ގޯލްކީޕަރު އެލިސަން ބެކާގެ ބޮލަށް ލިބުނު އަނިޔާގެ ސަބަބުން އޭނާ ކުޅުމާ ދުރުގައި ހުންނަން ޖެހިދާނެތީވެ ބްރެޒިލް އާއި ލިވަޕޫލުން ކަންބޮޑުވެއްޖެއެވެ.
އެލިސަންގެ ބޮލަށް ހާނިއްކަވީ ވޯލްޑް ކަޕް ކޮލިފައިންގައި ރޭ ކޮލަމްބިއާ އަތުން 2-1އިން ބްރެޒިލް މޮޅުވި މެޗުގަ އެވެ. މެޗުގެ 78 ވަނަ މިނިޓްގައި މަތިން އައި ބޯޅަ ޕަންޗުކުރަން އެރި ވަގުތު އެލިސަންއަށް އަނިޔާވީ ކޮލަމްބިއާގެ ޑެވިންސަން ސަންޗޭޒްއާ މުޑިއެރުމުންނެވެ.
ދެ ކުޅުންތެރިން ވެސް ދަނޑުމައްޗަށް ވެއްޓި ފަރުވާދިނުމަށްފަހު އަލިސަން ވަނީ ބަދަލުކޮށްފަ އެވެ. އޭނާގެ ބަދަލުގައި މެޗުގެ ފަހު 12 މިނިޓް ގޯލް ބެލެހެއްޓީ ބެންޓޯ އެވެ. މި އަނިޔާގެ ސަބަބުން ސަންޗޭޒް ލައްވައިވެސް އިތުރަށް ކުޅުވާފައިނުވެ އެވެ.
ބްރެޒިލްގެ ޓީމުގެ ޑޮކްޓަރު މެޗަށް ފަހު ބުނީ މިހާތަނަށް ބެލިބެލުމުން އެލިސަންގެ ހާނިއްކަ ގޯސްނޫން ކަމަށާއި ނަމަވެސް ބޮލަށް ލިބުނު އަނިޔާއަކަށްވުމުން މިއަދު އިތުރު ޓެސްޓްތައް ހަދާނެ ކަމަށެވެ.
"މިއީ ކޮންކަޝަން، ބޮލަށް ލިބުނު ހާނިއްކައެއްވީމާ އަހަރުމެން ދާނީ ފެޑަރޭޝަނުގައި މިކަމުގައި އޮންނަ ޕްރޮޓޮކޯލްއާ އެއްގޮތަށް. މި ގޮތުން ކުރިއަށް އޮތް ދެތިން ދުވަހު އޭނާހެ ހާލަތު ދާނީ ގަވާއިދުން މޮނިޓަރ ކުރަމުން. އޭނާ ފެއިންޓެއްނުވޭ ވެއްޓިފައި އަދި ހަނދާން ނެތުން ފަދަ ކަމެއް ވެސް ނެތް. އެކަމަކު ވެސް ސީޓީ ސްކޭންތަކާއި ކޮގްނިޓިވް ޓެސްޓްތައް ވެސް ހަދަންޖެހޭނެ،" ޑޮކްޓަރު ބުންޏެވެ.
މި ހާނިއްކައިގެ ސަބަބުން ވޯލްޑްކަޕް ކޮލިފައިންގައި އަންނަ ބުދަ ދުވަހު ކުޅޭ މެޗުގައި އެލިސަންއަށް ކުޅެވޭނެކަން ޔަގީނެއްނޫނެވެ. އޭނާ އަށް އަނިޔާވުމުން ލިވަޕޫލް ކަންބޮޑުވެފައިވަނީ އެ ޓީމުގެ އެއްވަނަ ކީޕަރަކީ ވެސް އެލިސަން ކަމަށްވުމުން އިނގިރޭސި ޕްރިމިއާ ލީގުގައި މުހިންމު މެޗުތަކެއް ކުރިއަށް އޮތުމުންނެވެ.
އެލިސަން އަކީ 2017 ވަނަ އަހަރުން ފެށިގެން ބްރެޒިލްގެ އެއްވަނަ ކީޕަރެވެ. އޭނާ ވަނީ ދުނިޔޭގެ އެންމެ މޮޅު ގޯލަކީޕަރުގެ މަގާމާއި ދެކުނު އެމެރިކާގެ އެއްވަނަ ކީޕަރުކަމާއި ޕްރެމިއާ ލީގުގެ މޮޅު ކީޕަރަށްދޭ އަންގި ވެސް ހާސިލްކޮށްފަ އެވެ.