ގައުމީ ފުޓްބޯޅަ ޓީމުގެ ކޯޗު ލުއިސް ޑެ ލަ ފުއެންޓޭގެ އެއްބަސްވުން އައުކުރަން ނިންމައިފިއެވެ.
މިދިޔަ އަހަރުގެ ޔޫރޯ ފުޓްބޯޅަ މުބާރާތް ސްޕެއިނަށް ކާމިޔާބުކޮށްދިން ކޯޗުގެ އެއްބަސްވުން އާކުރަން ނިންމާފައި ވަނީ އެކަން ނުކޮށްގެން އޭނާ ވަރަށް ބޮޑަށް ހިތްހަމަނުޖެހިފައި ހުރި ވަގުތެއްގައެވެ. ސަބަބަކީ އޭނާގެ އެއްބަސްވުމުގައި ހާސިލްކުރަން ޖެހިފައިވާ ހުރިހާ ކަމެއް ވެ ނިމިފައިވާއިރުވެސް، އައު އެއްބަސްވުމެއްގެ ހިލަމެއްވެސް ނުދިނުމުންނެވެ.
ސްޕެއިނުގެ މީޑިއާތައް ބުނާ ގޮތުން ގައުމީ ކޯޗުގެ އެއްބަސްވުން އާނުކުރެވި އޮތް މައިގަނޑު ސަބަބަކީ ސްޕެއިން ފުޓްބޯލް ފެޑެރޭޝަނުގެ އިންތިޚާބު ލަސްވުމާއި، އައު ރައީސަކު އިންތިޚާބުކުރުން ދިގުލައިގެން ދިޔުމުންނެވެ. ނަމަވެސް އަލަށް އިންތިޚާބުވާނެ ކަމަށް ބެލެވޭ ރައީސް ރަފެލް ލައުޒެން ވަނީ ކޯޗުގެ އެއްބަސްވުން 2028 އަހަރާ ހަމައަށް އައުކުރަން ކޯޗާއެކު އެއްބަސްވެފައެވެ.
އައު އެއްބަސްވުމާއެކު ޑެ ލަ ފުއެންޓޭއަށް އަހަރަކު ދެ މިލިއަން ޔޫރޯ ލިބިގެންދާނެއެވެ. ނަމަވެސް މިއީ އޭނާ އުއްމީދުކޮށްގެން ހުރި ވަރަށްވުރެ މަދު އަދަކެވެ. އެގޮތުން އޭނާ އުއްމީދު ކުރީ ތިނެއް ނުވަތަ ހަތަރު މިލިއަން ޔޫރޯގެ މުސާރައެއް ލިބޭނެ ކަމަށެވެ. އެކަމަކު ކޯޗުގެ މުސާރަ ދެ މިލިއަނަށް ބޮޑުކުރާއިރު، މިއީ މިހާރު ލިބެމުން އަންނަ މުސާރައިގެ 100 ގުނަ ބޮޑު އަދަދެއް ކަަމަށް އޭނާ ވަނީ ބުނެފައެވެ.
އެއްބަސްވުމުގެ ކަންތައްތަކާމެދު ހިތްހަމަނުޖެހިފައި ހުރި ނަމަވެސް އުމުރުން 63 އަހަރުގެ ކޯޗު އެހެން ވަޒީފާއަކަށް ނުދާނެ ކަމުގެ ޔަގީންކަން ސްޕެއިންގެ ފުޓްބޯޅަ ފެޑެރޭޝަނަށް ވަނީ ލިބިފައެވެ. އެއީ އޭނާގެ ކެރިއަރުގެ ބޮޑުބައި ހޭދަކުރީ ފެޑަރޭޝަނުގެ އެކި ވަޒީފާތަކުގައި ކަމަށްވުމާއެކުއެވެ.