ބ. އަތޮޅު ހޮސްޕިޓަލުގެ އައު އިމާރާތުގެ ބިންގާ އަޅައިފި

ބ. އަތޮޅު ހޮސްޕިޓަލަށް އިތުރުކުރާ އައު އިމާރާތުގެ ޢަމަލީ މަސައްކަތް ފަށައިފިއެވެ.

މި އިމާރާތުގެ ޢަމަލީ މަސައްކަތް ފަށާފައިވަނީ، ސިއްޙީ ވަޒީރު އަބްދުﷲ ނާޠިމް އިބްރާހީމް މިހާރު ނ. އަދި ބ.އަތޮޅުގެ މީހުން ދިރިއުޅޭ ރަށްތަކަށް ކުރެއްވި ރަސްމީ ދަތުރުފުޅުގެ ތެރެއިން ބ. އޭދަފުށްޓަށް ކުރެއްވި ޒިޔާރަތުގައެވެ.

ބ. އަތޮޅު ހޮސްޕިޓަލަށް އިތުރުކުރާ އައު އިމާރާތުގެ ބިންގާ އެޅުމަށް މިއަދު އެރަށުގައި ވަނީ، ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފްވެރިކޮށްދެއްވާ މި އިމާރާތުގެ ބިންގާ އަޅުއްވައިދެއްވީ، ސިއްޙީ ވަޒީރު ޢަބްދުﷲ ނާޠިމް އިބްރާހިމެވެ.

މި ރަސްމިއްޔާތުގައި އޭދަފުށީ ކައުންސިލްގެ ރައީސްއާއި، ކައުންސިލް އިދާރާގެ މެމްބަރުންނާއި، ބ. އަތޮޅު ހޮސްޕިޓަލްގެ އިސްވެރިންގެ އިތުރުން ސިއްޙީ ވުޒާރާގެ އިސްވެރިން ބައިވެރިވެ ވަޑައިގެންނެވިއެވެ.

މި ރަސްމިއްޔާތު ޝަރަފްވެރިކޮށްދެއްވާ ވާހަކަފުޅު ދައްކަވަމުން ސިއްޙީ ވަޒީރު ޢަބްދުﷲ ނާޠިމް އިބްރާހީމް ވިދާޅުވީ، މިއަދު ބިންގާ އެޅި މި މަޝްރޫޢަކީ މިރަށުގެ ރައްޔިތުން އެތައް ދުވަހެއް ވަންދެން ސަރުކާރުގެ ފަރާތުން އެދެމުން ދިޔަ މަޝްރޫޢެއް ކަމަށެވެ. އަދި މިރަށުގައި 50 އެނދުގެ މުޅިން އައު ހޮސްޕިޓަލެއް ތަރައްޤީވެގެން ދިއުމަކީ، މިރަށުގެ ރައްޔިތުންނަށް އަދި މުޅި މި ސަރަހައްދުގެ ރައްޔިތުންނަށްވެސް ވަރަށް ގިނަ ފައިދާތަކެއް ލިބިގެންދާނެ ކަމެއް ކަމަށެވެ.

"މި އިމާރާތް މިރަށުގައި އެޅިގެން ދިއުމަކީ، އަސްލު ހަޤީޤަތުގައި މުޅި މި ސަރަހައްދަށް ލިބިގެން ދިޔަ ވަަރަށް ބޮޑު ފަޚުރެއް. އެކި ރަށްތަކުގެ މީހުން އެކި ދުވަސްކޮޅު މި ރަށުން ޚިދުމަތް ހޯދަމުން ދަނީ. ވުމާއެކު މި ހޮސްޕިޓަލް ތަރައްޤީ ވެގެންދާނީ، ވަރަށް ގިނަ ޚިދުމަތްތަކާއެކު. ރައްޔިތުން އެކަމަކަށް އެދިވަޑައިގެން ތިއްބެވި ޚިދުމަތްތަކާއެކު. މި ހޮސްޕިޓަލުން ރައްޔިތުންނަށް ވަރަށް ގިނަ ޚިދުމަތްތަކެއް ލިބިގެންދާނެ." ސިއްޙީ ވަޒީރު ޢަބްދުﷲ ނާޠިމް އިބްރާޙީމް ވިދާޅުވިއެވެ.

ބ. އަތޮޅު ހޮސްޕިޓަލްގެ އައު އިމާރާތުގެ މަސައްކަަތަކީ، ސަރުކާރުން ރޯޑު ޑިވެލޮޕްމަންޓް ކޯޕަރޭޝަން، އާރްޑީސީއާ ޙަވާލުކޮށްގެން ކުރިއަށް ގެންދާ ޚާއްސަ މަޝްރޫޢެކެވެ. މި މަޝްރޫޢުގެ ދަށުން ބ. އޭދަފުށީގައި 50 އެނދުގެ މުޅިން އައު ހޮސްޕިޓަލެއް ތަރައްޤީ ކުރުމަށް ވަނީ ހަމަޖެހިފައެވެ. 181.7 މިލިޔަން ރުފިޔާގެ މިމަޝްރޫޢު އާރްޑީސީއާ ހަވާލުކޮށްފައިވަނީ، 540 ދުވަހުގެ ތެރޭގައި ނިންމާ ގޮތަށެވެ.

އޭދަފުށީގައި ހުންނަ ބ. އަތޮޅު ހޮސްޕިޓަލަކީ، އެއަތޮޅުގެ ގިނަ ރައްޔިތުން ބަރޯސާވާ މައި ހޮސްޕިޓަލެކެވެ. މިގޮތުން ކޮންމެ ދުވަހަކުވެސް އެތަކެއް ރައްޔިތުންނެއް ޑޮކްޓަރަށް ދެއްކުމަށް އެ ހޮސްޕިޓަލަށް ޒިޔާރަތްކުރެއެވެ.

ސަރުކާރުން ދަނީ، ރާއްޖޭގެ އަތޮޅު ތެރޭގައި ދެމުންދާ ސިއްޙީ ޚިދުމަތްތައް އިތުރަށް ހަރުދަނާ ކުރުަމަށް ގިނަ މަސައްކަތްތަކެއް ކުރައްވަމުންނެވެ. އެގޮތުން އޭދަފުށި ފަދަ އާބާދީ ބޮޑު އަދި އެހެނިހެން ޚިދުމަތްތައްވެސް ފުރިހަމަ ރަށްތައް އާބަން ސެންޓަރެއްގެ ގޮތުގައި ތަރައްޤީ ކުރުމަށް ދަނީ، ގިނަ މަސައްކަތްތަކެއް ކުރައްވަމުންނެވެ.