މަސްވެރިންތަކެއް ހައްޔަރު ކުރުމުގައި ސްރީލަންކާއިން ހަތިޔާރު ބޭނުންކުރުމުން އިންޑިޔާގެ ނުރުހުން

ސްރީ ލަންކާގެ ކަނޑުގެސަރަޙައްދުގައި މަސްވެރިކަން ކުރަމުން ދިޔަ އިންޑިޔާގެ މަސްވެރިންތަކެއް ހައްޔަރު ކުރުމުގައި ސްރީ ލަންކާގެ ކަނޑުގެ ސިފައިން ހަތިޔާރު ބޭނުން ކުރުމާ ގުޅިގެން އިންޑިޔާއިން ނުރުހުން ފާޅުކޮށްފިއެވެ. އިންޑިޔާގެ 13 މަސްވެރިން ތިބި އުޅަނދު، މަސްވެރިކަން ކުރަމުން ގޮސްފައި ވަނީ ސްރީ ލަންކާގެ ރަށެއް ކަމުގައިވާ ޑެލްފްޓް އައިލެންޑް ނުވަތަ ނީޑެންތީވޫ ކައިރީގައެވެ.

އިންޑިޔާގެ މަސްވެރިން ހައްޔަރު ކުރުމުގެ ތެރޭގައި ސްރީ ލަންކާގެ ކަނޑުގެ ސިފައިން ވަނީ ހަތިޔާރު ބޭނުން ކޮށްފައެވެ. އަދި، ބަޑި ޖަހާފައެވެ. މި ހާދިސާގައި އިންޑިޔާގެ މަސްވެރިންގެ ތެރެއިން ދެ މީހަކު ޒަޚަމުވެ ފަރުވާ ދޭން ޖެހިފައިވާއިރު، އިތުރު ތިން މީހަކަށް ފަރުވާ ދިނުމަށް ފަހު ދޫކޮށްލާފައިވާ ކަމުގައި އިންޑިޔާގެ ޚާރިޖީ ވުޒާރާއިން ހާމަކުރިއެވެ. އެޑްމިޓު ކޮށްގެން ފަރުވާ ދެމުންދާ ދެ މީހުން ތިބީ ސްރީ ލަންކާގެ ޖަފްނާ ޓީޗިންގ ހަސްފަތާލުގައެވެ.

މި ހާދިސާއާ މެދު ކަންބޮޑުވުން ފާޅުކޮށް، ނުރުހުން ފާޅު ކުރުމުގެ ގޮތުން އިންޑިޔާއިން ވަނީ ވެރިރަށް ނިއު ދެއްލީގައި ހުންނަވާ ސްރީ ލަންކާގެ ސަފީރު ހާޒިރުކޮށް ސުވާލު ކޮށްފައެވެ. "[ސްރީ ލަންކާގެ ވެރިރަށް] ކޮލަމްބޯގައި ހުންނަ ހައި ކޮމިޝަނުން ވެސް ވަނީ ސްރީލަންކާގެ ޚާރިޖީ ވުޒާރާއާއި ސަރުކާރަށް ކަންބޮޑުވުންތައް ހިއްސާ ކޮށްފައި،" އިންޑިޔާގެ ޚާރިޖީ ވުޒާރާއިން ނެރުނު ބަޔާނެއްގައި ހާމަކޮށްފައިވެއެވެ.

އިންޑިޔާގެ ޚާރިޖީ ވުޒާރާއިން ބުނީ، ޖަފްނާ ޓީޗިންގ ހަސްފަތާލުގައި ފަރުވާ ދެމުންދާ މަސްވެރިންނާއި، ހައްޔަރު ކޮށްފައި ތިބި އިތުރު މަސްވެރިންނާ އިންޑިޔާގެ ކޮންސިޔުލޭޓުގެ އޮފިޝަލުން ބައްދަލުކޮށް، އެ މީހުންގެ ހާލަތު ވަޒަން ކޮށްފައިވާ ކަމުގައެވެ. އަދި، އެ މީހުންނާއި އެ މީހުންގެ ޢާއިލާތަކަށް އެހީތެރިކަން ފޯރުކޮށް ދިނުމަށް މަސައްކަތް ކުރަމުންދާ ކަމުގައެވެ.

