ޚަބަރު

ސޫރިޔާގެ ދިމިޝްޤާއި މައި ރަށްތަކަށް ޔަހޫދީ ފައުޖުގެ ނިރުބަވެރި ޙަމަލާތަކެއް


ސޫރިޔާގެ ވެރިރަށް ދިމިޝްޤުގެ އިތުރުން ޙަމާއާއި ޙުއްމުޞަށް ޔަހޫދީ ފައުޖުން ނުރައްކާތެރި ވައިގެ ޙަމަލާތަކެއްދީ، ބޮޑެތި ގެއްލުންތަކެއް ދީފިއެވެ. އަސްކަރީ މަތިންދާބޯޓުތައް ބޭނުން ކޮށްގެން ދިމިޝްޤަށް ދީފައިވާ ވައިގެ ޙަމަލާތައް އަމާޒު ކޮށްފައި ވަނީ ބަރަޛާ އަވަށުގައި ހުރި ސައިންޓިފިކް ދިރާސާ ކުރާ މަރުކަޒަކަށެވެ. މިއީ، ސޫރިޔާގެ ސިޔާދަތީ މިނިވަންކަމާއި އިސްތިޤުލާލަށް ބެލުމެއް ނެތި ދީފައިވާ ނިރުބަވެރި ޙަމަލާތަކެކެވެ.

ސޫރިޔާގެ ސީރިޔަން ޢަރަބް ނޫސް އޭޖެންސީ (ސަނާ)ން ބުނީ، ބަރަޛާގައި ހުރި ސައިންޓިފިކް ދިރާސާ ކުރާ މަރުކަޒުގެ އިތުރުން ޙަމާގައި ހުރި އަސްކަރީ ވައިގެ ބަނދަރަކަށް ވެސް ޔަހޫދީ ފައުޖުން ފަނާކުރަނިވި ހަތިޔާރު ބޭނުން ކޮށްގެން ޙަމަލާ ދީފައިވާ ކަމުގައެވެ. ޙުއްމުޞަށް ދީފައިވާ ޙަމަލާތައް ވެސް އަމާޒު ކޮށްފައި ވަނީ އަސްކަރީ ވައިގެ ބަނދަރަކަށެވެ.

ޔަހޫދީ ފައުޖުން ވެސް ވަނީ ސޫރިޔާގެ ބައެއް ރަށްތަކުގައިވާ "އަސްކަރީ" އަމާޒުތަކަށް ޙަމަލާ ދީފައިވާނެ ކަން ކަށަވަރު ކޮށްދީފައެވެ. ޙަމާގެ އަސްކަރީ ވައިގެ ބަނދަރަށް ދިން ޙަމަލާތަކުގައި ގިނަ އަދަދެއްގެ ޢާންމުންނާއި ސިފައިން ޒަޚަމުވެ، ވައިގެ ބަނދަރަށް ބޮޑެތި ގެއްލުންތަކެއް ލިބިފައިވާ ކަމުގައި ސޫރިޔާގެ ޚާރިޖީ ވުޒާރާއިން ހާމަކުރިއެވެ.

އަސަދުގެ ވެރިކަން ވައްޓައިލި ފަހުން ޢުދުވާންތައް އިތުރުކޮށް ފުޅާކުރުން

ބަޣާވާތަކުން ސޫރިޔާގެ ރައީސް ބައްޝާރް އަލް-އަސަދުގެ ވެރިކަން ވައްޓައިލި ފަހުން ޔަހޫދީ ފައުޖުން އެ ޤައުމަށް އަމާޒުކޮށް ދެމުންދާ ޙަމަލާތައް ވަނީ އިތުރު ކޮށްފައެވެ. 2024ވަނަ އަހަރުގެ ޑިސެންބަރު މަހުގެ 8ވަނަ ދުވަހު އަސަދުގެ ސަރުކާރު ވައްޓައިލާފައި ވަނީ ނިރުބަވެރި ޖަމާޢަތް، ހަޔިއަތު ތަޙްރީރް އަލް-ޝާމް (އެޗްޓީއެސު)ންނެވެ. ސޫރިޔާގައި މި ވަގުތު ވެރިކަން ކުރަމުން ދަނީ އެޗްޓީއެސުން ޤާއިމު ކޮށްފައިވާ ސަރުކާރަކުންނެވެ. ރައީސަކީ، އެ ޖަމާޢަތުގެ ވެރިޔާ އަޙްމަދު އަލް-ޝަރާޢެވެ.

