ކަސްޓަމްސް ވަޒީފާއަށް ވަތަނީ ޚިދުމަތުގެ ކުދިންނަށް ކުރިމަތިލެވޭނެ

ދިވެހި ވަތަނީ ޚިދުމަތް ފުރިހަމަކޮށްފައިވާ ކުދިންނަށްވެސް ކުރިމަތިލެވޭ ގޮތަށް ކަސްޓަމްސްއަށް މުވައްޒަފުން ހޯދަން އިއުލާންކޮށްފިއެވެ.

ޒުވާނުންނަށް އިސްކަންދޭ ގޮތަށް ވަޒީފާއަށް މީހުން ނަގަން ކަސްޓަމްސްއިން ކުރި އިއުލާނެއްގައި ވިދާޅުވީ، އެ އިދާރާއިން ޤާއިމްކޮށްފައިވާ އެކި އޮފީސްތަކަށް 26 އެސިސްޓެންޓް އޮފިސަރ ޓްރެއިނީ ބޭނުންވާ ކަމަށެވެ. ވަޒީފާގެ ފުރުސަތު ދީފައިވަނީ، އުމުރުން 18 އަހަރާއި 30 އަހަރާ ދެމެދުގެ ޒުވާނުންނަށެވެ. އެ އުމުރު ބަލަނީ، މި މަހުގެ 24 ވަނަ ދުވަހުގެ ނިޔަލަށެވެ.

މި ވަޒީފާތަކަށް ކުރިމަތިލުމުގެ ޝަރުތުތަކުގެ ތެރޭގައި ދިވެހިރާއްޖޭގެ ނޭޝަނަލް ސަރވިސް ޕްރޮގްރާމް ނުވަތަ އެފަދަ ކަސްޓަމްސްގެ މަސައްކަތާ ގުޅުންހުރި ޤައުމީ ޕްރޮގްރާމެއް ފުރިހަމަކޮށް ސެޓްފިކެޓެއް ހާސިލްކޮށްފައިވުން ހިމަނާފައިވެއެވެ. ކަސްޓަމްސްގެ މަސައްކަތާ ގުޅުންހުރި ދާއިރާއަކުން ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެ ލެވެލް 3 ނުވަތަ އެއަށްވުރެ މަތީ ސަނަދެއް ހާސިލުކޮށްފައިވުމާއެކު، ސެކަންޑްރީ ސްކޫލް ސެޓްފިކެޓް އިމްތިހާނުގައި "ދިވެހި" މާއްދާއިން ދަށްވެގެން "ސީ" ފާސް ލިބިފައިވުން ވަނީ ހިމަނާފައެވެ.

މީގެ އިތުރުން ސާނަވީ ނުވަތަ އެއާ އެއްފެންވަރުގެ އިމްތިހާނަކުން 2 މާއްދާއިން ދަށްވެގެން 'ޑީ' ގްރޭޑް ލިބިފައިވުމާއެކު، ސެކަންޑްރީ ސްކޫލް ސެޓްފިކެޓް އިމްތިހާނުގައި "ދިވެހި" މާއްދާއިން ދަށްވެގެން "ސީ" ފާސް ލިބިފައިވުންވެސް ހިމަނާފައިވެއެވެ.

އެ މަޤާމުގެ މުސާރައަކީ، 5،000ރ.އެވެ. އޭގެ އިތުރުން އެލަވަންސްގެ ގޮތުގައި 4،660 ރުފިޔާއާއި އޮފީހަށް ހާޒިރުވާ ކޮންމެ ދުވަހަކަށް 75 ރުފިޔާގެ އިތުރުން ކޮއްތު ފައިސާއާއި އިތުރު ގަޑީގެ ފައިސާއާއި ބަންދު ގަޑީގެ ފައިސާގެ އިތުރުން އެހެނިހެން އިނާޔަތްތަކާއެކު މަހަކު ޖުމްލަ 11،000ރ. އަށްވުރެ ބޮޑު މުސާރައެއް ލިބޭނެއެވެ.

ސަރުކާރުން ކުރިއަށް ގެންދާ ވަތަނީ ޚިދުމަތުގެ ޕްރޮގްރާމުގައި މިހާތަނަށް ގިނަ އަދަދެއްގެ ކުދިން ބައިވެރިވެ، ތަމްރީން ފުރިހަމަކޮށްފައިވެއެވެ. އޭގެ ތެރެއިން ބައެއް ކުދިންނަށް އެމްއެންޑީއެފާއި ފުލުސް އޮފީހުގެ އިތުރުން ސަރުކާރުގެ އެހެން އިދާރާތަކުން ވަނީ ވަޒީފާ ހަމަޖައްސައިދީފައެވެ.