ހޮންގ ކޮންގުގެ ޓައި ޕޯގައި ހުންނަ ވޭންގް ފުކް ޓަވަރުތަކުގައި ރޯވި އަލިފާނުގައި މަރުވި މީހުންގެ ޢަދަދު 128އަށް އުފުލިއްޖެއެވެ.
ވޭންގ ފުކް ކޯޓަކީ ހޮންގ ކޮންގގެ ސަރުކާރުގެ އިޖުތިމާޢީ ބޯހިޔާވަހިކަމުގެ ދަށުން ތަރައްޤީކޮށްފައިވާ އިމާރާތްތަކެކެވެ. އެ ސަރަޙައްދުގައި 32 ފަންގިފިލާގެ ޖުމްލަ އަށް ޓަވަރު ހުންނައިރު، ގާތްގަނޑަކަށް 2،000 އެޕާޓްމަންޓުގައި 4،600އެއްހާ މީހުން ދިޔައީ ޓަވަރުތަކުގައި ދިރިއުޅެމުންނެވެ. ވޭންގ ފުކް ކޯޓުގެ ޓަވަރުތަކުގައި ނޮވެމްބަރު މަހުގެ 26ވަނަ ދުވަހު ވަނީ އަލިފާން ރޯވެފައެވެ. އެ ހާދިޘާގައި އެ ސަރަޙައްދުގައި ހުންނަ އަށް ޓަވަރުގެ ތެރެއިން ހަތް ޓަވަރު ވަނީ އެއްކޮށް އަނދާ ހުލިވެފައެވެ.
ހޮންގ ކޮންގުގެ އިދާރާތަކުން ބުނި ގޮތުގައި އަލިފާނުގެ ހާދިޘާގައި 128 މީހުން މަރުވެފައިވާކަން ވަނީ ކަށަވަރުކުރެވިފައެވެ. އިތުރު 200 މީހުންގެ ޚަބަރެއް ވެފައިނުވާއިރު، މަރުވި މީހުންގެ ޢަދަދު އަދިވެސް ބޮޑުތަނުން އިތުރުވުން ވަރަށް ގާތެވެ. ކަމާބެހޭ އިދާރާތަކުން މިހާރު ވަނީ ވޭންގ ފުކް ކޯޓުން މީހުން ސަލާމަތްކުރުމުގެ މަސައްކަތް ހުއްޓާލައިފައެވެ. ނަމަވެސް ރޯވި އިމާރާތްތައް ތަހުޤީޤު ކުރުމުގެ ތެރޭގައި އެ ތަންތަނުން އިތުރު ހަށިތައް ފެނުން އެށީގެންވާ ކަމަށް ފުލުހުން ބުނެއެވެ.
އިދާރާތަކުން ބުނީ އަލިފާނުގެ ހާދިޘާ ހިނގިއިރު ޓަވަރުތައް މަރާަމާތު ކުރުމުގެ މަސައްކަތް ކުރިއަށްދާ ކަމަށެވެ. މަރާމާތުގެ ބޭނުމަށް އިމާރާތްތަކުގެ ބޭރުގައި ހުރީ ދަނޑި ބޭނުންކޮށްގެން ފެހިި ދާ ޖަހައިފައެވެ. އިމާރާތްތަކުގައި ހަލުވިކަމާއެކު އަލިފާން ފެތުރުމަށް މެދުވެރިވި މައިގަނޑު އެއް ސަބަބަކީ އެ ތަކެތީގައި ފަސޭހަކަމާއެކު ހުޅުހިފުން ކަމަށް ބެލެވެއެވެ. އެނގިފައިވާ ގޮތުގައި ޓަވަރުތަކުގައި ހަރުކޮށްފައިވާ ފަރަޔ އެލާމްތައް ވެސް ރަނގަޅަށް މަސައްކަތް ނުކުރެއެވެ.
އަލިފާނުގެ ހާދިޘާއާ ގުޅިގެން ހޮންގ ކޮންގގެ ފުލުހުން ވަނީ މިހާތަނަށް 11 މީހަކު ހައްޔަރުކޮށްފައެވެ. އޭގެ ތެރޭގައި ޓަވަރުތައް މަރާމާތު ކުރުމުގެ މަސައްކަތް ކުރަމުންދިޔަ ކުންފުނި ކަމަށްވާ ޕްރެސްޓީޖް ކޮންސްޓްރަކްޝަންގެ ދެ ޑިރެކްޓަރުންނާއި އިންޖިނިއަރިންގ ކޮންސަލްޓަންޓެއް ހިމެނެއެވެ. މި ހާދިޘާއާ ގުޅިގެން ކޮރަޕްޝަންގެ ތުހުމަތުގައި 8 މީހުން ހައްޔަރުކޮށްފައިވާއިރު، އޭގެ ތެރޭގައި އިންޖިނިއަރިންގ ކޮންސަލްޓަންޓަކާއި ސަބް ކޮންޓްރެކްޓަރަކާއި މެދުވެރިއެއް ހިމެނެއެވެ.
މި އަލިފާނުގެ ހާދިޘާއަކީ 1962ވަނަ އަހަރުން ފެށިގެން ހޮންގ ކޮންގުގައި ހިނގާފައިވާ އެންމެ ގިނަ ޢަދަދެއްގެ މީހުން މަރުވި އަލިފާނުގެ ހާދިޘާއެވެ. ހޮންގ ކޮންގުގައި ހިނގާފައިވާ އަލިފާނުގެ ހާދިޘާއަކުގެ ތެރެއިން އެންމެ ގިނަ ޢަދަދެއްގެ މީހުން މަރުވެފައި ވަނީ 1918ވަނަ އަހަރު ހިނގި އަލިފާނުގެ ހާދިޘާއެއްގައެވެ. އެ ހާދިޘާގައި 600އަށް ވުރެ ގިނަ މީހުން މަރުވެފައިވެއެވެ.