ބައިބަލާ އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ކުރިއަށްގެންދާ ޢީދު ބައިބަލާ ޗެލެންޖް 1446 ގެ ކުއާޓާ ފައިނަލަށް ޓީމުތައް ދަތުރުކޮށްފިއެވެ.
ނޮކްއައުޓް އުސޫލުން ކުރިއަށްދާ މި މުބާރާތުގައި 29 ޓީމެއް ވަނީ ބައިވެރިވެފައެވެ. ހުޅުމާލޭ ސެންޓްރަލް ޕާކް ސަރަހައްދުގައި ކުރިއަށްދާ މި އަހަރުގެ ބައިބަލާ މުބާރާތުގެ ގަދަ 16 ބުރުގެ މެޗުތައް މިރޭ ކުޅުނުއިރު، ފުރަތަމަ މެޗުގައި ސީދާ ދެ ގޭމުން ބީޖީ ނިއު ޖެނެރޭޝަން ބަލިކޮށް ޓީއެފްޓީ ވަނީ ކުއާޓާގެ ޖާގައެއް ކަށަވަރުކޮށްފައެވެ.
މިރޭ ކުޅުނު ދެވަނަ މެޗުގައި ބައްދަލުކޮށްފައިވަނީ ޓީއެފްޓީ ވަކަރުގެ އާއި އެލްޓީ ސްޕޯޓްސް ކުލަބެވެ. ސީދާ ދެ ގޭމުން މި މެޗު ކާމިޔާބުކޮށް އެލްޓީ ސްޕޯޓްސް ވަނީ ކުއާޓާއަށް ދަތުރުކޮށްފައެވެ. އަދި ސީދާ ދެ ގޭމުން ކުލަބު އެސްޑީޒެޑް ބަލިކޮށް، އެންމެ ފަހުގެ ރަނަރަޕް ކުލަބު ކާސިންޖީވެސް ވަނީ ކުއާޓާގެ ޖާގައެއް ހޯދާފައެވެ.
މި މުބާރާތުގައި މިރޭ ކުޅުނު ހަތަރުވަނަ މެޗުގައި ޖަނަވަރީމަގު ސްޕޯޓްސް ކުަލބު އަތުން ކުޑަ ހެންވޭރު ލަޔަންސް މޮޅުވީ ސީދާ ދެ ގޭމުންނެވެ. އަދި ސީދާ ދެ ގޭމުން ކުލަބު ވޯންޓެޑް ބަލިކޮށް ޓީސީ ސްޕޯޓްސް ކުލަބުވެސް ވަނީ ކުއާޓާގެ ޖާގައެއް ކަށަވަރުކޮށްފައެވެ. މިރޭގެ ހަވަނަ މެޗުގައި ބައްދަލުކުރީ ލޮރެންޒޯ ސްޕޯޓްސް ކުލަބާއި ޓީސީ ފްރެޓާނިޓީއެވެ. މި މެޗު ސީދާ ދެ ގޭމުން ކާމިޔާބުކޮށް، ލޮރެންޒީ ވަނީ ކުއާޓާއަށް ދަތުރުކޮށްފައެވެ.
ބައިބަލާގެ ޗެމްޕިއަންކަން 10 އަހަރު ހޯދާފައިވާ ބީޖީ ސްޕޯޓްސް ކުލަބުން ވަނީ މިރޭ ކުޅުނު މެޗުގައި ސީދާ ދެ ގޭމުން ޓީނޭޖް ޖޫނިއާސް ބަލިކޮށްފައެވެ. އަދި ގަދަ 16 ބުރުގައި ގަދަ ހިފުމަކަށްދިޔަ ހަމައެކަނި މެޗުގައި ކުލަބު ޓީނޭޖް ބަލިކޮށް، ޒެޕޯއިން ވަނީ ކުއާޓާގެ ޖާގައެއް ހޯދާފައެވެ.
ޢީދު ބައިބަލާ ޗެލެންޖް 1446 ގެ މީޑިއާ ޕާޓްނަރަކީ ޕަބްލިކް ސަރވިސް މީޑިއާ، ޕީއެސްއެމް އެވެ. ޕީއެސްއެމްގެ ޔެސް ޓީވީން މުބާރާތުގެ ހުރިހާ މެޗެއް ވަގުތުން ގެނެސްދިނުމަށް ވަނީ ހަމަޖެހިފައެވެ.