ރާއްޖެއާބެހޭ މަޢުލޫމާތާއި ރީތި މަންޒަރުތައް ދުނިޔޭގެ ހުރިހާ ބައްރުތަކަށް ގެނެސްދިނުމަށް ޚާއްޞަ ދިވެހިންގެ ފުރަތަމަ ޓީވީ ޗެނެލް "މޯލްޑިވްސްޓީވީ" މިހާރު ބާލިންގައި ކުރިޔަށްދާ އައިޓީބީ ބާރލިން ފެއަރގެ ތެރޭގައި މިއަދު ލޯންޗްކުރާނެއެވެ.
ޕަބްލިކް ސަރވިސް މީޑިއާއިން ފަށާ މި ޗެނަލް ލޯންޗްކޮށްދެއްވުމަށް ހަމަޖެހިފައިވަނީ ފެއަރގެ ތެރޭގައި މިއަދު ބާއްވާ ޕްރެސް ކޮންފަރެންސްގައި ރާއްޖޭގެ ޓުއަރިޒަމް މިނިސްޓަރ މޫސާ ޒަމީރުއެވެ. މިއީ ރާއްޖޭގެ ފަތުރިވެރިކަން ބޭރު ދުނިޔޭގައި ޕްރޮމޯޓްކުރުމަށާއި، ރާއްޖޭގެ ނަލަކަމާއި، ދިރިއުޅުމުގެ އާދަކާދައާއި ވަށްޓަފާއިއާއި، ޘަޤާފަތާއި، ފަތުރުވެރިކަން ބޭރު ދުނިޔެއަށް ދައްކަމުން ގެންދިއުމަށް ޕީއެސްއެމުން ލޯންޗްކުރާ ޓީވީ ޗެނެލެކެވެ. އެގޮތުން މި ޗެނެލްއިން ފަތުރުވެރިކަމުގެ ދާއިރާއާއި ގުޅުންހުރި ހުރިހާ މަޢުލޫމާތު ހިމެނޭ ޕްރޮގްރާމްތަކާއި ޑޮކިއުމެންޓްރީތައް ގެނެސްދިނުމަށް ވަނީ ހަމަޖެހިފައެވެ.
މި ޗެނެލްގެ ސަބަބުން ރިސޯޓްތަކަށާއި، ގެސްޓްހައުސްތަކާއި، އެއަލައިންތަކާއި، ޓްރެވެލް އޭޖެންޓުންނަށް ވަރަށް ގިނަ މަންފާއެއްކޮށް، ރާއްޖޭގެ ފަތުރުވެރިކަމަށް އިތުރު ކުރިއެރުން ލިބެނޭއެވެ. މިއަދު ޓީވީ ލޯންޗްކުރުމާއެކު، އެޕް ސްޓްރީމްކޮށް 24 ގަޑިއިރު ލައިވްކޮށް ޓީވީ ބަލާލެވޭނެއެވެ. މިހާރު އެޕްސްޓްރީމްކޮށް ދެއްކިނަމަވެސް ކައިރި މުސްތަޤްބަލެއްގައި ޓީވީއިންވެސް މިޗެނަލް ބްރޯޑްކާސްޓްކުރަން ފަށާނޭއެވެ.