ދުނިޔޭގެ ފުޓްބޯޅައިގެ މައި ޖަމުއިއްޔާ، ފީފާއިން ކޮންމެ މަހަކު ނެރޭ ރޭންކިންގެ އެއްވަނަ މަގާމު މި ފަހަރުވެސް ދުނިޔޭގެ ޗެމްޕިއަން އާޖެންޓީނާއިން ދަމަހައްޓައިފިއެވެ.
އެ ގައުމުގެ ފަހަތުން ދެ ވަނައިގައި އޮތީ ކުރިން ތިންވަނައިގައި އޮތް ޔޫރަޕުގެ ޗެމްޕިއަން ސްޕެއިންއެވެ. ކުރިން ދެވަނައިގައި އޮތް ފްރާންސް ވަނީ ތިންވަނައަށް ވެއްޓިފައެވެ.
ހަތަރުވަނަ މަގާމު އިނގިރޭސިން އަދި ފަސްވަނަ މަގާމު ބްރެޒިލްއިން ވަނީ ހިފަހައްޓާލފައެވެ. އެކަމަކު ހަވަނައަށް ކުރިއަށް ޖެހިލީ ނެދަލަންޑްސްއެވެ. އެއީ ޕޯޗުގަލް ހަތްވަނައަށް ވެއްޓުމުންނެވެ. ތާވަލުގެ އަށްވަނައިގައި އޮތީ ބެލްޖިއަމެވެ. ނުވަވަނައިގައި އިޓަލީ އޮތްއިރު، ޖަރުމަން ލައްވާލީ 10 ވަނައިގައެވެ.
އޭޝިއާގެ ގައުމުތަކުގެ ތެރެއިން ރޭންކިންގެ އެންމެ ކުރީގައިވަނީ ދުނިޔޭގެ 15 ވަނައިގައި އޮތް ޖަޕާނެވެ. އަންނަ އަހަރު ފީފާ ވޯލްޑް ކަޕް ބާއްވާ ގައުމު އެމެރިކާ އޮތީ 16 ވަނައިގައެވެ.
މި ފަހަރުގެ ރޭންކިންގައި އެންމެ ބޮޑު ކުރިއެރުމެއް ހޯދާފައިވަނީ މިޔަންމާއިންނެވެ. އެ ގައުމު ވަނީ ހަތް ދަރަޖައިގެ ކުރިއެރުމަކާއެކު 162 ވަނައަށް ކުރިއަށް ޖެހިލާފައެވެ. އެންމެ ގިނަ ޕޮއިންޓް ހޯދީ 70 ވަނައިގައި އޮތް ބޮސްނިއާއިންނެވެ. އެ ގައުމަށް ވަނީ 24.16 ޕޮއިންޓް ލިބިފައެވެ.
އަދި ކެނެޑާއިން ވަނީ ވަނީ ދުނިޔޭގެ 30 ވަނަ ހޯދާފައެވެ. އެންމެ ބޮޑަށް ފަހަތަށް ދިޔަ ގައުމަކީ ގިނީއެވެ. އެ ގައުމު ވަނީ އަށް ދަރަޖަ ފަހަތަށް ޖެހި، 128 ވަނައަށް ވެއްޓިފައެވެ. މި ރޭންކިންގައި އެންމެ ގިނަ ޕޮއިންޓް ގެއްލުވާލި ގައުމަކީ އިރާގެވެ. އެގޮތުން ފަސް މެޗު ކުޅުނުއިރު، ތިން މެޗުން ބަލިވެ، އެއް މެޗުން މޮޅުވެ، އަނެއް މެޗު އެއްވަރުވުމުން އިރާގަށް ރޭންކިންގައި ވަނީ 29.46 ޕޮއިންޓް ގެއްލުންވެފައެވެ.