ސަރުކާރުގެ މަޝްރޫޢުތަކުގައި ބޭނުންކުރާ އިލެކްޓްރޯނިކް އާލާތްތައްވެސް ހަކަތަރި ޕްރޮގްރާމަށް ގެންނަނީ

ސަރުކާރުގެ މަޝްރޫޢުތަކުގައި ބޭނުންކުރާ އިލެކްޓްރޯނިކް އާލާތްތަކަކީ، ހަކަތަރި ޕްރޮގްރާމްގެ ދަށުން ހޯދާ ވަޞީލަތްތަކަށް ހެދުމަށް މަސައްކަތް ކުރަމުންދާކަމަށް މޫސުމީ ބަދަލުތަކާއި ތިމަވެއްޓާއި ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ވަޒީރު ވިދާޅުވީ، މި މަސައްކަތް ކުރުމަށް އުސޫލުތަކަށް ބަދަލު ގެނައުމަށް މަސައްކަތް ކުރަމުންދާކަމަށެވެ.

ރާއްޖޭގެ ހަކަތަރި ޕްރޮގްރާމަކީ، ބާޒާރުގައި ލިބެންހުރި ކަރަންޓުން އޮޕަރޭޓުކުރާ ސާމާނު، ގަންނައިރު އޭގެއިން ހަކަތަ ސަމަކާރަކުރާ (އެފިޝަންޓް) މިންވަރު ފަސޭހައިން ދެނެގަނެވޭ ނިޒާމެއް ޤާއިމުކުރުމަށް ކުރިއަށްގެންދާ ޕްރޮގްރާމެކެވެ. މިޕްރޮގްރާމްގެ ދަށުން މިނިސްޓްރީން ހަކަތަރި ލޭބަލް ދޫކޮށްފައިވާ އައިސް އަލަމާރިއާއި، އެއަރ-ކޮން އަދި ދޮންނަ މެޝިނުން ހަކަތަ ސަމަކާރަކުރާ މިންވަރު އެނގޭނެހެން މިހާރު ބާޒާރުގައި ލިބެން ހުރެއެވެ.

އެގޮތުން އައިސް އަލަމާރިއާއި، އެއަރ-ކޮން އަދި ދޮންނަ މެޝިނުގެ ޖުމްލަ 71 މޮޑެލްއަކަށް މިހާތަނަށް ހަކަތަރި ލޭބަލް ވަނީ ދޫކޮށްފައިކަމަށް ތިމާވެއްޓާ ބެހޭ ވުޒާރާއިން ވިދާޅުވެއެވެ. އަދި މިމަޝްރޫޢު އިތުރަށް ފުޅާކުރުމަށް ހޯމަދުވަހުވަނީ މި ޕްރޮގްރާމަށް ފެން ޕަންޕާ، ވޯޓަރ ހީޓަރާއި ފަންކާ އިތުރުކުރުމަށް ކުރަންޖެހޭ މަސައްކަތް ފަށާފައިކަމަށާއި މިޕްރޮގްރާމަށް އިތުރު ސާމާނު އިތުރުކުރުމަށް މަސައްކަތްކުރަމުންދާކަމަށް އެވުޒާރާއިން ވިދާޅުވެއެވެ.

އިލެކްޓްރޯނިކް އިތުރު ބާވަތްތައް ހަކަތަރި ޕްރޮގްރާމުގެ ދަށުން ރާއްޖެ އެތެރެކުރުމާއި ގުޅޭގޮތުން މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއާއި، ޔޫއެސްއެއިޑް ގުޅިގެން ކުރިއަށްގެންދިޔަ ވޯކްޝޮޕް އިފްތިތާޙްކޮށްދެއްވުމަށްފަހު ޕީއެސްއެމް ނިއުސްއަށް ދެއްވި އިންޓަވިއުއެއްގައި ވަޒީރު ޠާރިޤު އިބްރާހީމް ވިދާޅުވީ ތިމާވެއްޓާ ރައްޓެހި ވަޞީލަތްތައް ބޭނުންކުރުމަށާއި، އިޔާދަކުރަނިވި ހަކަތަ ބޭނުންކުރާ ނިސްބަތް އިތުރުކުރުމަށް ރާއްޖެއިން ހިފާފައިވާ އަމާޒަށް ވާޞިލުވުމަށް މިޕްރޮގްރާމަކީ މުހިއްމު ޕްރޮގްރާމެއްކަމަށެވެ.

މިހާރު ޕްރޮގްރާމް ކުރިއަށްދާގޮތުން ހަމައެކަނި މި މަޝްރޫޢުގެ ދަށުން އާއްމު ރައްޔިތުންނަށް އިސްކަންދިންނަމަވެސް ކުރިއަށް އޮތްތަނުގައި ސަރުކާރުން ކުރިއަށްގެންދާ އެކި މަޝްރޫޢުތަކުގައި ބޭނުންކުރާ އިލެކްޓްރޯނިކް އާލާތްތަކަކީވެސް މިޕްރޮގްރާމްގެ ދަށުން ހަކަތަ ބޭނުންކުރާ އިންސައްތަ ބެލިގެން، ބޭނުންކުރެވޭ އާލާތްތަކަށް ހެދުމަށް ސަރުކާރުން މަސައްކަތް ކުރައްވަމުންދާކަމަށެވެ.

