އައިސީސީ ޗެމްޕިއަންސް ޓްރޮފީ ކްރިކެޓް މުބާރާތުގައި ވާދަކުރާ ޕާކިސްތާން ޓީމު އިއުލާނުކޮށްފި އެވެ.
އެންމެ ފަހުގެ ޗެމްޕިއަން ޕާކިސްތާނަކީ އެ ގައުމުގައި ފެބްރުއަރީ މަހުގެ 19 ވަނަ ދުވަހު ފަށާ މުބާރާތަށް އެންމެ ފަހުން ޓީމު ފައިނަލްކޮށް އިއުލާނުކުރި ގައުމެވެ.
އަށް ގައުމު ވާދަކުރާ މުބާރާތަށް ޕާކިސްތާނުން އެކުލަވާލި ޓީމުން އުނިކުރި އެންމެ މަޝްހޫރު ކުޅުންތެރިއަކީ އޯޕަނިން ބެޓްސްމަން ސައިމް އަޔޫބެވެ. އޭނާ ޓީމަށް ނުނެގީ އިނގިރޭސިވިލާތަށް ފޮނުވައިގެން ވެސް ފަޔަށް ލިބުނު އަނިޔާ ރަނގަޅު ނުވާތީ އެވެ. ޕާކިސްތާން ޓީމު އިއުލާނުކުރުން މިހާ ބޮޑަށް ފަސްކުރި މައިގަނޑު ސަބަބަކީ ވެސް އަޔޫބަށް ކުޅެވޭތޯ ބެލުމެވެ. ޓީމުން ދެން ބާކީކުރީ ފޯމު ކަޓާފައިވާ އަބްދުﷲ ޝާފިގީ އާއި މުހައްމަދު އިރުފާން ހާން އާއި ސުފިޔާން މުގީމެވެ. މި ކުޅުންތެރިންގެ ބަދަލުގައި ޓީމަށް ނެގީ ފަހީމް އަޝްރަފާއި ފަހްރުއްޒަމާނާއި ޚުޝްދިލްޝާހު އާއި ސައުދު ޝަކީލެވެ.
ޓީމުގެ ކެޕްޓަންކަން ދީފައިވަނީ ވިކެޓް ކީޕަރު މުހައްމަދު ރިޒްވާނަށެވެ. ވައިސް ކެޕްޓަނަކީ އޯލް ރައުންޑަރު ސަލްމާން އަލީ އަގްހާ އެވެ. މި ފަހަރުގެ ޓީމުގައި 2017 ވަނަ އަހަރު ތަށި ހޯދި ޓީމުން ހިމަނާފައިވަނީ އެންމެ ފަސް ކުޅުންތެރިންނެވެ. އެއީ ބާބަރް އަޒަމް އާއި ފަހީމް އަޝްރަގް އަދި ފަހްރުއްޒަމާނެވެ.
ޓީމުގެ އެންމެ މުހިންމު އުކުންތެރިއަކީ ވާތުން އުކާ ބާރު އުކުންތެރިޔާ ޝާހީން ޝާހް އަފްރީދީ އެވެ. މީގެ އިތުރުން މުހައްމަދު ހުސްނައިން އާއި ނަސީމް ޝާހު އަދި ހާރިސް ރައުފް ފާހަގަކޮށްލެވެ އެވެ.
ޕާކިސްތާނުން މިހާރު ތައްޔާރުވަމުން އަންނަނީ ޗެމްޕިއަންސް ޓްރޮފީގެ ކުރިން ނިއުޒީލޭންޑާއި ދެކުނު އެފްރިކާއާއެކު ޓްރައި ނޭޝަންސް މުބާރާތެއް ކުޅުމަށެވެ. މި މުބާރާތް ފަށާނީ ފެބްރުއަރީ މަހުގެ ހަތަރު ވަނަ ދުވަހު އެވެ.
ޗެމްޕިއަންސް ޓްރޮފީ ކްރިކެޓް މުބާރާތުގައި ވާދަކުރާނީ އަށް ގައުމެވެ. އެއީ ގްރޫޕް އޭ ގައި ހިމެނޭ ޕާކިސްތާނާއި އިންޑިޔާ އާއި ބަނގްލަދޭޝް އާއި ނިއުޒީލޭންޑެވެ. ގްރޫޕް ބީގައި ހިމެނެނީ އޮސްޓްރޭލިޔާ އާއި އިންގްލޭންޑާއި އަފްގާނިސްތާނާއި ދެކުނު އެފްރިކާ އެވެ.
މީގެ ތެރެއިން އިންޑިޔާގެ މެޗުތައް ކުޅޭނީ ޑުބާއީގަ އެވެ. އެއީ އިންޑިޔާ ޓީމު ޕާކިސްތާނަށް ދިއުން އިންޑިޔާ ސަރުކާރުން މަނާކޮށްފައި އޮތުމުންނެވެ.
ޗެމްޕިއަންސް ޓްރޮފީ އަށް ޕާކިސްތާން ތައްޔާރުވަމުން އަންނައިރު މިހާރު އެންމެ ބޮޑަށް އުފެދިފައިވާ ސުވާލަކީ މުބާރާތަށް އެ ގައުމުގެ ސްޓޭޑިއަމްތައް ފުރިހަމަ އަށް ނިންމޭނެތޯ އެވެ. ޕާކިސްތާނުގެ ތިން ސްޓޭޑިއަމެއްގައި މެޗުތައް ކުޅޭ ގޮތަށް ވަނީ ހަމަޖައްސައިފަ އެވެ. އެއީ ލާހޯރާއި ކަރާޗީ އާއި ރާވަލްޕިންޑީގައިވާ ސްޓޭޑިއަމުގަ އެވެ.