މިހާރު އިންޑިއާގައި ކުރިއަށްދާ ބާރަތު އިންޓަރނޭޝަނަލް ޓޫރިޒަމް ބާޒާރުގައި ރާއްޖޭގެ ފަރާތުން ބައިވެރިވި ފަރާތްތަކާއި ރާއްޖެއިން އިންޑިއާއަށް ކަނޑައަޅާފައި ހުންނަވާ ސަފީރު އަޙްމަދު މުޙައްމަދު ބައްދަލުކުރައްވައިފިއެވެ.
އިންޑިއާގެ ވެރިރަށް ނިއު ދިއްލީގައި މިމަހުގެ ހަތަރަކުން ހަޔަކަށް، ކުރިއަށްދާ ބާރަތު އިންޓަރނޭޝަނަލް ޓޫރިޒަމް ބާޒާރު، ބީއައިޓީބީއަކީ ދުނިޔޭގެ އެންމެ ބޮޑު ޓްރެވަލް ފެއަރ ކަމުގައިވާ އައިޓީބީގެ އިންޑިއާ އެޑިޝަނެވެ.
މި ފެއަރގައި މޯލްޑިވްސް އެސޯސިއޭޝަން އޮފް ޓްރެވަލް އެޖެންޓުސް އެންޑް ޓުއަރ އޮޕަރޭޓަރސް، މާޓާޓޯއާއެކު ރާއްޖޭގެ ފަތުރުވެރިކަމުގެ ސިނާޢަތުގައި ޙަރަކާތްތެރިވާ 11 ފަރާތަކުން ބައިވެރިވެފައިވެއެވެ. ރާއްޖެއިން އިންޑިއާއަށް ކަނޑައަޅާފައި ހުންނަވާ ސަފީރު އަޙްމަދު މުޙައްމަދު ވަނީ ބީއައިޓީބީގެ ރާއްޖޭގެ ސްޓޭންޑަށް ޒިޔާރަތްކުރައްވައި އެ ފެއަރގައި ބައިވެރިވި ދިވެހިންނާ ބައްދަލްކުރައްވާފައެވެ.
ފައްސަތޭކައެއްހާ އެގްޒިބިޓަރުން މި ފެއަރގައި ބައިވެރިވެފައިވާއިރު، މި ފެއަރއަކީ އިންޑިއާގައި ބާއްވާ އެންމެ ބޮޑު ޓްރެވަލް ފެއަރއެވެ.