ޗައިނާގެ ޒުވާނުންގެ މެދުގައި އެންމެ މަޤްބޫލް މަންޒިލަކީ ރާއްޖެކަމަށް ސަރވޭއަކުން ދައްކައިފިއެވެ.
ދުނިޔޭގެ އެންމެ ބޮޑު ރިސަރޗް ކުންފުނިތަކުގެ ތެރޭގައި ހިމެނޭ، އެޖިލިޓީ ރިސަރޗް އެންޑް ސްޓްރެޓެޖީއިން އޭޝިއާގެ ފަތުރުވެރިންނަށް އަމާޒްކޮށްގެން ކުރި ސަރވޭއަކުން ދައްކާގޮތުން ޗައިނާގެ ޒުވާނުންނަށް ދެވަނައަށް އެންމެ މަޤްބޫލް މަންޒިލަކީ ފަރަންސޭސިވިލާތުގެ ވެރިރަށް ޕެރިހެވެ.
18 އަހަރާއި 34 އަހަރާ ދެމެދުގެ އޭޝިއާގެ 900 މީހުން މި ސަރވޭގައި ބައިވެރިކޮށްފައިވާއިރު، ސަރވޭގައި ބައިވެރިން މީހުންގެ ތެރެއިން 54 އިންސައްތަ މީހުން ޗުއްޓީ ހޭދަކުރުމަށް ޤައުމެއް އިޚްތިޔާރުކުރާއިރު، އެންމެ ބޮޑަށް ބަލަނީ އެޤައުމެއްގެ އަމާންކަމާއި ރައްކާތެރިކަމަށް ކަމަށް ވަނީ ބުނެފައެވެ.
މިއަހަރުގެ ޑިސެމްބަރމަހުގެ ފަހު ހަފްތާގެތެރޭގައި، ޗައިނާގެ 130 މިލިއަން މީހުން އެޤައުމުން ބޭރަށް ޗުއްޓީ ހޭދަކުރުމަށް ދާނެކަމަށް ލަފާކުރެވިފައިވެއެވެ. ޗައިނާއަކީ ރާއްޖެއަށް އެންމެ ގިނަ ޢަދަދަކަށް ފަތުރުވެރިން ޒިޔާރަތްކުރާ އެއް ޤައުމެވެ. އެހެންނަމަވެސް އެ ޤައުމުން ރާއްޖެ އަންނަ ފަތުރުވެރިންގެ ޢަދަދު އަންނަނީ ދަށްވަމުންނެވެ.