މެޗުގެ އިތުރު ވަގުތުގައި ފޯވާޑް ވިނީޝިއުސް ޖޫނިއަރ ޖެހި ލަނޑުން 2-1 ގެ ނަތީޖާއަކުން ކޮލަމްބިއާ ބަލިކޮށް، ބްރެޒިލްއިން ހާސްކަން ފިލުވާލައިފިއެވެ.
މި މޮޅާއެކު ފީފާ ވޯލްޑްކަޕް ކޮލިފައިންގައި ބްރެޒިލް އޮތީ 13 މެޗުން 21 ޕޮއިންޓާއެކު ދެކުނު އެމެރިކާގެ ޕޮއިންޓް ޓޭބަލުގެ ދެ ވަނާގަ އެވެ. އެއްވަނާގައިވަނީ 12 މެޗުން 25 ޕޮއިންޓާއެކު ދުނިޔޭގެ ޗެމްޕިއަން އާޖެންޓީނާ އެވެ.
ބްރެޒިލް ދެން ނުކުންނާނީ ބުދަ ދުވަހު އާޖެންޓީނާއާ ދެކޮޅަށެވެ. މި މެޗުން ބަލިވުމުން ކޮލަމްބިއާ ވަނީ ބްރެޒިލަށްވުރެ ފަހަތަށް ސޮއްސާލައިފަ އެވެ. އެ ގައުމަށް ލިބިފައިވަނީ 13 މެޗުން 19 ޕޮއިންޓެވެ.
ރޭގެ މެޗުގައި ފުރަތަމަ ގޯލު ޖެހީ ހަ ވަނަ މިނިޓްގައި ލިބުނު ޕެނަލްޓީ އަކުން ބްރެޒިލްގެ ރަފީނިއާ އެވެ. އޭނާގެ މި ގޯލަށް ފަހު ދެ ވަނަ ލަނޑެއް ނުޖެހި އުޅެނިކޮށް ނަތީޖާ ހަމަހަމަވީ ކޮލަމްބިއާގެ ލުއިޒް ދިއާޒް 41 ވަނަ މިނިޓްގައި ޖެހި ލަނޑުންނެވެ.
އަމިއްލަ ގައުމުގައި 70000 މީހުންގެ ކުރިމަތީގައި ކުޅުނު މެޗުން ބްރެޒިލްގެ ސަޕޯޓަރުންނަށް ހިނިތުންވުން ގެނެސްދިނީ މެޗުގެ އިތުރު ވަގުތުގެ ހަ ވަނަ މިނިޓްގައި ވިނީޝިއަސް އެވެ. އޭނާ ދުރުން ފޮނުވާލި ބޯޅަ ގޯލަށް ވަނުމުގެ ކުރިން ސަޕޯޓަރުން ތިބީ ކުޅުން ދަށްކަމުން ވަރަށް ބޮޑަށް ފޫހިވެފަ އެވެ.
"މި ގޯލު ޖެހުމުން އަހަރެން ވަރަށް އުފާވެއްޖެ. އަހަރެން ބުނާނީ އަހަރުމެން މޮޅުވުން ހައްގު ކަމަށް. އަހަރުމެން ވަރަށް މަސައްކަތް ކުރިން. އަދި މި ގޯލަކީ ވެސް އަހަރެން ވަރަށް ޕްރެކްޓިސް ކޮށްގެން، ޖެހި ގޯލެއް. ހަގީގަތުގައި ވެސް އަހަންނަށް މި ގޯލު ޖެހެންވާނެ،" ރެއާލް މެޑްރިޑްގެ ފޯވަޑް ވިނީޝިއަސް މެޗަށް ފަހު ބުންޏެވެ.
މި މެޗުގައި ދެއްކި ރީނދޫ ކާޑުތަކުގެ ސަބަބުން ބްރެޒިލްގެ މުހިންމު ދެ ކުޅުންތެރިއަކަށް އާޖެންޓީނާ މެޗުގައި ނުކުޅެވޭނެ އެވެ. އެއީ މިޑްފީލްޑަރު ބްރޫނޯ ގުއިމަރޭޒް އާއި ޑިފެންޑަރު ގަބްރިއަލް މަޅަގާސް އަށެވެ.
ކޯޗު ޑޮރިވާލް ޖޫނިއާ މެޗަށް ފަހު ބުނީ މުހިންމު ދެ ކުޅުންތެރިންގެ އިތުރުން ބޮލަށް ލިބުނު އަނިޔާގެ ސަބަބުން މެޗުގެ ފަހު 12 މިނިޓްގައި ބާލަން ޖެހުނު ގޯލްކީޕަރު އަލިސަން ބެކާ ނެތި އާޖެންޓީނާ މެޗަށް ތައްޔާރުވުމަކީ ގޮންޖެހުމެއް ކަމަށެވެ. ނަމަވެސް ބްރެޒިލް ބަލާނީ އެންމެ ފުރިހަމަ އަށް ތައްޔާރުވާން ކަމަށާއި އާޖެންޓީނާ އަށް ވުރެ ބްރެޒިލް މޮޅުވާން ބޭނުންވާނެ ޓީމެއް ނޯންނާނެ ކަމަށެވެ.