މިދިޔަމަހު ފުލުހުންގެ އިދާރާއަށް ހުށަހަޅާފައިވާ މައްސަލަތަކުގެ އަދަދު ދަށަށް

މި ނިމުނު އޭޕްރީލްމަހު ފުލުހުންގެ އިދާރާއަށް ހުށަހަޅާފައިވާ މައްސަލަތަކުގެ އަދަދު ދަށްވެފައިވާ ކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

ފުލުހުންގެ ތަފާސްހިސާބުތަކުން ދައްކާގޮތުން މި ނިމުނު އޭޕުރީލްމަހު ފުލުހުންނަށް ޖުމްލަ 738 މައްސަލަ ހުށަހަޅާފައިވެއެވެ. މިދިޔަ މާރިޗުމަހު ފުލުހުންނަށް ހުށަހަޅާފައިވަނީ ޖުމްލަ 757 މައްސަލައެވެ. އަދި މިދިޔަ އަހަރުގެ އޭޕްރީލްމަހު ފުލުހުންނަށް ހުށަހަޅާފައިވަނީ ޖުމްލަ 980 މައްސަލައެވެ. އެގޮތުން މިދިޔަ އަހަރުގެ އޭޕްރީލްމަހާއި، އަޅާ ބަލާއިރު މިއަހަރުގެ އޭޕްރީލްމަހު ފުލުހުންނަށް ހުށަހަޅާފައިވާ މައްސަލަތަށް މިވަނީ ދަށްވެފައެވެ.

އޭޕްރީލްމަހު ހުށަހަޅާފައިވާ މައްސަލަތަކަށް ބަލާއިރު އެންމެ ގިނައިން ހުށަހަޅާފައިވަނީ ވައްކަމުގެ މައްސަލައެވެ. މިގޮތުން ވައްކަމުގެ 199 މައްސަލައެއް ވަނީ ހުށަހަޅާފައެވެ. އޭޕްރީލްމަހު 2 ވަނަ އަށް އެންމެ ގިނައިން ހުށަހަޅާފައިވަނީ ޓްރެފިކް އެކްސިޑެންޓްތަކުގެ މައްސަލަތަކެވެ. އެގޮތުން ޓްރެފިކް އެކްސިޑެންޓްތަކުގެ 170 މައްސަލަ ހުށަހަޅާފައިވެއެވެ.

ޓްރެފިކް އެކްސިޑެންޓްތަކުގެ މައްސަލަތަކަށްފަހު ތިންވަނައަށް އެންމެ ގިނައިން ހުށަހަޅާފައިވަނީ މަސްތުވާތަކެތީގެ މައްސަލަތަކެވެ. ފުލުހުންގެ ތަފާސްހިސާބުތަކުން ދައްކާގޮތުގައި މަސްތުވާތަކެތީގެ 151 މައްސަލަ ހުށަހަޅާފައިވެއެވެ.

އޭޕްރީލްމަހު ފުލުހުންނަށް ހުށަހަޅާފައިވާ މައްސަލަތައް:

• ވައްކަމުގެ 199 މައްސަލަ
• ޓްރެފިކް އެކްސިޑެންޓްތަކުގެ 170 މައްސަލަ
• މަސްތުވާތަކެއްޗާ ގުޅޭ 151 މައްސަލަ
• އެއްޗެހި ގެއްލިގެން 71 މައްސަލަ
• މުދަލަށް ގެއްލުން ދިނުމުގެ 33 މައްސަލަ
• އަނިޔާކުރުމުގެ 43 މައްސަލަ
• ގެވެށި އަނިޔާގެ 24 މައްސަލަ
• ޖިންސީ ގޯނާ ކުރުމުގެ 20 މައްސަލަ
• ފޭރުމުގެ 12 މައްސަލަ
• ޚިޔާނަތުގެ 11 މައްސަލަ
• ފޯޖް ކުރުމުގެ 4 މައްސަލަ

ކުށް މަދުކުރުމަށް އަތޮޅުތަކުގެ ޕޮލިސް ސްޓޭޝަންތަކުން ކައުންސިލްތަކާއި ގުޅިގެން ދަނީ ތަފާތު މަސައްކަތްތައް ކުރަމުންނެވެ. ޚާއްސަކޮށް ޓްރެފިކް އެކްސިޑެންޓްތަކުގެ މައްސަލަތައް މަދު ކުރުމަށްޓަކައި، ބާރު ސްޕީޑުގައި ނުދުއްވުމަށްށާއި، މަގުމަތީގެ ގަވައިދު ތަކައް އަމަލުކުރުމަށް ފުލުހުން ދަނީ ތަކުރާރު ކޮށް އިލްތިމާސް ކުރަމުންނެވެ.

މާލޭ ސަރަހައްދުގައި އެކްސިޑެންޓުތައް އިތުރުވާތީ، މާލޭ ސަރަޙައްދު ބެލެހެއްޓުމުގައި ޚާއްސަ ސިޔާސަތުތަކެއް ކަނޑައަޅާ ތަންފީޒުކުރަން ވަނީ ފަށާފައެވެ.