ބުރު ބަލިކޮށް، ބިސްބުރު ތާވަލުގެ 4 ވަނައަށް

ދިރާގު ދިވެހި ޕްރިމިއަރ ލީގުގައި މިއަދު ހަވީރު ގަލޮޅު ރަސްމީ ދަނޑުގައި ކުޅުނު ފޯރިގަދަ މެޗުގައި، ފަހަތުން އަރައި 2-1 އިން ބުރު ސްޕޯޓްސް ކްލަބް ބަލިކޮށް ބިސްބުރު ސްޕޯޓްސް ކްލަބުން މުހިންމު މޮޅެއް ހޯދައިފިއެވެ.

މި މޮޅާއެކު ބިސްބުރު ވަނީ ލީގުގައި ކުޅުނު ތިން މެޗުން ހަ ޕޮއިންޓް ހޯދައި، ތާވަލުގެ ހަތަރު ވަނައަށް ޖެހިލާފައެވެ.

ގަލޮޅު ދަނޑުގައި ކުޅުނު މި މެޗު ރަނގަޅަށް ފެށީ ބުރު ސްޕޯޓްސް ކްލަބުންނެވެ. އެގޮތުން، މެޗުގެ 30 ވަނަ މިނިޓުގައި ބުރުން ވަނީ ލީޑު ނަގާފައެވެ. މި ލަނޑަކީ އެ ޓީމުގެ ބިދޭސީ މިޑްފީލްޑަރު ހަލީލް ޖަމާލް ދިން ބޯޅައަކުން، އަބްދުﷲ ޔާމީން ގޯލުގެ ތެރެއަށް ފޮނުވާލައިގެން ކާމިޔާބުކުރި ލަނޑެކެވެ.

ފުރަތަމަ ހާފު ބުރު ކުރީގައި އޮވެގެން ނިމުނުއިރު، ދެވަނަ ހާފުގައި ބިސްބުރަށް އިތުރު ގޮންޖެހުމަކާ ކުރިމަތިލާން ޖެހުނެވެ. އެއީ މެޗުގެ 76 ވަނަ މިނިޓުގައި އެ ޓީމުގެ އުލޫފް އަހުމަދަށް ދެވަނަ ރީނދޫ ކާޑާއެކު ރަތް ކާޑު ދައްކައި ދަނޑުން ފޮނުވާލުމުންނެވެ. ނަމަވެސް، ކުޅުންތެރިއަކު މަދުވި ނަމަވެސް ބިސްބުރުން ދެއްކީ ތައުރީފު ހައްގު ހިތްވަރެކެވެ.

އެގޮތުން، އޭގެ ހަތަރު މިނިޓު ފަހުން، މެޗުގެ 80 ވަނަ މިނިޓުގައި ބިސްބުރުން ވަނީ ނަތީޖާ ހަމަހަމަކޮށްފައެވެ. ކޯނަރަކުން ތަނަވަސްވި ފުރުސަތެއްގައި މި ލަނޑު އެ ޓީމަށް ޖަހައިދިނީ ބިދޭސީ ކުޅުންތެރިޔާ އަލޫ އޮވޮލާބީއެވެ.

މެޗު އެއްވަރުވާން ދަނިކޮށް، ބިސްބުރުން ނަތީޖާ އަނބުރާލީ އިތުރު ވަގުތުގެ ވެސް އެންމެ ފަހުކޮޅުގައެވެ. މިދިޔަ ސީޒަނުގައި ވިކްޓްރީ ސްޕޯޓްސް ކްލަބުން ފެނުނު މަޖުދާން ސޯލިހު ކާމިޔާބުކުރި މި ލަނޑާއެކު، ބިސްބުރު ވަނީ 2-1 އިން މެޗު ކާމިޔާބުކޮށް، ލީގުގައި ޖެހިޖެހިގެން ދެވަނަ މޮޅު ކަށަވަރުކޮށްފައެވެ.