ވައިގެ ޙަމަލާތަކުގެ އިތުރުން، ޔަހޫދީ ފައުޖުން ވަނީ ސޫރިޔާގެ އަލް-ޖޫލާންގައި އެކުވެރި ދައުލަތްތައް (އދ)ން ސުލްޙަ ބަލަހައްޓާ ސަރަޙައްދުތަކަށް ވެސް ސިފައިންނާއި ހަތިޔާރު ފޮނުވާފައެވެ. އަސަދުގެ ވެރިކަމުގެ ތެރޭގައި ވެސް ޔަހޫދީ ފައުޖުން ވަނީ ސޫރިޔާއަށް ނުރައްކާތެރި ޙަމަލާތަކެއް އަމާޒު ކޮށްފައެވެ. އެއީ، އީރާނުގެ އިސްލާމީ އިންޤިލާބީ ލަޝްކަރު (އައިއާރްޖީސީ)ގެ ކޮމާންޑަަރުންނާއި ސިފައިންގެ އިތުރުން ލުބްނާންގެ މުޖާހިދުންގެ ޖަމާޢަތް، ޙިޒްބުاللهގެ މެންބަރުންނަށް އަމާޒުކޮށް ދީފައިވާ ޙަމަލާތަކެއް ކަމުގައި ޔަހޫދީ ފައުޖުން ބުންޏެވެ.

ސޫރިޔާގެ ރައްޔިތުންގެ އިންސާނީ ޙައްޤުތަކުގެ ހާލަތު ވަޒަންކުރާ އިނގިރޭސިވިލާތުގެ ޖަމުޢިއްޔާ، ސީރިޔަން އޮބްޒަރވޭޓަރީ ފޯ ހިޔުމަން ރައިޓްސް (އެސްއޯއެޗްއާރު)ން ބުނީ ޑިސެންބަރު 8ވަނަ ދުވަހު އެޗްޓީއެސުން އަސަދުގެ ވެރިކަން ވައްޓައިލުމާ އެކު ވެސް ޔަހޫދީ ފައުޖުން ބަރަޛާއަށް ޙަމަލާ ދޭން ފަށާފައިވާ ކަމުގައެވެ. ޔަހޫދީންނާއި، އެ މީހުންގެ އެންމެ ބޮޑު މަދަދުގާރު، އެމެރިކާއިން ޤަބޫލު ކުރާ ގޮތުގައި ބަރަޛާގެ ސައިންޓިފިކް ދިރާސާ ކުރާ މަރުކަޒަކީ މިސައިލް އަދި ކެމިކަލް ހަތިޔާރު އުފެއްދުމަށް ބޭނުން ކުރާ މަރުކަޒެކެވެ.

ޔަހޫދީންގެ ނިރުބަވެރި ޙަމަލާތަކާ މެދު އީޔޫގެ ކަންބޮޑުވުން

އެސްއޯއެޗްއާރުން ބުނީ، ހުސްވި އަހަރުގެ ޑިސެންބަރު 8ން 31އާ ދެމެދު ޔަހޫދީ ފައުޖުން ސޫރިޔާއަށް 500އަށްވުރެ ގިނަ ފަހަރު ޙަމަލާ ދީފައިވާ ކަން ކަށަވަރު ކުރެވިފައިވާ ކަމުގައެވެ. އަދި، އެއަށް ފަހު، މިއަދާ ޖެހެންދެން އިތުރު 43 ޙަމަލާއެއް ދީފައިވާ ކަމުގައެވެ. 2018ވަނަ އަހަރުގެ ތެރޭގައި ވެސް، އެެމެރިކާއާއި ހުޅަނގުގެ އަސްކަރިއްޔާތަކުން ބަރަޛާގައި ހުރި މަރުކަޒަށް ޙަމަލާތަކެއް ދީފައިވެއެވެ.

ފާއިތުވި ހަފުތާގެ ތެރޭގައި ޔަހޫދީ ފައުޖުން ސޫރިޔާގެ އައްސޭރިފަށުގައި އޮތް އަލް-ލާޒިޤިއްޔާ ޕުރޮވިންސަށް ނިރުބަވެރި ޙަމަލާތަކެއް ދީފައިވާ ކަން ވެސް އެސްއޯއެޗްއާރުން ހާމަކުރިއެވެ. ނަމަވެސް، އެ ޙަމަލާތަކުގައި އެއްވެސް މީހެއްގެ ފުރާނައަށް ނުރައްކާވި ކަން ނުވަތަ ނޫން ކަން ސާފެއް ނޫނެވެ. ވިލާތުގެ އިއްތިޙާދު (އީޔޫ)ގެ ޚާރިޖީ ސިޔާސަތާ ބެހޭ މުޝީރު ކާޔާ ކައްލާސް ވަނީ ޔަހޫދީ ފައުޖުގެ ނިރުބަވެރި ޙަމަލާތަކާ މެދު ކަންބޮޑުވުން ފާޅު ކުރައްވާފައެވެ. އޭނާ ވިދާޅުވީ، ޔަހޫދީ ފައުޖުގެ ޙަމަލާތަކުގެ ސަބަބުން ސޫރިޔާގެ މަސްލަހަތު ގެއްލެމުންދާ ކަމުގައެވެ.