ފަތުރުވެރިންނަށް ހޫނު މަރުޚަބާއެއް ކިޔައިފި

ދުނިޔޭގެ ފަތުރުވެރިކަމުގެ ދުވަސް ރާއްޖޭގައި ކުލަގަދަކޮށް ފާހަގަކުރުމުގެ ހަރަކާތްތައް ފަށައިފިއެވެ.

އެގޮތުން މިއަދު ރާއްޖެއަށް އެންމެ ފުރަތަމަ ޖެއްސި ފްލައިޓުން އައި ފަތުރުވެރިންނަށް ވަނީ ހޫނު މަރުހަބާއެއް ކިޔާފައެވެ. އިބްރާހިމް ނާސިރު އިންޓަރނޭޝަނަލް އެއަރޕޯޓަށް މިއަދު އެންމެ ފުރަތަމަ ޖައްސާފައިވަނީ ކޮރެއަން އެއަރގެ ފްލައިޓެކެވެ. img:http://s3.psmnews.mv/images/660x400/14749647127032.jpg|ފަތުރުވެރިން ގޮވައިގެން މިއަދު ރާއްޖެ އައި ފުރަތަމަ ފްލައިޓްގައި ރާއްޖެއައި ބައެއް ފަތުރުވެރިން - ފޮޓޯ: ހަފީޒާ/ޕީއެސްއެމް

އެ ފްލައިޓުން ރާއްޖެއަށް އައި ފަތުރުވެރިންނަށް މަރުޚަބާ ކިޔުމުގެ ގޮތުން ރާއްޖެއާއި ގުޅޭ ސްވެނިއަރ ހަދިޔާ ކޮށްފައިވެއެވެ. އަދި ދިވެހި ސަގާފީ ނެށުންތައްވެސް އެއަރޕޯޓްގެ އަރައިވަލް ޓަރމިނަލް ކައިރީ ކުރިއަށް ގެންގޮސްފައިވެއެވެ.

މިނިސްޓްރީ އޮފް ޓޫރިޒަމް އަދި މޯލްޑިވްސް އެއަރޕޯޓްސް ކޮމްޕެނީ ގުޅިވަޑައިގެން ކުރިއަށްގެންދަވާ މި ހަރަކާތާއި ގުޅޭގޮތުން ކޯރޕަރޭޓް ކޮމިއުނިކޭޝަންސްގެ ޖެނެރަލް މެނޭޖަރ ހަސަން އަރީފު ވިދާޅުވީ، މިއަދުގެ އެކި ވަގުތުތަކުގައި ފަތުރުވެރިންނަށް މަރުޚަބާ ކިޔުމުގެ ހަރަކާތްތައް އިބްރާހިމް ނާސިރު އެއަރޕޯޓްގައި ކުރިއަށް ގެންދެވުމަށް ރާއްވަވާފައިވާކަމަށް ވިދާޅުވިއެވެ.

ދުނިޔޭގެ ފަތުރުވެރިކަމުގެ ދުވަސް ފާހަގަކުރެއްވުމަށް ޓޫރިޒަމް މިނިސްޓްރީން ވަނީ ގިނަ ޙަރަކާތްތަކެއް ރާއްވަވާފައެވެ. އެގޮތުން މިއަދު ހެނދުނު ފެށި ޓޫރިޒަމް ފޯރަމްއާއި މާދަމާ ކުރިއަށް ގެންދަވާ ޓޫރިޒަމް ކޮންފަރެންސް ފާހަގަކޮށްލެވެއެވެ. މިއަދުގެ ފޯރަމްގައި ރާއްޖެއާއި ރާއްޖެއިން ބޭރުގެ ގިނަ ފަރާތްތަކެއް ބައިވެރިވާނެ ކަމަށް ޓޫރިޒަމް މިނިސްޓްރީގެ އެސިސްޓެންޓް ޑިރެކްޓަރ އަޙުމަދު އަބީރު ވިދާޅުވިއެވެ.

އަދި މީގެ އިތުރުން ސްކޫލް ކުދިންނަށް އަމާޒްކޮށްގެން ރިސޯޓް ދަތުރުތަކެއް އޮކްޓޯބަރ 1 ވަނަ ދުވަހު ބޭއްވުމަށް ވަނީ ހަމަޖެހިފައެވެ. ރާއްޖޭގެ 10 އަތޮޅަކުން 23 ރިސޯޓު، އަދި 29 ސްކޫލްއަކުން މި ހަރަކާތުގައި ބައިވެރިވާނެ ކަމަށް ޓޫރިޒަމް މިނިސްޓްރީން މައުލޫމާތުދެއްވައެވެ.

ދުނިޔޭގެ ފަތުރުވެރިކަމުގެ ދުވަހުގެ ޝިއާރެއްގެ ގޮތުގައި ދުނިޔޭގެ ފަތުރުވެރިކަމުގެ ޖަމްޢިއްޔާއިން މިއަހަރަށް ކަނޑައަޅާފައިވާ ޝިޢާރަކީ "ފަތުރުވެރިކަން އެންމެނަށް ވާޞިލުވެވޭ ގޮތަށް ކުރިއެރުވުން" މި ޝީއާރެވެ.