ކުޅިވަރު

ޕްރިމިއަރ ލީގަށް ސެމީ އޮޓޮމޭޓެޑް އޮފްސައިޑް ޓެކްނޮލޮޖީ ގެންނަނީ


އިނގިރޭސި ޕްރިމިއަރ ލީގުން ސެމީ އޮޓެމޭޓެޑް އޮފްސައިޑް ޓެކްނޮލޮޖީ ބޭނުންކުރަން ނިންމައިފިއެވެ. މި ގޮތުން މި ޓެކްނޮލޮޖީ ބޭނުން ކުރަން ފަށާނީ މި މަހުގެ 12 ވަނަ ދުވަހުން މެންޗެސްޓާ ސިޓީ އާއި ކްރިސްޓަލް ޕެލަސް ބައްދަލުކުރާ މެޗުންނެވެ.

މީގެ ކުރިން ވަނީ މިދިޔަ މަހު ކުޅުނު އެފްއޭކަޕް ފަސް ވަނަ ބުރުގ މެޗުތަކުގައި މި ޓެކްނޮލޮޖީ ޓެސްޓްކޮށްފަ އެވެ. މިއަށްފަހު ޕްރެމިއާ ލީގުން ވަނީ މި ޓެކްނޮލޮޖީ ލީގުގައި ބޭނުން ކުރުމުގެ ރަސްމީ ހުއްދަ ދީފަ އެވެ.

ސެމީ އޮޓެމޭޓެޑް އޮފްސައިޑް ޓެކްނޮލޮޖީ އަކީ އޮފްސައިޑް ދެނެގަތުމުގައި އަވަސް އަދި ވަރަށް އެކިއުރޭޓް ސޮފްޓްވެއާއެކެވެ. ވާޗުއަލް އޮފްސައިޑް ލައިންތަކާއި ގްރެފިކްސްއާއެކު ކުޅުންތެރިޔާގެ އަސްލު ޕޮޒިޝަނާއި މޫވްމަންޓް މި ޓެކްނޮލޮޖީގެ އެހީގައި މާ ރަނގަޅަށް އަވަހަށް ހޯދައިގަނެވެ އެވެ. ވީއޭއާރު ރެފްރީން މި ޕްރޮސެސް ކުރިއަށް ގެންދިއުމަށްފަހު ރެފްރީ އަށް އަދި ރެފްރީން ކުޅުންތެރިންނަށް ފަހުގެ ނިންމުން އަންގާނެ އެވެ.

މި ޓެކްނޮލޖީ އެންމެ ފުރަތަމަ ބޭނުންކުރީ 2022 ވަނަ އަހަރު ގަތަރުގައި ބޭއްވި ވޯލްޑްކަޕް ފުޓްބޯޅަ މުބާރާތުގަ އެވެ. މިއަށްފަހު ޗެމްޕިއަންސް ލީގާއި ސްޕެނިޝް ލީގު އަދި އިޓާލިއަން ލީގުގައި ވެސް ދަނީ މި ޓެކްނޮލޮޖީ ބޭނުން ކުރަމުންނެވެ.

މި ޓެކްނޮލިޖީ ބޭނުން ކުރާއިރު ދަނޑުގައި 30 ކެމެރާ ބޭނުންކުރާނެ އެވެ.