އުނގޫފާރުގެ ތަރައްޤީއާއި ކުރިއެރުމަށް ބޭނުންވާ ކަންކަމާގުޅޭގޮތުން މަޝްވަރާކުރައްވައިފި
-
ރައީސް ވަނީ ކައުންސިލާއި ޑަބްލިއުޑީސީގެ މެންބަރުންނާ ބައްދަލުކުރައްވާފައި
-
މި ބައްދަލުކުރެއްވުމުގެ ރަށުގެ މުއައްސަސާތަކުގެ ވެރިންވެސް ބައިވެރިވެވަޑައިގަތް
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މާޅޮސްމަޑުލު އުތުރުބުރީ އުނގޫފާރު ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ (އ.ތ.މ.) ކޮމިޓީއާއި އެރަށުގެ މުއައްސަސާތަކުގެ އިސްވެރިންނާއި ބައްދަލުކުރައްވައި ރައްޔިތުން ބޭނުންވާ ކަންކަމާއި ރައްޔިތުންގެ ކަންބޮޑުވުންތަކާ ގުޅޭގޮތުން މަޝްވަރާކުރައްވައިފިއެވެ. މި ބައްދަލުކުރެއްވުން ކުރިއަށްދިޔައީ މިއަދު މާޅޮސްމަޑުލު އުތުރުބުރީ އަތޮޅު ކައުންސިލް އިދާރާގައެވެ.
މި ބައްދަލުކުރެއްވުމުގައި ކައުންސިލުން ވަނީ މިހާރު އުނގޫފާރުގައި ހިނގަމުންދާ މަޝްރޫޢުތައްް ފުރިހަމަކޮށްދެއްވައި، އާ މަޝްރޫޢުތައް ފަށްޓަވައިދެއްވުމަށް އެދިވަޑައިގެންފައެވެ.
މިގޮތުން ރަށުގައި ބޯހިޔާވަހިކަމުގެ މަޝްރޫޢެއް ފައްޓަވައި ދެއްވައި، ރަށު ސުކޫލަށް ދިމާވެފައިވާ ޖާގާއިގެ ދަތިކަން ހައްލުކޮށްދެއްވުމަށާއި، އިތުރު ކުލާސް ރޫމްތަކެއް އެޅުމުގެ މުހިންމުކަން ކައުންސިލުން ފާހަގަކުރެްވިއެވެ. އަދި ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް އާރބަން ސެންޓަރެއްގެ ގޮތުގައި ރަށް ތަރައްޤީވެގެން އަންނައިރު، ވިޔަފާރި ބަނދަރެއް ރަށުގައި އޮތުމުގެ މުހިންމު ކަންވެސް ކައުންސިލުން ފާހަގަކުރެއްވިއެވެ.
މީގެ އިތުރުން ޤައުމީ ޔުނިވަރސިޓީގެ ކެންޕަހަކާއި، ޓިވެޓް ސެެންޓެރަކާއި، ސަރުކާރުގެ މުއަަައްސަސާތައް އެއްފުރާޅެެއްގެ ދަށުން ޚިދުމަތް ދެވޭނެ އިމާރާތެއްގެ ބޭނުންތެރިކަންވެސް ކައުންސިލުން ފާހަގަ ކުރެއްވިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވިދާޅުވީ ކައުންސިލުން ފާހަގަކުރެއްވި ކަންކަން ބައްލަވާނެކަމުގައެވެ. އަދި އެމަނިކުފާނު ވަނީ މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރެއްވި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްތަކުގެ އެންމެ ފަހުގެ މަޢުލޫމާތު ޙިއްޞާކުރައްވާފައެވެ.