ލޭ ހަދިޔާކުރުމަށް އެމީހަކު ހުރި ތަނަކަށް ގޮސް ލޭ ނެގޭނެ ޚިދުމަތް ތަޢާރަފުކުރަނީ
-
ލޭ ލިބުމުގެ ދަތިކަމަށް ބޮޑު ހައްލެއް ލިބޭނެ
-
ރާއްޖޭގެ 3 ސަރަހައްދުގައި ބްލަޑް ބޭންކް އެބަހުރި
ލޭ ހޯދުމުގައި ދިމާވާ ދަތިތައް ޙައްލުކުރުމަށް، އެމީހަކު ހުރި ތަނަކަށް ގޮސް ލޭ ނެގޭނެ މޮބައިލް ޚިދުމަތެއް ވަރަށް އަވަހަށް ފެށުމަށް ތައްޔާރުވަމުންދާކަމަށް ސިއްޙަތާއި އާއިލާއާއި އިޖުތިމާޢީ އެހީއާ ބެހޭ ވަޒީރު ޤީލާ ޢަލީ ވިދާޅުވެއްޖެއެވެ.
ސިއްޙަތާ ބެހޭ ވަޒީރު ޤީލާ ޢަލީ ވިދާޅުވީ ލޭ ދޭނެ މީހުން ހޯދުމުގައި ދަތިތައް ދިމާވާކަމަށެވެ. އަދި މީހުން ލިބޭ ޙާލަތުގައިވެސް، ލޭ ދިނުމުގެ ޝަރުތުތައް ހަމަނުވުމުގެ ސަބަބުން ބައެއް މީހުންނަށް ލޭ ދިނުމުގައި ގޮންޖެހުންތައް ހުންނަކަމަށެވެ.
ދެވަނަ ކަމެއްގެ ގޮތުގައި ވަޒީރު ވިދާޅުވީ، ވަގުތުގެ ދަތިކަމުގެ ސަބަބުން ލޭ ދިއުމަށް، ސެންޓަރުތަކަށް ދާން ބައެއް މީހުންނަށް އުނދަގޫވާކަމަށެވެ. މިކަމަށް ލުޔެއް ހޯދުމަށް، އެމީހަކު ހުރި ތަނަކަށް ގޮސް، ލޭ ނެގޭގެ ގޮތް ހަމަޖެއްސުމުގެ ޚިދުމަތެއް ތަޢާރަފުކުރުމަށް ތައްޔާރުވަމުންދާކަމަށެވެ.
"ލޭ ދޭން ބޭނުންވާ މީހުންނަށް ލުއިފަސޭހަކުރުމަށް ހަމަޖައްސާ ޚިދުމަތެއް މިއީ. ލޭ ދޭ މީހާ ގާތަށް ގޮސް، ލޭ ނެގޭނެ މޮބައިލް ޚިދުމަތެއް މިއީ. އޭރުން ލޭ ނަގާ، ފެސިލިޓީތަކަށް ގެންގޮސް އެ ލޭ ރައްކާކުރެވޭނެ." ވަޒީރު ވިދާޅުވިއެވެ.
ވަޒީރު ވިދާޅުވީ ލޭ ލިބުމުގެ ދަތިކަން ޙައްލުކުރަން، ލޭ ރައްކާކުރެވޭ 4 ސްޓޯރޭޖް ފެސިލިޓީ (ބަލްޑް ބޭންކް) އަތޮޅުތަކުގައި ޤާއިމުކޮށްފަވާކަމަށެވެ. ވަޒީރު ވިދާޅުވީ ލޭގެ ދަތިކަން ނައިސް ލިބޭނީ، ލޭ ދޭ މީހުން އިތުރުކުރެވިގެންކަމަށެވެ.
ލޭ ބޭނުންވާ ކަންކަމުގެ ތެރޭގައި ތެލަސީމިއާ ކުދިންނާއި އެކިއެކި އޮޕަރޭޝަންތަކާއި ބަލިޔަކާ ގުޅިގެން ލޭ ބޭނުންވާ މީހުން ހިމެނެއެވެ. ތެލަސީމިއާ ޕޭޝަންޓުގެ އަދަދަށް ބަލާއިރު، ރާއްޖޭގައި މިވަގުތު 600އަށްވުރެ ގިނަ ތެލަސީމިއާ ޕޭޝަންޓުން އެބަތިއްބެވެ. އެންމެ ގިނަ މީހުން ތިބީ މާލޭގައެވެ.
މި ދާއިރާ ފުޅާކުރުމަށް ކުރަމުންދާ މަސައްކަތްތަކުގެތެރެއިން، ރާއްޖޭގައި ލޭގެ ޑީއެންއޭ ހެދޭނެ ލެބޯޓްރީއެއްވެސް މިއަހަރު ވަނީ ހުޅުވާލާފައެވެ.