ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރުމަށް ޔަހޫދީ ފައުޖުން ހިންގަމުންދާ ޤަތުލުޢާންމުގެ ދަށުން، އެ ސަހަރުގެ ތިން މަދަރުސާއަކަަށް ނިރުބަވެރި ޙަމަލާތަކެއްދީ، 33 މީހުން ޝަހީދު ކޮށްލައިފިއެވެ. ޢުދުވާނުގައި ގެދޮރު ނެތިކޮށްލާފައިވާ އެތަކެއް ސަތޭކަ ބަޔަކު ވަގުތީ ހިިޔަލުގެ ގޮތުގައި ބޭނުން ކުރަމުން ދިޔަ މަދަރުސާތަކަށް ދިން ޙަމަލާތަކުގައި ޝަހީދު ކޮށްލާފައިވާ މީހުންގެ ތެރޭގައި 18 ކުޑަކުދިން ހިމެނެއެވެ.
ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފަށާފައި ވަނީ 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުއެވެ. އެ ޢުދުވާނުގައި ޝަހީދު ކޮށްލާފައިވާ މީހުންގެ އަދަދު 61,700އަށް އުފުލިފައިވާއިރު، އިތުރު 114,000އަށްވުރެ ގިނަ މީހުން ވަނީ ޒަޚަމު ކޮށްލާފައެވެ. އަދި، ޣައްޒާގެ ޢާންމުންގެ ގެދޮރާއި އުމްރާނީ ވަސީލަތްތައް ވަނީ ސުންނާފަތިކޮށް ބިމާ ހަމަކޮށްލާފައެވެ.
ޙަމާސާއި ޔަހޫދީންނާ ދެމެދު ޖަނަވަރީ 19ވަނަ ދުވަހު އަމަލު ކުރަން ފެށި އެއްބަސްވުމެއްގެ ދަށުން ޙަމަލާ ބަދަލު ކުރުން މެދުކަނޑައިލި ނަމަވެސް، އެ އެއްބަސްވުމާ ޚިލާފުވެ މާރިޗު 18ވަނަ ދުވަހު ޔަހޫދީ ފައުޖުން ވަނީ އަލުން ޣައްޒާއަށް ޙަމަލާ ދޭން ފަށާފައެވެ. އޭގެ ފަހުން ދީފައިވާ ނިރުބަވެރި ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު 1,042އަށްވުރެ އިތުރުވެފައިވާ ކަމަށް ޣައްޒާގެ ޞިއްޙަތާ ބެހޭ ވުޒާރާއިން ހާމަކުރިއެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި، މައުސޫމު ކުޑަކުދިންނާއި، ގައިބާރު ދެރަވެފައިވާ އުމޫރުންނެވެ.
ޔަހޫދީ ފައުޖުން އެންމެ ފަހުން ދީފައިވާ ޙަމަލާތައް އަމާޒުކޮށްފައި ވަނީ ޣައްޒާ ސިޓީގެ އަލް-ތުއްފާޙް އަވަށުގައި ހުރި ތިން މަދަރުސާއަަކަށެވެ. އޭގެ ތެރެއިން ދާރް އަލް-އަރްޤަމް މަދަރުސާއަށް ދީފައިވާ ނިރުބަވެރި ޙަމަލާގައި 29 މީހުން ޝަހީދުކޮށްލި ކަމުގައި ޣައްޒާގެ ސަރުކާރުގެ މީޑިޔާ އޮފީހުން ހާމަކުރިއެވެ. އޭގެ ތެރޭގައި 18 ކުޑަކުދިން ހިމެނެއެވެ. އަދި، 100އަށްވުރެ ގިނަ މީހުން ވަނީ ޒަޚަމު ކޮށްލާފައެވެ. އެއީ، ޢުދުވާނުގައި ގެދޮރު ނެތިކޮށްލާފައިވާ އެތަކެއް ސަތޭކަ ބަޔަކު ދިރިއުޅެމުން ދިޔަ އިމާރާތެކެވެ.
އެއް މަދަރުސާއަށް ހަތަރު ފަހަރު ޙަމަލާ ދިނުން
ޣައްޒާގެ މަދަނީ ސަލާމަތާ ބެހޭ އިދާރާގެ ތަރުޖަމާނު ބުނީ، ޔަހޫދީ ފައުޖުން އެ މަދަރުސާއަށް ހަތަރު މިސައިލް ބޭނުން ކޮށްގެން ޙަމަލާ ދީފައިވާ ކަމުގައެވެ. ދާރް އަލް-އަރްޤަމްގެ އިތުރުން ޣައްޒާ ސިޓީގެ ފަހްދު މަދަރުސާއަށާއި، ތުއްފާޙްގައި ހުރި ޝަޢުބާން އަލް-ރަޔީސް މަދަރުސާއަށް ވެސް ޔަހޫދީ ފައުޖުގެ ނިރުބަވެރި ޙަމަލާތައް އަމާޒު ކުރިއެވެ. އޭގެ ތެރެއިން ފަހްދު މަދަރުސާއަށް ދީފައިވާ ޙަމަލާތަކުގައި އިތުރު ހަތަރު މީހުން ޝަހީދު ކޮށްލާފައިވާއިރު، ޝަޢުބާން އަލް-ރަޔީސް މަދަރުސާއަށް ބޮންއަޅައި ޝަހީދު ކޮށްލާފައިވާ މީހުންގެ އަދަދު މި ވަގުތު ސާފެއް ނޫނެވެ.
