ދަނޑުވެރިކަމުގެ ދާއިރާއިން މަތީ ތަޢުލީމު ހާސިލްކުރުމަށް ސްކޮލަރޝިޕްގެ ފުރުޞަތު

ދަނޑުވެރިކަމުގެ ދާއިރާއިން މަތި ތަޢުލީމު ހާސިލްކުރުމަށް ސްކޮލަރޝިޕަކަށް އެދުމުގެ ފުރުޞަތު ދަނޑުވެރިކަމާއި ދިރޭތަކެއްޗާބެހޭ ވުޒާރާއިން ހުޅުވައިލައިފިއެވެ.

ދަނޑުވެރިކަމާއި ދިރޭތަކެއްޗާބެހޭ ވުޒާރާއިން ވިދާޅުވީ، މި ސްކޮލަރޝިޕްތަކުގައި ދަނޑުވެރިކަމުގެ ދާއިރާއިން ބެޗްލާރސް އަދި މާސްޓާސްއަށް ކިޔެވުމުގެ ފުރުސަތުތަކަށް ހުޅުވައިލާފައިވާކަމަށެވެ. އަދި މިއީ ދިވެހި ސަރުކާރާއި ވާރލްޑް ބޭންކާއި ގުޅިގެން ހިންގާ "ޓްރާންސްފޯރމިންގ ފިޝަރީޒް މެނޭޖްމަންޓް އިން ސައުތު ވެސްޓް އިންޑިއަން އޯޝަން ރީޖަން އެންޑް މޯލްޑިވްސް ޕްރޮޖެކްޓް" ގެ ދަށުން ދިވެހިންނަށް ހޯދައިދީފައިވާ ފުރުޞަތެއްކަމަށްވެސް އެ ވުޒާރާއިން ވިދާޅުވިއެވެ.

މި ސްކޮލަރޝިޕްގެ ދަށުން ބެޗްލަރސް ޑިގްރީއަށް ކިޔެވުމަށް 4 ފުރުޞަތާއި މާސްޓަރސް ޑިގްރީއަށް ކިޔެވުމަށް 1 ފުރުޞަތު ދިނުމަށް ހަމަޖެހިފައިވެއެވެ.

އެގޮތުން އެގްރިކަލްޗަރަލް ސައިންސް، އެނިމަލް ސައިންސް، ބޮޓަނީ އެންޑް އެންޓޮމޮލޮޖީގެ އިތުރުން ނެޗުރަލް ރިސޯސް މެނޭޖްމަންޓް އިން ބެޗްލަރސް ޑިގްރީއަށް ކިޔެވުމުގެ ފުރުޞަތު ހުޅުވައިލެވިފައިވެއެވެ. ހަމަމިއާއެކު ޕްލާންޓް ޕްރޮޓެކްޝަން ދާއިރާއިން މާސްޓަރސް ޑިގްރީއަށް ކިޔެވުމަށް ފުރުޞަތު ދިނުމަށްވެސް ހަމަޖެހިފައިވެއެވެ.

މި ސްކޮލަރޝިޕްގައި ކިޔެވުމަށް އެދި ހުށައަޅާ ދަރިވަރުންގެ ކިބައިގައި ހުންނަންޖެހޭ ޝަރުތުތައް ދިވެހި ސަރުކާރުގެ ގެޒެޓުގައި ވަނީ ޝާއިޢުކޮށްފައެވެ. އަދި މި ސްކޮލަރޝިޕްތަކުގައި ކޮންމެ ދަރިވަރަކަށްވެސް ހުށައެޅޭނީ ފުލްޓައިމް އެއް ޕްރޮގްރާމަށެވެ.

މި ސްކޮލަރޝިޕް ޕްރޮގްރާމްގެ ދަށުން މާސްޓަރސް ޑިގްރީއަށް ކުރިމަތިލާ ދަރިވަރެއްކަމުގައިވާނަމަ ކޯހާއި ގުޅުންހުރި ދާއިރާއަކުން ބެޗްލަރސް ޑިގްރީއެއް ހާސިލުކޮށްފައިވުމާއެކު ކަމާގުޅޭ ދާއިރާއެއްގައި މަދުވެގެން 2 އަހަރުގެ އަމަލީ ތަޖުރިބާ ލިބިފައިވާންވާނެއެވެ. އަދި ބެޗްލަރސް ޑިގްރީގެ ކޯހަށް ކުރިމަތިލާ ދަރިވަރެއްނަމަ ޖީ.ސީ.އީ އޯލެވެލް އިމްތިހާނުގެ 5 މާއްދާއިން 'ސީ' ގްރޭޑް ނުވަތަ ޖީ.ސީ.އީ އޭލެވެލް އިމްތިހާނުގެ 3 މާއްދާއިން 'ސީ' ގްރޭޑް ނުވަތަ އެއަށްވުރެ މަތީ ގްރޭޑެއް ހާސިލުކޮށްފައިވާންވާނެއެވެ.

ސްކޮލަރޝިޕް އަށް ހޮވޭ ދަރިވަރުން މޯލްޑިވްސް ކޮލިފިކޭޝަން އޮތޯރިޓީން ޤަބޫލުކުރާ ޔުނިވަރސިޓީ އަކުން އެކްސެޕްޓަންސް ހޯދުމަށް ބޭނުންވާ ލިޔުމެއް ވުޒާރާއިން ފޯރުކޮށް ދޭނެއެވެ.

ސްކޮލަރޝިޕަށް އެދި ދަނޑުވެރިކަމާއި ދިރޭތަކެއްޗާބެހޭ ވުޒާރާގެ މެނޭޖްމެންޓް ޔުނިޓަށް ހުށަހެޅޭނެއެވެ. ހުށައެޅުންތައް ބަލައިގަތުމުގެ ސުންގަޑިއަކީ މި ފެށޭ ފެބްރުއަރީ މަހުގެ 20 ވަނަ ދުވަހުގެ 12:00 ސުންމިނެޓެވެ.