ފުޓްބޯޅަ ކޯޗު ސާންތީ ނިޔާވެއްޖެ

ރާއްޖޭގެ ފުޓްބޯޅައަށް ގިނަ ޚިދުމަތްތަކެއް ކޮށްދެއްވި ކޯޗު އިހުސާން އަބްދުލްޣަނީ (ސާންތީ) ނިޔާވެއްޖެއެވެ.

އޭނާ ނިޔާވީ ޓްރީ ޓޮޕް ހޮސްޕިޓަލުގައި ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް މިރޭގެ ވަގުތެއްގައެވެ. ބަލިވެ އުޅޭތާ މިހާރު އަހަރަކަށްވުރެ ގިނަ ދުވަސްވެއްޖެއެވެ.

އޭނާއަކީ ކުރީގެ ފުޓްބޯޅަ ކުޅުންތެރިއެކެވެ. އެއަށްވުރެ ބޮޑަށް އޭނާގެ ޚިދުމަތް އޮތީ ކޯޗިންގެ ދާއިރާގަ އެވެ. ހާއްސަކޮށް އެފްއޭއެމުގެ ޔޫތު ޑިވެލޮޕްމަންޓް ޕްރޮގްރާމް ފައްޓައި އެ ޕްރޮގްރާމް ކުރިއަށް ގެންދިއުމުގައި އޭނާގެ ދައުރު ވަރަށް ބޮޑެވެ.

ގިނަ ބަޔަކަށް ސާންތީ އެންމެ ބޮޑަށް ފާހަގަ ވެފައިވަނީ ގައުމީ ފުޓްބޯޅަ ޓީމުންނެވެ. އޭނާއަކީ ރާއްޖެ އަށް އެންމެ ފުރަތަމަ ފުޓްބޯޅައިން ތައްޓެއް ހޯދައިދިން ޤައުމީ ޓީމުގެ އެސިސްޓެންޓް ކޯޗެވެ. 2008 ވަނަ އަހަރު ރާއްޖެ އާއި ލަންކާގައި ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތް ދިވެހިންނަށް ކާމިޔާބުކޮށްދިނުމުގައި އޭނާ އަދާކޮށްފައި ވަނީ ވަރަށް ފުރިހަމަ ޒިންމާއެކެވެ.

އޭނާ އެންމެ ފުރަތަމަ ގައުމީ ޓީމާ ގުޅުނީ 2001 ވަނަ އަހަރެވެ. އެއަށްފަހު 2008 ވަނަ އަހަރާ ހަމައަށް އެސިސްޓެންޓް ކޯޗެއްގެ ގޮތުގައި މަސައްކަތް ކުރުމަށްފަހު ދެން ފެނިގެން ދިޔައީ ކުލަބު ފުޓްބޯޅައިގެ ސީނިއާ ކޯޗެއްގެ ގޮތުގައެވެ.

މިގޮތުން ކުލަބު އީގަލްސްއާއި ޔުނައިޓެޑް ވިކްޓަރީއަށް ކޯޗުކޮށްދީ އޭނާ ވަނީ އީގަލްސްއަށް ޤައުމީ ފުޓްބޯޅަ މުބާރާތްވެސް ކާމިޔާބުކޮށްދީފައެވެ.

ފުޓްބޯޅަ އެސޯސިއޭޝަން އޮފް މޯލްޑިވްސްގެ ޓެކްނިކަލް ޑައިރެކްޓަރުކަންވެސް އަދާކުރި ސާންތީ ވަނީ ކުޅިވަރަށް ޚިދުމަތް ކުރުމުގެ ދާއިރާއިން ޒުވާނުންގެ ޤައުމީ އިނާމް ހާޞިލުކުރައްވާފައެވެ.

އޭނާއަކީ ޕީއެސްއެމްގެ ކުޅިވަރު ޕްރޮގްރާމްތަކަށް ވަރަށް ބޮޑު އެހީތެރިކަމެއް ވެދެއްވައި ވަރަށް ގިނަ ގޮތްގޮތުން ފަންނީ އެހީތެރިކަން ދެއްވި ފަރާތެވެ. އަޅުގަނޑުމެންގެ ދުޢާއަކީ ސާންތީގެ ފުރާނައަށް މާތް ﷲ ސުވަރުގޭގެ ދާއިމީ ނިޢުމަތް މިންވަރުކޮށްދެއްވާ އާއިލާއަށް ކެތްތެރިކަން ދެއްވުމެވެ.