ޖަރުމަން ލީގުންވެސް ޓްރާންސްފާ ބާޒާރު ކުރިން ފަށަން ނިންމައިފި އެވެ. މި ގޮތުން ޖޫން މަހުގެ 1 އިން 10 އަށް ޓްރާންސްފާ ބާޒާރު ކުރިއަށްގެންދާނެއެވެ.
މި ގޮތަށް ނިންމީ މި ސީޒަން ނިމުމުން 32 ޓީމު ބައިވެރިކޮށްގެން ޖޫން 14 އިން ޖުލައި 13 އަށް އެމެރިކާގައި ފީފާއިން ބާއްވާ ކުލަބު ވޯލްޑް ކަޕް ފުޓްބޯޅަ މުބާރާތާ ހެދިއެވެ. ފީފާއިން ނިންމީ އެ މުބާރާތް ކުޅޭ ޓީމުތައް ނިސްބަތްވާ ގައުމުތަކަށް ޓްރާންސްފާ ބާޒާރު އަވަހަށް ފަށަން ހުއްދަ ދިނުމަށެވެ.
އެކަމަކު އެއީ އެ ގައުމެއްގެ އަމިއްލަ ކަމެކެވެ. މިއީ ކުޅުންތެރިން ހޯދުމުގައި ޓީމުތަކަށް އިތުރު ފުރުސަތު ދިނުމުގެ ގޮތުންނާއި މުބާރާތް ތެރޭގައި ޓްރާންސްފާގެ ހަރަކާތްތައް ކުރިއަށް ގެންދަން ޓީމުތަކަށް ދަތިވާތީ ނިންމި ނިންމުމެކެވެ.
ޖަރުމަނުގެ އިތުރުން އަވަހަށް ޓްރާންސްފާ މާކެޓް ފަށަން ނިންމާފައިވާ ގައުމަކީ އިނގިރޭސިވިލާތެވެ. ކުލަބު ވޯލްޑް ކަޕުގައި ޖަރުމަނުގެ ދެ ޓީމެއް ކުޅޭނެ އެވެ. އެއީ ބަޔާން މިއުނިކާއި ބޮރޫޝިޔާ ޑޯޓްމުންޑެވެ.