ލަންކާއަށް ކުރައްވާ ދަތުރުފުޅުގައި، އިންޑިޔާގެ ބޮޑުވަޒީރު މޯދީގެ އަމާޒު ހަކަތަ، ދިފާޢީ ގުޅުން ފުޅާކުރުމަށް

އިންޑިޔާގެ ބޮޑުވަޒީރު ނަރެންދުރަ މޯދީ، އަވަށްޓެރި ސްރީލަންކާއަށް މިއަދު ފެއްޓެވި ފުރަމާނަ ދަތުރުފުޅުގައި، ދެ ޤައުމުގެ ދެމެދު ހަކަތަ އާއި ދިފާޢީ ރޮނގުން ގުޅުން ފުޅާކުރުމަށް އިސްކަން ދެއްވާނެކަމަށް އިންޑިޔާ ސަރުކާރުގެ މަސްދަރުތަކުން ބުނެފިއެވެ.

މިއަދުގެ ވަގުތެއްގައި މޯދީ ލަންކާއަށް ވަޑައިގެންފައިވާއިރު، މިއީ ލަންކާގެ ރައީސް އަނޫރާ ކުމާރަ ދިސަނަޔަކަ މިދިޔަ އަހަރުގެ ސެޕްޓެމްބަރު މަހު މަޤާމާ ޙަވާލުވެވަޑައިގެންނެވިފަހުން، ބޭރު ޤައުމެއްގެ ވެރިޔަކު އެ ޤައުމަށް ކުރައްވާ ރަސްމީ ދަތުރުފުޅެވެ.

2022ވަނަ އަހަރުގެ މެއި މަހުގެ ތެރޭގައި އިޤްތިޞާދީ އަނދަވަޅަކަށް ވެއްޓުނު ލަންކާގެ އިޤްތިޞާދު މިހާރު މަޑުމަޑުން ރަނގަޅުވަމުން އަންނަ އިރު، އެ ކާރިސާއިން އަރައިގަތުމަށް އިންޑިޔާއިން ވަނީ ހަތަރު ބިލިއަން ޑޮލަރުގެ އެހީ ލަންކާއަށް ފޯރުކޮށްދީފައެވެ.

އަދި އެ މަހު ލަންކާއިން ދައްކަންޖެހޭ 1.36 ބިލިއަން ޑޮލަރުގެ ލޯނު ދެއްކުން ވެސް އިންޑިޔާއިން ވަނީ ފަސްކޮށްދީފައެވެ.

"ބޮޑުވަޒީރު މޯދީގެ މި ދަތުރުފުޅުގެ މަޤްޞަދަކީ ލަންކާ އާއި އިންޑިޔާއާ ދެމެދު އޮންނަ ޒަމާންވީ ގުޅުން ބަދަހިކުރުން،" ލަންކާގެ ރައީސް އޮފީހުން ނެރުނު ބަޔާނެއްގައި ބުނެފައިވެއެވެ.

މި ދަތުރުފުޅުގައި ހަކަތަ، ޑިޖިޓަލައިޒޭޝަން، ސަލާމަތާއި، ސިއްޙީ ފަރުވާ ފަދަ މުހިންމު ދާއިރާތަކާ ގުޅޭ އެއްބަސްވުންތަކުގެ އިތުރުން އިންޑިޔާއިން ލަންކާއަށް ދަރަނި ދެއްކުން އަލުން އެކުލަވާލުމުގެ އެހީއާ ގުޅޭ އެއްބަސްވުންތަކުގައި ސޮއިކުރާނެ ކަމަށް ވެސް އެ އޮފީހުން ބުންޏެވެ.

ޑިސެމްބަރު މަހު އިންޑިޔާގެ ނިއުދިއްލީގައި ބޭއްވި ދެ ލީޑަރުންގެ ފުރަތަމަ ބައްދަލުވުމުގައި ވަނީ ލަންކާގައި އިންވެސްޓްމަންޓްތަކާއި އިންޑިޔާއިން ލަންކާއަށް ލިކުއިފައިޑް ނެޗުރަލް ގޭސް ފޯރުކޮށްދިނުމާ ކަރަންޓު ވިއުގަތައް ގުޅުވައިދިނުމަށް އެހީތެރިވުމަށް ރާވާފައިވާ ކަންކަމާ ބެހޭ ގޮތުން މަޝްވަރާކުރައްވައިފައެވެ.

މި ބައްދަލުކުރެއްވުމުގައި، އިރުމަތީ ޓްރިންކޮމާލީގައި ސަރަޙައްދީ ހަކަތައާއި ސިނާއީ މަރުކަޒެއް ތަރައްޤީކުރުމުގެ މަޝްވަރާތައް ވެސް ވަނީ ކުރިއަށް ގެންގޮސްފައެވެ. ޖެނުއަރީ މަހު ދިސަނަޔަކެ ވިދާޅުވީ އެކްސްޕޯޓަށް އަމާޒުކޮށްގެން ޖޮއިންޓް ވެންޗާއެއްގެ ގޮތުގައި އެތަނުގައި ތެޔޮ ސާފުކުރުމުގެ ކާރުޚާނާއެއް ޤާއިމުކުރުމުގެ މަޝްވަރާތައް ކުރަމުން އަންނަ ކަމަށް ވެސް ބައެއް މީޑިޔާ ރިޕޯޓުތައް ވަނީ ބުނެފައެވެ.