ކުޅިވަރު

މޮޓާ ވަކިކޮށް ޔުވެންޓަސްގެ ކޯޗުކަން ޓޫޑާއަށް


ތިއާގޯ މޮޓާ ވަކިކޮށް އިޓަލީގެ ޔުވެންޓަސްގެ ކޯޗުކަން ކުރީގެ ކުޅުންތެރިޔާ ކްރޮއޭޝިއާގެ އީގާ ޓޫޑާއަށް ދީފިއެވެ.

އޭނާ އަށް ކުލަބުން ދީފައިވާ ޓާސްކަކީ މި ސީޒަން ނިމޭއިރު ގަދަ ހަތަރެއްގައި ޓީމު ބޭއްވުމެވެ. ޓޫޑާ އަކީ 174 މެޗު ޔުވެންޓަސް އަށް ކުޅެދީފައިވާ ކުޅުންތެރިއެކެވެ. ޔުވެންޓަސްއާ ހަވާލުވުމުގެ ކުރިން އޭނާ ވަނީ އިޓަލީގެ ވެރޯނާ އާއި ލާޒިއޯ އަދި ފްރާންސްގެ މާސޭ އަށް ކޯޗުކޮށްދީފަ އެވެ.

އެއް ސީޒަނަށް ފަހު މޮޓާ މަގާމުން ވަކިކުރީ ނަތީޖާތައް ރަނގަޅު ނުވުމުންނެވެ. ޔުވެންޓަސް މިވަގުތު އޮތީ އިޓާލިއަން ލީގުގެ ފަސް ވަނާގަ އެވެ. އެއީ 29 މެޗުން 52 ޕޮއިންޓާއެކުގަ އެވެ. މިއީ އެއްވަނާގައިވާ އިންޓަމިލާނަށްވުރެ 12 ޕޮއިންޓް މަދު އަދަދެކެވެ.

ޔުވެންޓަސްއިން ނެރުނު ބަޔާނުގައި ބުނެފައިވަނީ އެ ޓީމުގެ ކޯޗުގެ ޒިންމާތަކުން މޮޓާ އެއް ފަރާތްތަކޮށްފައިވާ ކަމަށެވެ.

"ކުލަބުން މޮޓާ އާއި އޭނާގެ ކޯޗިން ޓީމު ދެއްކި ޕްރޮފެޝަނަލް ކަމާއި އެމީހުން މިދޔަ މުއްދަތުގައި ކޮށްދިން މަސައްކަތަށް ޝުކުރު އަދާކުރަން. މޮޓާ އަތުން މިހާރު ވަނީ ކޯޗުކަމުގެ ޒިންމާތައް ނަގާފައި. ޔުވެންޓަސްގެ ކޯޗެއްގެ ގޮތުގައި ދެން ހުންނާނީ އީގޯ ޓޫޑޯ،" ޔުވެންޓަސްގެ ބަޔާނުގައިވެ އެވެ.

ޓޫޑޯ ކޯޗެއްގެ ގޮތުގައި މަސައްކަތް ކުރަން ފަށާ ފުރަތަމަ ދުވަހަކީ މިއަދު ކަމަށް ވެސް ޔުވެންޓަސްއިން ބުނެ އެވެ.

މޮޓާ ވަކިކުރުމުގެ އެއް ސަބަބަކީ އަމިއްލަ ދަނޑުގައި އެޓްލާންޓާ އަތުން 4-0އިން ބަލިވުމެވެ. މިއީ 1967ގެ ފަހުން އަމިއްލަ ދަނޑުގައި މިހާ ބޮޑުކޮށް ޔުވެންޓަސް ބަލިވި ފުރަތަމަ ފަހަރެވެ. މީގެ އިތުރުން އެންމެ ފަހުން ކުޅުނު ދެ މެޗުގައި ފިއޮރެންޓީނާ އަތުން ބަލިވުމަކީ ވެސް އޭނާގެ މަގާމު ގެއްލެން މެދުވެރިވި ސަބަބެކެވެ.

ޔުވެންޓަސްގެ މެނޭޖްމަންޓުން މި ހަފުތާގައި ބޭއްވި ބައްދަލުވުމުގައި ނިންމާފައިވަނީ ޓީމަށް މި ސީޒަނުގެ ކުރިން ކުރި ހޭދަތަކާ އަޅާބަލާއިރު އެކަށީގެންވާ ނަތީޖާތަކެއް ނެރެވިފައިވާ ނުވާ ކަމަށެވެ.