މި ހާދިސާއާ މެދު ކަންބޮޑުވުން ފާޅުކޮށް އިންޑިޔާގެ ޚާރިޖީ ވުޒާރާއިން ވަނީ، ކަނޑުމަތިން ހައްޔަރު ކުރާ މަސްވެރިންނާ މެދު އިންސާނިއްޔަތު ކަމާ އެކު އަމަލު ކުރުމަށް ސްރީ ލަންކާގެ ކަނޑުގެ ސިފައިންގެ ކިބައިން އެދިފައެވެ. އަދި، މަސްވެރިކަމަކީ އެ މީހުން ދިރިއުޅުމަށް އާމްދަނީ ހޯދުމަށް ކުރާ މަސައްކަތް ކަން ބަލައިގަތުމަށް ވެސް އިރުޝާދު ދީފައެވެ. "އެއްވެސް ހާލަތެއްގައި ބާރުގެ ބޭނުން ކުރުމަކީ ބަލައިގަނެވޭނެ ކަމެއް ނޫން. ދެ ޤައުމުގެ ދެމެދުގައި މިހާރު ވެސް އަމަލު ކުރަމުންދާ ސިޔާސަތުތައް ދަމަހައްޓަން ޖެހޭނެ،" އިންޑިޔާގެ ޚާރިޖީ ވުޒާރާގެ ބަޔާނުގައި ބުންޏެވެ.

އިންޑިޔާއާއި ސްރީ ލަންކާއާ ދެމެދު އޮތް ޕޯކް ސްޓްރެއިޓުގައި މަސްވެރިކަން ކުރުމާ މެދު ދެ ޤައުމުގެ ދެމެދުގައި އޮތީ ޚިޔާލު ތަފާތުވެފައެވެ. އެއީ، ބޭ އޮފް ބަންގާލް ކަނޑުގެ ޕޯކް ބޭއާއި ގަލްފް އޮފް މަންނާރު ގުޅައިދޭ ކަނޑުއޮޅިއެވެ. އެ ސަރަޙައްދުގައި މަސްވެރިކަން ކުރަމުން ދަނިކޮށް އިންޑިޔާގެ ގިނަ އަދަދެއްގެ މަސްވެރިންތަކެއް ސްރީ ލަންކާގެ ކަނޑުގެ ސިފައިންގެ ބެލުމުގެ ދަށަށް ގެންގޮސްފައިވެއެވެ.

މި ގޮތުން، 2024ވަނަ އަހަރުގެ ސެޕްޓެންބަރު މަހުގެ 8 ދުވަހު އެ ސަރަޙައްދުގައި މަސްވެރިކަން ކުރަނިކޮށް ސްރީ ލަންކާގެ ކަނޑުގެ ސިފައިންގެ ބެލުމުގެ ދަށަށް ގެންދިޔަ އިންޑިޔާގެ 41 މަސްވެރިން ދާދި ފަހުން ވަނީ މިނިވަން ކޮށްފައެވެ. ހުސްވި އަހަރު ސްރީ ލަންކާގެ ކަނޑުގެ ސިފައިން ހައްޔަރު ކޮށްފައިވާ އިންޑިޔާގެ އިތުރު 15 މަސްވެރިން މި ހިނގާ ޖަނަވަރީ މަހުގެ 16ވަނަ ދުވަހު މިނިވަން ކޮށްފައިވެއެވެ. އެއީ، ހުސްވި އަހަރުގެ ސެޕްޓެންބަރު މަހު ހައްޔަރު ކޮށްފައިވާ މަސްވެރިންތަކެކެވެ.