ދުނިޔޭގެ ފުޓްބޯޅައިގެ މައި ޖަމުއިއްޔާ، ފީފާއިން ކޮންމެ މަހަކު ނެރޭ ރޭންކިންގައި ދިވެހިރާއްޖެ ދެ ދަރަޖަ ފަހަތަށް ވެއްޓިއްޖެއެވެ. މިއަދު ނެރުނު ފީފާ ރޭންކިންގައި ރާއްޖެއަށް ލިބިފައިވަނީ ދުނިޔޭގެ 164 ވަނައެވެ. ކުރިން ރާއްޖެ އޮތީ 162 ވަނައިގައެވެ.
ސާކު ސަރަހައްދުގައި ރާއްޖޭގެ މަގާމަކީ އިންޑިއާގެ ފަހަތުން ދެވަނައެވެ. އިންޑިއާއަކީ ފީފާ ރޭންކިންގައި މި ސަރަހައްދުގެ އެއްވަނަ އަދި ދުނިޔޭގެ 127 ވަނަ ގައުމެވެ. ނަމަވެސް އެ ގައުމު ވަނީ މި ފަހަރު އެއް ދަރަޖަ ފަހަތަށް ވެއްޓިފައެވެ.
ސަރަހައްދުގެ ތިން ވަނައިގައި އޮތީ ނޭޕާލެވެ. އެ ގައުމަށް 175 ވަނަ ލިބިފައިވާއިރު، ބޫޓާނާއި ބަންގްލަދޭޝް އުޅެނީ ގާތްގާތުގައެވެ. ބޫޓާނަށް 182 ވަނަ ލިބިފައިވާއިރު، ބަންގްލަދޭޝްއަށް ލިބިފައިވަނީ 183 ވަނައެވެ. ނަމަވެސް ބަންގްލަދޭޝް އަކީ މި ފަހަރުގެ ރޭންކިންގައި ސާކު ސަރަހައްދުން ކުރިއެރުން ހޯދި ހަމައެކަނި ގައުމެވެ. އެ ގައުމު ވަނީ ކުރީ ފަހަރުގެ ރޭންކިން އަށްވުރެ ދެ ދަރަޖަށް ކުރިއަށް ޖެހިލާފައެވެ.
ޕާކިސްތާން އޮތީ ފީފާ ރޭންކިންގެ 198 ވަނައިގައެވެ. ސާކު ސަރަހައްދުން ފުލުގައި އޮތީ ދުނިޔޭގެ ރޭންކިންގެ 200 ވަނައިގައި އޮތް ސްރީ ލަންކާއެވެ.
މި ފަހަރުގެ ފީފާ ރޭންކިން އިއުލާންކުރުމާ ހަމައަށް ސާކު ސަރަހައްދުގެ ހަތް ގައުމުން ވަނީ ގިނަ އަދަދެއްގެ މެޗުތަކެއް ކުޅެފައެވެ. މީގެ ތެރެއިން މެޗުތަކުން މޮޅުވެފައިވަނީ އިންޑިއާ އާއި، ލަންކާ އަދި ނޭޕާލެވެ. އިންޑިއާ ކުޅުނު ދެ މެޗުގެ ތެރެއިން އެއް މެޗު އެއްވަރުވެ، މޮޅުވީ ރާއްޖެ އަތުންނެވެ. ރާއްޖެ ކުޅުނު ދެ މެޗުންވެސް ބަލިވެފައިވާއިރު، ނޭޕާލް ވަނީ އެއް މެޗުން މޮޅުވެ އަނެއް މެޗު އެއްވަރުވެގެން ނިމިފައެވެ. ބަންގްލަދޭޝް އާއި ބޫޓާން އެއް މެޗު ކުޅުނުއިރު، ދެ ގައުމުވެސް ވީ އެއްވަރެވެ. ޕާކިސްތާން ކުޅުނު މެޗުން ބަލިވިއިރު، ލަންކާ އެއް މެޗުން މޮޅުވެ އަނެއް މެޗުން ވަނީ ބަލިވެފައެވެ.