ދިވެހިރާއްޖޭގެ ޓޫރިޒަމާބެހޭ ޤާނޫނަށް ގެނެވުނު އިސްލާހާ ގުޅިގެން، ޓޫރިސްޓް ގެސްޓް ހައުސްތަކުން މިއަދުން ފެށިގެން ގްރީން ޓެކްސް ނަގަން ފަށައިފިއެވެ.
ދިވެހިރާއްޖޭގެ ޓޫރިޒަމާބެހޭ ޤާނޫނަށް ގެނެވުނު އިސްލާހާ ގުޅިގެން، 1 އޮކްޓޫބަރ 2016 އިން ފެށިގެން ޓޫރިސްޓް ގެސްޓްހައުސްތަކުން ގްރީން ޓެކްސް ނަގަން ފަށައި، ޓޫރިޒަމާބެހޭ ޤާނޫނާއި ގްރީން ޓެކްސް ޤަވާއިދުގައިވާގޮތުގެ މަތިން މީރާއަށް އެ ޓެކްސް ދައްކަންޖެހޭނެއެވެ.
ގެސްޓްހައުސްތަކުގައި ތިބޭ ޓޫރިސްޓުންގެ އަތުން ކޮންމެ ދުވަހަކަށް ގްރީން ޓެކްސްގެ ގޮތުގައި ނަގަން ޖެހޭމީ 3 އެމެރިކާ ޑޮލަރުގެ ރޭޓުންނެވެ. ރާއްޖޭގައި ހިންގާ ރިސޯޓުތަކާއި ޓޫރިސްޓު ހޮޓާ ތަކާއި ޓޫރިސްޓު އުޅަނދުތަކަށް އަންނަ ޓޫރިސްޓުންގެ އަތުން ގްރީން ޓެކްސް ނެގުމަށް ރައްޔިތުންގެ މަޖިލީހުން ފާސްކުރައްވާ އެ ޓެކްސް ނަގަން ފަށްޓަވާފައި ވަނީ 2015 ވަނަ އަހަރުގެ ނޮވެމްބަރު މަހުން ފެށިގެންނެވެ.
މި ޤާނޫނުގެ ދަށުން، ޓޫރިސްޓް ރިސޯޓްތަކާއި ޓޫރިސްޓް ހޮޓާތަކާއި ޓޫރިސްޓް އުޅަނދުތަކަށް އަންނަ ފަތުރުވެރިން ކޮންމެ ފަތުރުވެރިއެއްގެ އަތުން 6 ޑޮލަރުގެ ޓެކްސްއެއް އަންނަނީ ނަގަމުންނެވެ. ނަމަވެސް ގެސްޓްހައުސްތަކުން ގްރީން ޓެކްސް ނެގުމަށް ޤާނޫނުގައި އޭރު ކަނޑައެޅިފައެއް ނުވެއެވެ. ޓޫރިޒަމާ ބެހޭ ޤާނޫނަށް ގެނައި އިޞްލާޙުގައިވާ ގޮތުން، ރާއްޖޭގައި ހިންގާ ގެސްޓް ހައުސްތަކަށް އަންނަ ފަތުރުވެރިންގެ އަތުން ގްރީން ޓެކްސް ނެގޭނެއެވެ. ގްރީން ޓެކްސް ނަގައި ދައުލަތަށް ދެއްކުމަކީ އެ ފަތުރުވެރިއަކު ހުރި ތަނެއް ހިންގާ ފަރާތެއްގެ ޒިންމާއެއްކަމަށްވެސް އިޞްލާޙުގައިވެއެވެ.