ކުރިއަށް އޮތް މުއްދަތުގައި މާލީ ވުޒާރާއާ ގުޅިގެން ޕަބްލިކް ޕްރޮކިއުމަންޓުގެ ގަވާއިދަށް ހަކަތަރި އިތުރުކޮށް، ސަރުކާރުގެ ޕްރޮކިއުމަންޓްގައި ހަކަތަ ސަމަކާރަކުރުމަށް އިސްކަމެއްދޭނޭ ނިޒާމެއް ގާއިމުކުރުމަށް މަސައްކަތްކުރަމުންދާކަމަށް ވަޒީރު ވިދާޅުވިއެވެ.

"އަޅުގަނޑުމެން ޕޮލިސީ ލެވެލްގައިވެސް މަސައްކަތްކުރަނީ، ކުރިއަށް އޮތްތަނުގައި ޕަބްލިކް ޕްރޮކިއުމަންޓަށް ގަވާއިދުތަކަށް ބަދަލުގެނެސް ޕަބްލިކް ޕްރޮކިއުމަންޓްގައި ބޭނުންކުރާ އެއްޗިއްސަކީވެސް ހަކަތަރި ޕްރޮގްރާމްގެ ތެރެއިން ހޯދާ އެއްޗިއްސަށް ހެދުމަށް. އަދި ސަރުކާރުގެ މަޝްރޫޢުތަކުގައި ބޭނުންކުރާ އެއްޗިއްސަކީވެސް އެނަރޖީ އެފިޝިއަންޓް އެއްޗިއްސަށް ހެދުމަށް މިދަނީ މަސައްކަތް ކުރަމުން." ވަޒީރު ވިދާޅުވިއެވެ.

މޫސުމި ބަދަލުތަކާއި ތިމަވެއްޓާއި ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވީ، ބީލަމުގައި ތަކެތި ގަތުމުގައި ޢަމަލުކުރެވޭ އުސޫލަށް ގެނެވޭ ބަދަލުތަކާއެކު މުޅި ދައުލަތުންވެސް ކަރަންޓު އުފެއްދުމަށް ހޭދަކުރާ މިންވަރު ދަށްކުރެވޭނެކަމަށެވެ. އަދި ރައީސުލްޖުމްހޫރިއްޔާގެ ވަޢުދުފުޅުގެ ދަށުން ރާއްޖޭގައި އުފައްދާ ހަކަތައިގެ 33 އިންސައްތައަކީ އިޔާދަކުރަނިވި ހަކަތައަށް ހެދުމަށް މީގެ ސަބަބުން އިތުރު ބާރަކަށް ވެގެންދާކަމަށް ވަޒީރު ވިދާޅުވިއެވެ. މީގެއިތުރުން ރާއްޖޭގެ ޕްރައިވެޓް ސެކްޓަރގައިވެސް ތަންފީޒުކުރެވޭ އެއްޗަކަށް ހަކަތަރި ޕްރޮގްރާމް ހެދުމަކީ އަމާޒެއްކަމަށް ވަޒީރު ވިދާޅުވިއެވެ.

މޫސުމި ބަދަލުތަކާއި ތިމަވެއްޓާއި ހަކަތައާ ބެހޭ ވުޒާރާއާއި، ޔޫއެސްއެއިޑްގެ ސައުތް އޭޝިއާ ރީޖަނަލް އެނަރޖީ ޕާޓްނަރޝިޕް ގުޅިގެންވަނީ ހަކަތަރިއާއި ގުޅޭ މަޝްވަރާ ބައްދަލުވުމެއް ބާއްވާފައެވެ. މިވޯކްޝޮޕްގައި ވަނީ މިޕްރޮގްރާމްގެ ތެރެއިން އިތުރު އިލެކްޓްރޯނިކް އާލާތްތައް މި ލިސްޓުގައި ހިމެނުމަށް ސަރުކާރުން ނިންމަވާފައިވާ ނިންމެވުމާއި ގުޅިގެން މަޝްވަރާކުރައްވާފައެވެ.

މިގޮތުން ގޭބިސިތަކުގައި ބޭނުންކުރާ ފެން ހޫނުކުރާ ވަޞީލަތްތަކާއި، ފެން ޕަމްޕު އަދި ފަންކާއަކިވެސް ހަކަތަ މަދުން ބޭނުންކުރާ ވަޞީލަތްތަކަށް ހެދުމަށްދަނީ މަސައްކަތްކުރަމުންނެވެ. މިވޯކްޝޮޕްގައި ޔޫއެސްއެއިޑްގެ ސައުތު އޭޝިއާ ރީޖަނަލް އެނަރޖީ ޕާޓްނަރޝިޕްގެ ތަޖުރިބާކާރުންނާއި، ރާއްޖެއަށް މުދާ އެތެރެކުރާ ފަރާތްތަކާއި، ވިޔަފާރިތަކުންވަނީ ބައިވެރިވެފައެވެ.

ހަކަތަރި ޕްރޮގްރާމްގެ ދަށުން ރާއްޖޭގައި މިހާރު ދޮންނަ މެޝިނާއި، އޭސީއާއި، އައިސްއަލަމާރި ހިމެނޭހެން 71 މޮޑެލްގެ އިލެކްޓްރޯނިކް މުދާއަންނަނީ އެތެރެކުރަމުންނެވެ.