ބިންހިއްކުމުގެ މަސައްކަތް އަވަސްކުރުމަށް ބޮސްކާލިސްގެ ޑްރެޖަރު ރާއްޖެއަށް

މާލެ ސަރަޙައްދުގައި ކުރިއަށްގެންދާ ބިންހިއްކުމުގެ މަޝްރޫޢުތަކުގެ މަސައްކަތް އަވަސްކުރުމަށް ރާއްޖެ ގެނައުމަށް ސަރުކާރުން ނިންމާފައިވާ ޑްރެޖަރު މިހާރު ރާއްޖެއަށް އައިސްފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި ވިދާޅުވީ، ހުޅުމާލޭ 3 ވަނަ ފިޔަވަހީގައި ކުރިއަށްގެންދާ ބިން ހިއްކުމުގެ މަސައްކަތް ކުރުމަށްޓަކައި ނެދަލޭންޑުގެ ބޮސްކާލިސްގެ ޓްރެއިން ސަކްޝަން ހޮޕަރ ޑްރެޖަރ، ޕްރިންސް ޑާ ނެޑަލަންޑަން ރާއްޖެ އައިސްފައިވާކަމަށެވެ. އަދި މިޑްރެޖަރު ބޭނުންކޮށްގެން އެސަރަޙައްދު ހިއްކުމުގެ މަސައްކަތް މާދަމާ ފަށާނެކަމަށް ރައީސް ވިދާޅުވިއެވެ. މިއާއެކު މިވަގުތު އެސަރަޙައްދު ހިއްކަމުން އަންނަ ޓްރެއިން ސަކްޝަން ހޮޕަރ ޑްރެޖަރ އޮރަންޖީއާއެކު މަސައްކަތް އަވަސްވާނެކަން އެމަނިކުފާނު ފާހަގަކުރެއްވިއެވެ. އަދި ހުޅުމާލޭ 3 ވަނަ ފިޔަވަހީގެ މަސައްކަތް ޑިސެންބަރު މަހުގެ ނިޔަލަށް ނިންމާލެވޭނެކަމަށް ލަފާކުރައްވާކަމަށް ރައީސް ވިދާޅުވިއެވެ.

Dredger TSHD Prins Der Nederlanden has arrived today and will start tomorrow at Hulhumale phase 3 together with dredger TSHD Oranji which is currently in operation at Hulhumale phase 3.
Meanwhile, bund wall works at Giraavaru will start as soon as EIA and other formalities are… pic.twitter.com/fWLtgVfgKv

— Dr Mohamed Muizzu (@MMuizzu) November 25, 2025

މާލެ ސަރަޙައްދުގައި ބިން ހިއްކުމަށް ކުރިއަށްގެންދާ އިތުރު މަޝްރޫޢުތަކަށް އަލިއަޅުއްވާލައްވަމުން ރައީސް ވިދާޅުވީ، ގިރާވަރުފަޅު ހިއްކުމަށްޓަކައި އީއައިއޭގެ މަސައްކަތް މިހާރު ކުރިއަށްދާކަމަށާއި އެމަސައްކަތާއެކު އިދާރީގޮތުން ކުރަންޖެހޭ މަސައްކަތްތައް ނިމުމުން ބިން ހިއްކުމުގެ މަސައްކަތް ފެށޭނެކަމަށް ވިދާޅުވިއެވެ. އެގޮތުން ހުޅުމާލޭ 3 ވަނަ ފިޔަވަހީގެ މަސައްކަތް ނިމުމާއެކު ގިރާވަރުފަޅު ހިއްކުމުގެ މަސައްކަތްތައް ފެށޭނެކަމަށް ރައީސް ވިދާޅުވިއެވެ.

ރާއްޖޭގެ އެކި ސަރަޙައްދުތަކުގައި ކުރިއަށްގެންދާ ބިންހިއްކުމުގެ މަސައްކަތްތައް އަވަސްކުރުމަށް އިތުރު ޑްރެޖަރުތައް ގެންނަވާނެކަމަށް ރައީސުލްޖުމްހޫރިއްޔާވަނީ ވިދާޅުވެފައެވެ. މިގޮތުން އެމްއޭސީއެލްއާއި ހަވާލުކޮށްގެން 3 ޑްރެޖަރު ގެނައުމުގެ މަސައްކަތް ފަށްޓަވާފައިވާކަން ރައީސުލްޖުމްހޫރިއްޔާވަނީ ހާމަކުރައްވާފައެވެ.