މިއީ، ޢުދުވާނުގައި ގެދޮރު ނެތިކޮށް މަގުމަތި ކޮށްލާފައިވާ އެތަކެއް ސަތޭކަ ހާސް ބަޔަކު ވަގުތީ ހިޔަލުގެ ގޮތުގައި ބޭނުން ކުރަމުންދާ މަދަރުސާ ފަދަ އިމާރާތްތަކަށް ޔަހޫދީ ފައުޖުން ޙަމަލާ ދީފައިވާ ފުރަތަމަ ފަހަރެއް ނޫނެވެ. އެ ފަދަ މަދަރުސާތަކުގެ އިތުރުން، ގެދޮރު ނެތް މީހުން ދިިރިއުޅޭ ފޭލިގެތަކަށް ވެސް ޔަހޫދީ ފައުޖުގެ ނިރުބަވެރި ސިފައިން ދަނީ ރަޙުމު ކުޑަ ޙަމަލާތައް އަމާޒު ކުރަމުންނެވެ. ޔަހޫދީން އިންސާނިއްޔަތުކަމާ ބެހޭ ބައިނަލްއަޤުވާމީ ޤާނޫނުތައް މުގުރަމުން ދަނީ އެ މީހުންގެ އެންމެ ބޮޑު މަދަރުގާރު، އެމެރިކާއާއި، އެ ޤައުމުގެ ރައީސް ޑޮނަލްޑް ޓްރަމްޕްގެ ރުހުމާއި ވާތްގާ އެކުގައެވެ.
ޣައްޒާގެ ކުއްލި ހާލަތްތަކުގައި ހަރަކާތްތެރިވާ އިޖުތިމާޢީ ޚިދުމަތްތެރިންގެ އިދާރާ ވަނީ ގެދޮރު ނެތިކޮށްލާފައިވާ ޢާންމުންނާއި ރެފިއުޖީން ދިރިއުޅެމުންދާ ސަރަޙައްދުތަކަށް ޔަހޫދީ ފައުޖުން ދެމުންދާ މި ފަދަ ރަޙުމު ކުޑަ ޙަމަލާތައް ހުއްޓުވުމަށް ބައިނަލްއަޤުވާމީ މުޖުތަމަޢުން ވަގުތުންފިޔަވަޅު އަޅަން ޖެހޭ ކަމުގައެވެ. "މި ތަނުގައި ހިނގަމުން މި ދާ ކަމަކީ މުޅި ދުނިޔެއަށް ހޭލުންތެރިކަން ގެނުވަން ޖެހޭ ކަމެއް. އަންހެނުންނާއި ކުޑަކުދިންނާ ދެކޮޅަށް ހިންގަމުންދާ ހަނގުރާމައާއި ޤަތުލުޢާންމު ވަގުތުން ހުއްޓުވަން ޖެހޭ. ކުޑަކުދިން ޝަހީދު ކުރަމުން ދަނީ އެއްވެސް ރަޙުމެއް ނެތި،" އެ އިދާރާގެ ތަރުޖަމާނު ބުންޏެވެ.
ޣައްޒާގެ ޞިއްޙީ ޚިދުމަތްތެރިން ބުނީ ފާއިތުވި 24 ގަޑިއިރުގެ ތެރޭގައި ޣައްޒާއަށް ދީފައިވާ ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު 112އަށް އުފުލިފައިވާ ކަމުގައެވެ. އޭގެ ތެރެއިން 71 މީހުން ޝަހީދު ކޮށްލާފައި ވަނީ ޣައްޒާގެ އުތުރުގައި އޮތް ޣައްޒާ ސިޓީއާއި ދެކުނުގައި އޮތް ޚާން ޔޫނިސަށް ދީފައިވާ ޙަމަލާތަކުގައެވެ. ޝަހީދު ކޮށްލާފައިވާ 21 މީހެއްގެ ހަށިގަނޑު ޣާއްޒާ ސިޓީގެ އަލް-އަހްލީ ޢަރަބި ހަސްފަތާލަށް ގެންގޮސްފައިވާއިރު، އޭގެ ތެރޭގައި ހަތް ކުޑަކުދިން ހިމެނޭ ކަމުގައި ވެސް ޣައްޒާގެ ޞިއްޙީ ޚިދުމަތްތެރިން ހާމަކުރިއެވެ.